وڭتۇستىك قازاقستاندا 8-سىنىپتىڭ ەكى وقۋشىسى سۋعا كەتىپ قالدى

شىمكەنت. 5 مامىر. وڭتۇستىك قازاقستان وبلىسىندا اۋىلدىق ەمحانا قىزمەتكەرلەرىنىڭ بالالاردى الىپ سىرداريا وزەنى ۇستىندە قايىقپەن سەرۋەن قۇرۋلارىنىڭ اقىرى قايعىلى اياقتالدى. ورتا مەكتەپتىڭ 8-سىنىبىندا وقيتىن ەكى وقۋشى سۋعا كەتىپ قالدى. بۇل تۋرالى وڭتۇستىك قازاقستان وبلىسى توتەنشە جاعدايلار دەپارتامەنتى حابارلادى. قايعىلى وقيعا وتكەن جەكسەنبى كۇنى ورىن العان. اۋىل دارىگەرلەرى توبىنىڭ بۇل قىدىرىسىندا زارداپ شەككەن تاعى 24 جاستاعى مەدبيكە, 7 جاسار ۇل بالا مەن 5 جاسار قىز قازىر سارىاعاش اۋداندىق اۋرۋحاناسىنىڭ جانساقتاۋ بولىمىندە جاتىر. سول كۇنى دارىگەرلەر وتباسى مۇشەلەرىمەن بىرگە تابيعاتتىڭ اياسىندا دەمالۋعا بارادى. ەرەسەكتەر وزدەرىنىڭ سورىنا قاراي, ءدال قايتاردىڭ الدىندا بالالاردى قايىقپەن سەرۋەندەتپەكشى بولادى. وسىلايشا موتورلى قايىققا بەس بالا, مەدبيكە جانە قايىقشى وتىرادى. سۋدىڭ ۇستىندە ءوزىنىڭ شەبەرلىگىن كورسەتكىسى كەلدى مە, قايىقشى ءبىر كەزدە قايىعىن كىلت بۇرىپ جىبەرەدى. سول كەزدە قايىق اۋدارىلىپ كەتەدى. بۇدان قايىقشى مەن ءبىر وقۋشى عانا ءدىن-امان شىعادى. ال سۋعا كەتىپ قالعان ەكى وقۋشىنىڭ دەنەسى كەلەسى كۇنى عانا تابىلادى. باسقا سەرۋەنشىلەر اۋپىرىممەن امان قالادى. قازىر دارىگەرلەر ولاردىڭ ومىرلەرى ءۇشىن كۇرەسىپ جاتىر. قازىر انىقتالعانداي, قايىقشى سول كەزدە قىزۋ بولعان. ال قايىعىنىڭ اقاۋى بار ەكەن. باقتيار تايجان. دەرەك, سۋرەت: وڭتۇستىك قازاقستان وبلىسى توتەنشە جاعدايلار دەپارتامەنتى.