سۋرەت: gov.kz
قازىر وقيعالى ءتۋريزمدى دامىتۋعا جان-جاقتى كوڭىل ءبولىنىپ كەلەدى. سونىڭ ءبىرى رەتىندە «kazakhstan.travel» ۇلتتىق تۋريستىك پورتالىندا ءىس-شارالاردىڭ بىرىڭعاي كۇنتىزبەسى جاريالانعانىن ايتساق بولادى. وندا تۋريستەردى قىزىقتىراتىن ءتۇرلى فورماتتاعى ءىس-شارالار ەنگەن. بىلتىر سول كەستە بويىنشا 137 اۋقىمدى ءىس-شارا ءوتىپ, ونىڭ 80%-ى
استانا, الماتى قالالارىندا ۇيىمداستىرىلدى. تۋريزم جانە سپورت مينيسترلىگى اكىمدىكتەرمەن بىرلەسىپ, ءار وبلىستا وتەتىن وسىنداي ءىرى ءىس-شارالاردى تۇراقتى تۇردە كۇنتىزبەگە ەنگىزىپ وتىرۋعا نيەتتى. مينيسترلىككە قاراستى تۋريزم يندۋسترياسى كوميتەتى تۋريزم سالاسىنداعى جۇيەلى ءىس-شارالاردى جۇزەگە اسىرۋ باسقارماسىنىڭ باسشىسى نۇربول بايجانوۆ ءىس-شارالاردى جىل سايىن وتكىزۋدىڭ ماڭىزى تۋرالى اڭگىمەلەدى.
«وڭىردە وتەتىن ءىس-شارالار داستۇرگە اينالىپ, جۇرتشىلىق اسىعا كۇتەتىندەي بولۋعا ءتيىس. ءتۇرلى اتاۋلى كۇندەردى تۇراقتى نەگىزدە وتكىزىپ, ورايى كەلسە ولاردى حالىقارالىق كۇنتىزبەگە قوسۋ قاجەت. سودان سوڭ جارنامالاۋ ارقىلى وڭىرگە شەتەلدەن كەلەتىن تۋريستەردىڭ سانىن ارتتىرۋعا بولادى. جۋىردا تۋريزم جانە سپورت ءمينيسترى ەربول مىرزابوسىنوۆ ءار ايماقتا جىلىنا تۋريستەردى تارتاتىن كەم دەگەندە ءبىر اۋقىمدى ءىس-شارا وتكىزۋدى ۇسىندى. وسى جاقسى باستاما ءوڭىر ءتۋريزمىن ىلگەرىلەتۋگە وڭ اسەر ەتەدى دەگەن سەنىمدەمىز», دەيدى ن.بايجانوۆ.
مينيسترلىكتىڭ حابارلاۋىنشا, ەلدە وقيعالى تۋريزممەن قاتار, ىسكەرلىك ءتۋريزمدى دامىتۋعا دا الەۋەتىمىز جەتەدى. بۇل باعىتتا اتاپ ايتارلىقتاي جەتىستىكتەرىمىز بار. مىسالى, كونگرەستەر مەن كونفەرەنتسيالاردىڭ حالىقارالىق قاۋىمداستىعىمەن بەلسەندى ىنتىماقتاستىق ورناعان. ەسەسىنە, جىل سايىن ەلىمىزدە اۋقىمدى ءىس-شارا وتكىزۋدىڭ مۇمكىندىگى تۋىپ وتىر. كەيىنگى ءۇش جىلدا ەلىمىزدە حالىقارالىق دەڭگەيدەگى 21 ءىس-شارا ۇيىمداستىرىلدى. بيىل IFLA, Walter E. Dandy, ISAAK, IGCGD, New Silk Road Network جىل سايىنعى كەزدەسۋىن قوسا العاندا, تاعى 5 ءىرى حالىقارالىق ءىس-شارا وتكىزۋ جوسپارلانعان.
بىلتىر ەلىمىزدە 5180 شەتەلدىك دەلەگاتتىڭ قاتىسۋىمەن 14 حالىقارالىق ءىس-شارا ءوتتى. ورتا ەسەپپەن العاندا قوناقتاردىڭ ارقايسىسى شامامەن 4000 اقش دوللارىن جۇمساعان. وسى ءىس-شارالاردان تۇسكەن كىرىستەردىڭ جالپى سوماسى 20,7 ميلليون دوللاردان اسقان. بۇل قاراجاتقا ۇشۋ, تۇرۋ, تاماقتانۋ, باسقا دا شىعىندار كىرەدى.
«استانا ىسكەرلىك, وقيعالى ءتۋريزمنىڭ نەگىزگى ورتالىقتارىنىڭ بىرىنە اينالىپ كەلەدى. الداعى ايلاردا ەلوردادا بىرقاتار اۋقىمدى حالىقارالىق ءىس-شارالار وتكىزۋ جوسپارلانعان. مىسالى, ماۋسىمدا اقش, كانادا, رەسەي, ەۋروپا, ازيادان 500 جەتەكشى مامان قاتىساتىن ح دۇنيەجۇزىلىك نەيروحيرۋرگيالىق قاۋىمداستىق كونگرەسى وتەدى. شىلدەدە نازارباەۆ ۋنيۆەرسيتەتى حالىقارالىق ساراپشىلار قوعامىنىڭ كونگرەسىن قابىلدايدى. وعان مىڭداعان قاتىسۋشى كەلەدى. تامىزدا استانا «IFLA» دۇنيەجۇزىلىك كىتاپحانا جانە اقپاراتتىق كونگرەسىن وتكىزۋ الاڭىنا اينالادى. كىتاپحانا سالاسىنداعى ەڭ ءىرى وقيعاعا الەمنىڭ 130-دان استام ەلىنەن 4000-عا جۋىق دەلەگات جينالماق. اتالعان مىسە ءىس-شارانى وتكىزۋ استاناعا شامامەن 2 ملن ەۋرو تابىس اكەلەدى دەپ كۇتىلىپ وتىر. جيىنتىق پايدا دەلەگاتتاردىڭ تۇرۋعا, كولىككە, تاماقتانۋعا, باسقا دا قىزمەتتەرگە جۇمساعان شىعىندارىنان قۇرالادى», دەيدى ن.بايجانوۆ.
ىسكەرلىك, وقيعالى ءتۋريزمدى ۇيىمداستىرۋعا استانا قالاسى تاپتىرماس ورىن. قالانىڭ حالىقارالىق دەڭگەيدەگى ءىس-شارا وتكىزۋدە تاجىريبەسى مول. قوناقۇيلەرىندە 10 مىڭنان استام جيىنتىق ءنومىر قورى بار. 120-دان استام مادەني, ويىن-ساۋىق نىسانى جۇمىس ىستەيدى. سونىمەن قاتار ەلوردا 16 ەلمەن (27 باعىت) تىكەلەي اۋە قاتىناسىن ورناتقان. ۇكىمەت دەڭگەيىندە قابىلدانعان وسىنداي ءىس-شارالاردىڭ ناتيجەسىندە ەلوردانىڭ تۋريستىك سالاسى تۇراقتى ءوسىم كورسەتكەن. ايتالىق, بىلتىر ىشكى تۋريستەر سانى 10,5 ملن ادامدى قۇراپ, 2023 جىلمەن سالىستىرعاندا 900 مىڭعا ارتقان. شەتەلدەن كەلگەن تۋريستەر سانى – 15,3 ملن. بۇل ستاتيستيكادا جۇمىسقا نەمەسە ەلدە تۇراقتاپ قالۋعا كەلگەندەر ەسەپكە الىنباعانىن دا ەسكەرگەن ءجون.
