ۇزدىك مەديتسينالىق ۇيىمدار انىقتالدى

رەيتينگتىك باعالاۋعا مەن­شىك نىسانىنا, بەيىن­دىك باعىتىنا قارا­ماس­تان 20 وڭىردەگى 772 مەدي­تسينا­لىق ۇيىم تاڭدالعان. ونىڭ ىشىن­دە عىلىمي زەرتتەۋ ينستيتۋتتارى, عىلىمي ورتالىقتار, ەرەسەكتەرگە ارنالعان كوپبەيىندى ستاتسيونارلار, بالالارعا ارنال­عان كوپبەيىندى ستاتسيونارلار, بو­سان­دىرۋ ۇيىمدارى, مساك كورسە­تەتىن مەديتسينالىق ۇيىم­دار, ونكولوگيالىق ورتالىقتار, ديسپانسەرلەر, تۋبەركۋلەزگە قار­سى ديسپانسەرلەر, فتيزيوپۋل­مو­­نو­­لوگيا ورتالىقتارى, پسيحي­كا­­لىق دەنساۋلىق ورتالىق­تا­رى, اۋدان­دىق اۋرۋحانالار قام­تىلعان.

ادىستەمەگە سايكەس, رەيتينگتى ەسەپتەۋ كەزىندە 14 كلينيكالىق ينديكاتور, اككرەديتتەۋ تۋرالى اقپارات, نەگىزدەلگەن شاعىم­داردىڭ سانى تۋرالى مالىمەتتەر ەسكەرىلگەن. رەسپۋبليكانىڭ 17 عىلىمي زەرتتەۋ ينستيتۋتى مەن عىلىمي ورتالىعىنىڭ ىشىندە الماتىداعى «اكۋشەرلىك, گينەكولوگيا جانە پەريناتولوگيا عى­لىمي ورتالىعى» اق, «ا.سىز­عانوۆ اتىنداعى ۇلتتىق حيرۋرگيا عىلىمي ورتالىعى» اق, سونىمەن قاتار استاناداعى «ۇلتتىق عىلىمي مەديتسينا­لىق ورتالىق» اق رەيتينگكە قاتىسقان عىلىمي زەرتتەۋ ينستيتۋتتارىنىڭ اراسىندا كوشباسشى دەپ تانىلدى.

15 ونكولوگيا ورتالىعىنىڭ اراسىندا كلينيكالىق ينديكاتورلار مەن مەنەدجمەنت كورسەتكىشتەرى بويىنشا الماتى قالاسىنىڭ دەنساۋلىق ساقتاۋ باسقارماسى «الماتى ونكولوگيا ورتالىعى» مەكەمەسى, «قازاق ونكولوگيا جانە راديولوگيا عىلىمي زەرتتەۋ ينستيتۋتى» اكتسيونەرلىك قوعامى, شىعىس قازاقستان وبلىستىق كوپبەيىندى «ونكولوگيا جانە حيرۋرگيا ورتالىعى» ۇزدىك اتاندى.

ەرەسەكتەرگە ارنالعان 84 كوپ­بەيىندى ستاتسيوناردىڭ ىشىندە مەديتسينالىق كومەك كورسەتۋ دەڭگەيى بويىنشا قاراعاندى قالاسىنىڭ №1 كوپبەيىندى اۋرۋ­حاناسى, قوناەۆ قالاسىنىڭ كوپبەيىندى قالالىق اۋرۋحاناسى, استانا قالاسى اكىمدىگىنىڭ №2 كوپبەيىندى قالالىق اۋرۋحاناسى ۇزدىكتەردىڭ الدى بولدى.

24 كوپبەيىندى بالالار ستا­تسيو­نارىنىڭ ىشىندە الماتى قالاسىنىڭ №2 بالالار قالا­لىق كلينيكالىق اۋرۋحاناسى, قىزىلوردا وبلىسىنىڭ كوپ­­بەيىن­دى وبلىستىق بالالار اۋرۋ­حاناسى, قاراعاندى قالا­سى­­­نىڭ كوپبەيىندى بالالار اۋرۋحاناسى توپ جاردى. 178 اۋدان­دىق اۋرۋحانانىڭ قىزمە­تىن باعالاۋ قورىتىندىسى بو­يىن­شا قاراعاندى وبلىسى اباي اۋداندىق اۋرۋحاناسى, اقتوبە وبلىسى «ايتەكە بي اا» ۇيىمى, «حرومتاۋ اا» مەكەمەسى ۇزدىك اتاندى.

مساك-ءتىڭ 385 ۇيىمىنىڭ ىشىندە مەنەدجمەنت جانە كليني­كالىق كورسەتكىشتەر بو­يىن­شا ەڭ جوعارى ناتيجەگە قول جەت­كىزگەن 5 ۇزدىك قالالىق ەمحانا انىقتالدى. ولار – استاناداعى رەسپۋبليكالىق مەديتسينالىق-سانيتارلىق العاشقى كومەك ورتالىعى, الماتى قالاسىنىڭ №17 قالالىق ەمحاناسى, باتىس قازاقستان وبلىسىنىڭ №4 قالا­لىق ەمحاناسى, اقتاۋداعى «Sofie Medgroup» كوپبەيىندى كلينيكاسى» جشس, پاۆلودار قالاسى اكىمدىگىنىڭ №3 ەمحاناسى.

2023 جىلدان باستاپ ەلدەگى مەديتسينالىق ۇيىمداردى, عىلىمي زەرتتەۋ ينستيتۋتتارى مەن عىلىمي ورتالىقتاردىڭ قىزمەتىن رەيتينگتىك باعالاۋ جاڭارعانى بەلگىلى. مۇندا ءوڭىر مەن رەسپۋبليكا دەڭگەيىندە مەديتسينالىق كومەك كورسەتۋ بەيىندەرى بويىنشا تالداۋ جۇرگىزۋگە مۇمكىندىك بەرەتىن وزەكتى ادىستەمە قولدانىلادى. بۇل دا بولسا پاتسيەنتتەرگە ساپالى مەديتسينالىق كومەك ۇسى­ناتىن ۇزدىك ۇيىمداردى انىق­­تاۋعا سەپتىگىن تيگىزەدى, رەيتينگ­­تەن قالىس قالعانداردى جىگەر­لەندىرەدى.