پەتروپاۆل. 5 مامىر. سولتۇستىك قازاقستان وبلىسى جامبىل اۋداندىق ورمان شارۋاشىلىعىنىڭ ورمانشىسى «ءتىلسىز جاۋمەن» ارپالىسىپ ءجۇرىپ, مەرت بولدى. بۇل تۋرالى تابيعات رەسۋرستارى جانە تابيعاتتى پايدالانۋدى رەتتەۋ باسقارماسىنىڭ باسشىلىعى حابارلادى.
42 جاستاعى عابيت ايناتۋوۆ بلاگوۆەشەنكا اۋىلىنان ارارەك جەردە اسپانعا تىك شانشىلا كوتەرىلگەن قويۋ ءتۇتىندى بايقاي سالىسىمەن جەكە مەنشىك تراكتورىنا وت الدىرعان كۇيى جەدەلدەتىپ اتتانادى. ءورتتىڭ قىزىل ءتىلىن سۋماڭداتىپ, ورماندى القاپقا قاراي جايىلىپ بارا جاتقانىن كورىپ, ارىپتەسى س. قۇسايىنوۆقا تەلەفون سوعىپ, ءتيىستى ورىندارعا حابارلاۋدى وتىنەدى. ءوزى بولسا, قوسىمشا كۇشتىڭ كەلۋىن كۇتپەستەن قىپ-قىزىل وتتىڭ جولىن بوگەپ, اۋىزدىقتاۋعا بىلەك سىبانا كىرىسىپ كەتەدى. جەدەل بريگادا جارتى ساعاتتىڭ ىشىندە جەتكەنىمەن, تراكتور جانىنان اسىل ازاماتتىڭ ءولى مۇردەسىن كەزىكتىرەدى. ءسىرا, تۇتىنگە تۇنشىعىپ, ەسىنەن تانىپ قالسا كەرەك.
«بۇگىندە قازانىڭ سەبەپ-سالدارلارىن انىقتاۋ ماقساتىمەن تەرگەۋ امالدارى جۇرگىزىلۋدە. 3 مامىر كۇنى مارقۇمنىڭ دەنەسى قارا جەر قوينىنا بەرىلدى. ارتىندا كامەلەتكە تولماعان ءۇش بالاسى قالدى», دەيدى باسقارما باسشىسىنىڭ ورىنباسارى اناتولي ۋسولتسەۆ.
ءومىر ەسقالي.
دەرەك, سۋرەت: سولتۇستىك قازاقستان وبلىستىق تابيعات رەسۋرستارى جانە تابيعاتتى پايدالانۋدى رەتتەۋ باسقارماسى.
