«جۇمىسشى ماماندىقتار جىلى» اياسىندا وتەتىن سپارتاكيادادا ەلىمىزدىڭ 20 ءوڭىرىنىڭ كوللەدجدەرىنەن كەلگەن 2 مىڭعا جۋىق ستۋدەنت باق سىنايدى. «تۇركىستان ارەنا» ستاديونىندا وتكەن سپارتاكيادانىڭ اشىلۋ سالتاناتىندا وقۋ-اعارتۋ ءمينيسترى عاني بەيسەمباەۆ پەن تۇركىستان وبلىسىنىڭ اكىمى نۇرالحان كوشەروۆ قۇتتىقتاۋ ءسوز سويلەپ, سپورتشىلارعا ساتتىلىك تىلەدى. «قازىرگى تاڭدا تەحنيكالىق جانە كاسىپتىك ءبىلىم بەرۋ جۇيەسىن ترانسفورماتسيالاۋ باعىتىندا ۇلكەن جۇمىستار جۇرگىزىلىپ جاتىر. 2025 جىلعى 1 قىركۇيەكتەن باستاپ جان باسىنا شاققانداعى قارجىلاندىرۋ كولەمى ەكى ەسەگە وسەدى. بۇل كوللەدجدەردىڭ ماتەريالدىق-تەحنيكالىق بازاسىن جاقسارتۋعا, پەداگوگتاردىڭ بىلىكتىلىگىن ارتتىرۋعا مۇمكىندىك بەرەدى. بۇگىنگى «ەڭبەك كۋبوگى» سپارتاكياداسى سىزدەرگە تەك سپورتتىق جىگەر مەن رۋح بەرىپ قانا قويماي, ەڭبەككە دەگەن جاڭا كوزقاراس قالىپتاستىرادى دەپ سەنەمىن», دەدى عاني بەيسەمباەۆ.
تۇركىستان وبلىسى ءىرى سپورتتىق دودالاردى قابىلداۋعا دايىن ەكەنىن جەتكىزگەن نۇرالحان كوشەروۆ وڭىردە تەحنيكالىق جانە كاسىپتىك ءبىلىم بەرۋ سالاسىندا جاڭا جوسپارلار بارىن اتاپ ءوتتى. «قازىرگى تاڭدا 50 كوللەدجدە 45 مىڭنان استام ستۋدەنت ءبىلىم الۋدا. بيىل كوللەدجدەرگە 15 مىڭنان استام گرانت بولۋدەمىز. وقۋ باعدارلاماسىن نارىق تالابىنا ساي بەيىمدەيمىز. اتالعان باعىتتا جاڭادان 11 جۇمىسشى ماماندىعىنا ليتسەنزيا الىنادى. تۇركىستان – تاريحي وردا! ەل پرەزيدەنتى بۇل قالاعا ەرەكشە مارتەبە بەرىپ, دامۋىنا تۇراقتى كوڭىل بولۋدە. قاسيەتتى شاھاردا رەسپۋبليكالىق سپارتاكيادانىڭ ءوتۋى زاڭدىلىق. سەبەبى تۇركىستان – ەڭبەك ادامدارىمەن ماقتاناتىن ءوڭىر. وبلىستا «وڭىرلىك جۇمىسپەن قامتۋ كارتاسى» بويىنشا 130 مىڭنان استام جاڭا جۇمىس ورنى اشىلادى. ونىڭ 60 پايىزى جۇمىسشى ماماندىقتارعا ارنالعان. ايماقتا جاڭا زاۋىتتار مەن ءوندىرىس ورىندارى اشىلۋدا. جاستاردى شاقىرامىز», دەدى وبلىس اكىمى. سونداي-اق نۇرالحان كوشەروۆ «ەڭبەك كۋبوگى» سپارتاكياداسى ناتيجەسىندە ۇزدىك ستۋدەنتتەرگە قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتى ءبىلىم گرانتىن تاعايىندايتىنىن جەتكىزدى. بىرقاتار جەتەكشى كاسىپورىندار سپارتياكيادا جەڭىمپازدارى ءۇشىن ارنايى سەرتيفيكاتتار تابىستاپ, جۇمىسقا قابىلدايدى.
سپارتاكيادا باعدارلاماسىنا باسكەتبول, شاعىن فۋتبول, فۋتزال, توعىزقۇمالاق, شاحمات, ۇستەل تەننيسى جانە ۆولەيبول سىندى سپورت تۇرلەرى ەنگىزىلگەن.
تۇركىستان
