«ستۋدەنتتەردى ماۋسىمدىق جۇمىسقا تارتۋدىڭ ماڭىزى زور. «جاسىل ەل» ەڭبەك جاساقتارى ستۋدەنتتەردىڭ بوس ۋاقىتىن ءتيىمدى پايدالانۋ ارقىلى مەملەكەتتىك جاستار ساياساتىنىڭ جۇزەگە اسۋىنا ىقپال ەتەدى. قاتىسۋشىلار توڭىرەكتى كوگالداندىرۋعا, سپورت كەشەندەرى مەن وزەن جاعالاۋلارىن قالپىنا كەلتىرۋگە, ساياباقتار مەن قۇرىلىس الاڭدارىن تازالاۋعا ۇلەس قوسادى», دەيدى وبلىستىق جاستار رەسۋرستىق ورتالىعىنىڭ ديرەكتورى ايبەك قادىراليەۆ.
«تازا قازاقستان» ەكولوگيالىق اكتسياسى تاراز قالاسى جىبەك جولى اۋدانىنا قاراستى «بايتەرەك» شاعىن اۋدانىندا, قاراحان كەسەنەسى ماڭىندا, سارىسۋ اۋدانىنىڭ ورتالىعى جاڭاتاس قالاسى مەن مويىنقۇم اۋدانىندا دا وتكىزىلدى. ءبىر سوزبەن ايتقاندا, ەكولوگيالىق ناۋقانعا ءوڭىردىڭ بارلىق اۋدانى قاتىستى.
وڭىردە ناۋرىز ايىنان باستاپ كوكتەمگى اباتتاندىرۋ ەكى ايلىعى باستالدى. ەكولوگيالىق اكتسيا اياسىندا «تازا قالا», «جاسىل قالا», «تازا كاسىپ – تازا ايماق», «جەر ساعاتى», «بولاشاقتى بىرگە وتىرعىزامىز» سەكىلدى ءىس-شارالار تۇراقتى تۇردە ۇيىمداستىرىلىپ جاتىر.
ەكولوگيالىق اكتسياعا, قورشاعان ورتانى قورعاۋعا جەرگىلىكتى تۇرعىندارمەن بىرگە وڭىرگە وزگە مەملەكەتتەن كەلگەن تۋريستەر دە اتسالىسىپ جاتقانى قۋانتادى. تارازعا كارى قۇرلىقتان كەلگەن يتاليالىق تۋريستەر دە ەكولوگيالىق اكتسياعا قاتىسىپ, كونە شاھاردىڭ تازالىعىنا ۇلەس قوستى. ولاردىڭ ەكولوگيالىق ناۋقانعا قاتىسۋىنا «ەجەلگى تاراز» مەملەكەتتىك تاريحي-مادەني مۋزەي قورىعىنىڭ ۇجىمى مۇرىندىق بولدى. مەيمانداردىڭ ايتۋىنشا, تاريحى تەرەڭدە جاتقان كيەلى ورىنداردىڭ توڭىرەگىن قوقىستان تازارتۋ – ساۋاپتى ءىس.
«ەكى مىڭ جىلدان استام تاريحى بار تارازدىڭ كەز كەلگەن تاريحي ورنى تاڭداي قاقتىرماي قويمايدى. العان اسەرىمىزدى سوزبەن جەتكىزۋ قيىن. مۇنداعى قاسيەتتى جەرلەرگە كوشەت وتىرعىزۋ باقىتى بىزگە بۇيىرعانىنا بەك قۋانىشتىمىز. كونە قالاعا جىلىنا كەم دەگەندە ون مىڭداعان تۋريست كەلەتىن بولار. سولاردىڭ ارقايسىسى ءبىر كوشەتتەن وتىرعىزسا, ونىڭ نەسى ايىپ؟ قايتا تاريحى تەرەڭ قالانىڭ ماڭايى جاسىل جەلەكپەن كومكەرىلەدى», دەيدى يتاليالىق مەيماندار.
جالپى, وڭىردە اكتسيا اياسىندا 818 شاقىرىم كانال مەن ارىق جۇيەلەرى, 125 مىڭ تۇرعىن ءۇي اۋلاسى, 4,5 مىڭ شاقىرىم كوشە تازالانىپ, 12 مىڭ توننا قوقىس شىعارىلدى. بيىل ەگىلەتىن 195 مىڭ تالدىڭ بۇگىنگە دەيىن 70 مىڭعا جۋىعى وتىرعىزىلىپ, 2,4 مىڭ اعاش بۇتالاندى. 60 تاريحي-مادەني ەسكەرتكىش, 143 ساياباق پەن سكۆەر اۋماقتارى تۇراقتى تۇردە قوقىستان تازارتىلىپ وتىرادى. بۇل جۇمىستارعا 910 بىرلىك تەحنيكا جۇمىلدىرىلعان.
جامبىل وبلىسى
