قوستانايدا «ۇرپاقتار العىسى» اتتى اكتسيا باستالدى

قوستاناي. 5 مامىر. «اتامەكەن» كاسىپكەرلەردىڭ ۇلتتىق پالاتاسىنىڭ باستاماسىمەن  «ۇرپاقتار العىسى» اتتى ۇزاق مەرزىمدى الەۋمەتتىك جوباعا قوستاناي دا قوسىلدى. بۇل تۋرالى  egemen.kz ءتىلشىسى حابارلادى. قازاقستاننىڭ بارلىق شالعايىنداعى بيزنەسمەندەر, كاسىپكەرلەر ۇلى وتان سوعىسى جانە تىل ارداگەرلەرىنە كومەك قولىن سوزۋعا دايىن ەكەندىگىن ءبىلدىردى. قوستاناي تۇرعىنى نادەجدا ميحايلوۆنا جۋكوۆا سوعىس باستالعاندا 9 جاستا عانا بولاتىن. ول  اناسىمەن بىرگە پارتيزاندارعا كومەكتەستى,  ولارعا  اقپارات, كەيدە تاماق تاسىدى. وسىدان 70 جىل بۇرىن ول قيىندىقتى نازىك يىعىمەن كوتەرىپ ءجۇرىپ,  جەڭىس تۋرالى  ارماندادى. قازىر  قاريا ناشار ەستيدى, ناشار كورەدى. ونىڭ قىزى  ۇلتتىق پالاتانىڭ  بايلانىس ورتالىعىنان اناسىنىڭ ءدارى-دارمەگىنە كومەكتەسۋدى سۇراعان بولاتىن. ءدارى-دارمەگىن ۇيىنە اكەلىپ بەرگەن ۇلتتىق پالاتا وكىلىنە نادەجدا ميحايلوۆنا العىسىن ايتتى. دەمەك, تىل ارداگەرى نادەجدا جۋكوۆا «اتامەكەن» ۇلتتىق پالاتاسى باستاماسىمەن ومىرگە كەلگەن رەسپۋبليكالىق «ۇرپاقتار العىسى» جوباسىنىڭ قاتىسۋشىسى بولىپ وتىر.  مۇنداي كومەكتى العان تىل ارداگەرى نيكولاي سيدورەنكو دا العىسىن ايتتى. نيكولاي سيدورەنكو: «سوعىس باستالعاندا مەن 8 جاستا  ەدىم. ۇلكەندەر سەكىلدى ەش جۇمىستان قالعان جوقپىن, ەگىن دە ەكتىم, جەر جىرتتىم, قىزىل ارمياعا ازىق-ت ۇلىك دايىندادىم» دەدى. قوستاناي وبلىستىق كاسىپكەرلەر پالاتاسىنىڭ مالىمەتىنشە, ارداگەرلەرگە كومەك مۇنىمەن شەكتەلمەيدى, ول جالعاساتىن بولادى. قوستاناي وبلىستىق كاسىپكەرلەر پالاتاسى ادام كاپيتالىن دامىتۋ جانە الەۋمەتتىك ارىپتەستىك ءبولىمىنىڭ باسشىسى سۇڭقار سۇلتانوۆ: «كاسىپكەرلەر حالىقتىڭ مۇنداي بولىگىن ەشقاشان نازاردان تىس قالدىرمايدى. فەدوروۆ اۋدانىندا كاسىپكەرلەر جەڭىس قورىن قۇرىپ,  ول قارجىعا ارداگەرلەردىڭ ءۇيىن  جوندەۋدەن وتكىزدى. وبلىستا  280 ادام «ميلح», «يۆولگاحولدينگ», «بايان سۇلۋ» , «قوستاناي ۇن كومبيناتى» سەكىلدى ءىرى شارۋاشىلىقتار مەن كومپانيالاردان جىل سايىن سىيلىقتار الىپ تۇرادى», دەدى. قوستانايلىق كاسىپكەرلەر  « ۇلى وتان سوعىسىنىڭ ارداگەرلەرى» سايتىنىڭ ۇزدىكسىز جۇمىس ىستەۋى ءۇشىن كومەكتەسەدى. ونىڭ ۇزدىكسىز جۇمىس ىستەۋىنە 70 000 تەڭگە اقى كەرەك بولدى. ءنازيرا جارىمبەتوۆا. دەرەك, سۋرەت: alau.kz