ىلگەرىدە قىزىلوردا تازالىعى جونىنەن وڭىرلەر اراسىندا كوش سوڭىندا كەلە جاتقان وبلىستىڭ ءبىرى ەدى. ءسال جەل كوتەرىلسە, جينالعان قوقىس كوككە ۇشىپ, اسپاننان قاعاز جاۋعانداي كۇي كەشكەنىمىز ءالى دە ەستە. كوشەدەگى ارىقتار بويىنا قالدىق تاستايتىندار تازالىقپەن اينالىساتىن مەكەمەلەردىڭ تىنىمسىز ەڭبەگىن ەش قىلۋدى ابەس سانامايتىن. اۋداندارداعى احۋالدىڭ وبلىس ورتالىعىنداعى جاعدايدان اسىپ كەتكەنى شامالى ەدى. قازىر سىرتتان كەلگەندەر ەڭ الدىمەن سىرداعى تازالىقتىڭ كوپ ايماقتان كوش ىلگەرى ەكەندىگىن بايقايدى, ايتادى. بۇل وسى باعىتتا جىلدار بويى جۇرگىزىلگەن جۇمىستىڭ ناتيجەسى. ەڭ الدىمەن, تازالىق تەك ءبىر مەكەمەنىڭ جۇمىسى دەپ ۇعىناتىندارمەن كۇرەس جۇرگىزىلدى. ناتيجەسىندە, كولدەنەڭ جاتقان قوقىس كوزگە تۇسپەيتىن بولدى. ايماقتا «ۇلگىلى اۋىل» بايقاۋى ۇيىمداستىرىلىپ, جەڭىمپاز ەلدى مەكەندەرگە ارنايى تەحنيكالار تابىستالدى. سونىڭ ارقاسىندا اۋىل تۇرعىندارى تازالىقپەن قاتار, اينالانى اباتتاندىرۋعا دا ايرىقشا ءمان بەرە باستادى. مەملەكەت باسشىسىنىڭ باستاماسىمەن قولعا الىنعان «تازا قازاقستان» اكتسياسى دا قورشاعان ورتانىڭ قادىرىن سەزىندىرە تۇسكەن جوبا بولدى.
وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ مالىمەتىنشە, بۇگىندە وبلىس ورتالىعىندا تۇرمىستىق قاتتى قالدىقتى سۇرىپتاۋ, قايتا وڭدەۋ, كادەگە جاراتۋ باعىتىندا 3 جوبا ىسكە اسىرىلىپ جاتىر. بۇل جوبالاردىڭ تۇجىرىمداماسى وتكەن جىلدىڭ ماۋسىم ايىندا قازاقستان مەن وڭتۇستىك كورەيا پرەزيدەنتتەرىنىڭ قاتىسۋىمەن وتكەن قازاقستان-كورەيا بيزنەس-فورۋمىندا ناقتىلانعان. فورۋم اياسىندا قىزىلوردا وبلىسىنىڭ اكىمدىگى مەن «With You E&C» كومپانياسى اراسىندا ءوزارا ىنتىماقتاستىق تۋرالى مەموراندۋمعا قول قويىلدى.
مەملەكەت باسشىسىنىڭ ءىرى قالالاردا تۇرمىستىق قاتتى قالدىقتى قايتا وڭدەيتىن زاۋىتتار سالۋ تاپسىرماسىنا سايكەس, وبلىس اۋماعىندا الداعى ەكى جىلدا قۇنى 81 ملن دوللار بولاتىن 9 جوبا جۇزەگە اسىرىلماق. ولار تولىق ىسكە قوسىلعاندا ءوڭىردىڭ بارلىق اۋدانى مەن قىزىلوردا قالاسىندا وڭدەۋ زاۋىتتارى بوي كوتەرەدى.
كەلىسىم ارقاسىندا «With You E&C Kyzylorda» سەرىكتەستىگىنىڭ قولدانىستاعى پوليگوندى جاڭعىرتۋ جوباسى اياسىندا وڭتۇستىككورەيالىق تەحنولوگيا بويىنشا تۇرمىستىق قاتتى قالدىقتى سۇرىپتاۋ, قايتا وڭدەۋ زاۋىتىن سالۋ جوسپارلانىپ وتىر. «Seven Rivers Technologies» جشس نەمىس تەحنولوگياسى بويىنشا جىلدىق قۋاتى 86 مىڭ توننا بولاتىن شىنى ىدىس شىعاراتىن ءوندىرىس ورنىن ىسكە قوسادى. قۇنى 48 ملرد تەڭگە بولاتىن جوباعا قىزىلوردا قالاسىنداعى يندۋستريالىق ايماقتان مەملەكەتتىك قولداۋ شاراسى رەتىندە 38 گەكتار جەر تەلىمى بەرىلىپتى. جەر ۋچاسكەسىنىڭ توپوگرافيالىق كارتاسى جاسالىپ, قۇرىلىستى ەلەكترمەن جابدىقتاۋ جەلىلەرىنە قوسۋعا ۋاقىتشا تەحنيكالىق شارتتار الىندى. كۆارتس قۇمىنىڭ كارەرىن پايدالانۋ قۇقىقتارىن العان ينۆەستور مەن گەولوگيالىق زەرتتەۋلەر جۇرگىزۋگە مامانداندىرىلعان گەولوگيالىق كومپانيا اراسىندا شارتقا قول قويىلدى.
قوسالقى عيماراتتار قۇرىلىسى مامىر ايىندا باستالىپ, نەگىزگى نىسان كەلەسى جىلى سالىنا باستايدى. جىلىنا 220 ملن بوتەلكە شىعاراتىن ءوندىرىستىڭ ءبىر ەرەكشەلىگى – ءونىم وندىرۋدە 60%-عا دەيىن شىنى قالدىقتارىن قولداناتىنى بولىپ تۇر. دەمەك شيكىزاتتى دا الىستان ىزدەمەيمىز, ەل اۋماعىنان جيناقتالعان شىنى قالدىقتارى كادەگە جارايدى.
ءۇشىنشى جوبا اياسىندا پلاستيكالىق شەلەك پەن جەڭىل كونتەينەرلەر ءوندىرىسى ىسكە قوسىلماق. سونىمەن قاتار وبلىس ورتالىعىندا «Rem Plast Invest» سەرىكتەستىگى قايتالاما شيكىزاتتان قاعاز, كارتون قاباتتارىن شىعاراتىن تسەح قۇرىلىسىن باستادى. قالا اكىمدىگى جوبانى جۇزەگە اسىرۋعا شاعىن يندۋستريالىق ايماقتان 2,5 گەكتار جەر تەلىمىن بولگەن كاسىپورىننىڭ قۋاتتىلىعى جىلىنا 5,4 مىڭ توننا بولادى دەگەن جوسپار بار. ينۆەستورلار جوبانىڭ ەكىنشى كەزەڭىندە قاعازدان گيگيەنالىق ونىمدەر ءوندىرىسىن قولعا الماق.
وسىدان ءبىراز بۇرىن مەملەكەتتىك-جەكەمەنشىك ارىپتەستىك اياسىندا اشىلعان قالا سىرتىنداعى پوليگوننىڭ اۋقىمى قازىر ۇلعايىپ كەلەدى. ءۇش جىل بۇرىن پوليگونعا 56 مىڭ, 2023 جىلى 73 مىڭ, بىلتىر 100 مىڭ تونناعا جۋىق قالدىق شىعارىلعان. قالا اكىمدىگى قالدىق تاستالاتىن الاڭدى قالىپقا كەلتىرۋگە قاۋقارى جەتەتىن جوبانى باستاعاندارمەن كەزدەسكەندە, الدىمەن ينجەنەرلىك ينفراقۇرىلىمدى تارتۋ ماسەلەسىن تالقىلادى. ينۆەستوردىڭ الاڭسىز جۇمىس ىستەۋىنە بارلىق جاعداي جاسالدى. بەلكولدەگى قوقىس سۇرىپتاۋ كەشەنى ماڭىنان 4 گەكتار جەر مەملەكەتتىك گرانت رەتىندە ءبولىندى.
جوبانى سۇيەمەلدەيتىن «Kazakh Invest» ۇلتتىق كومپانياسىنىڭ وڭىرلىك ديرەكتورى مۇرات بالاباەۆ بۇل ايماقتاعى ەڭ ءىرى نىسان بولاتىنىن ايتادى. جوبانى «With You E&C», «Shinha Pascal», «Plex Engineering» كومپانيالارىنان قۇرالعان كورەيلىك كونسورتسيۋم قارجىلاندىراتىن بولدى. ءبىرىنشى كەزەڭنىڭ قۇنى 9,5 ملرد تەڭگە زاۋىت جىلىنا 300 مىڭ توننا قالدىقتى قايتا وڭدەي الادى. ءوندىرىس ورنى ىسكە قوسىلعاندا 122 تۇراقتى, قۇرىلىس كەزىندە 100-گە جۋىق ۋاقىتشا جۇمىس ورنى اشىلادى.
«ينۆەستورلار جوبا-سمەتالىق قۇجاتتامانى ازىرلەپ, بىزدەگى ستاندارتتار مەن نورمالارعا بەيىمدەۋ, سىرتقى نارىقتى زەرتتەپ, تەحنيكالىق ساراپتاما جۇرگىزۋ باعىتىندا كەلىسىمشارت جاسادى. قۇرىلىسى بيىل باستالاتىن زاۋىت كەلەر جىلدىڭ شىلدە ايىندا ىسكە قوسىلادى», دەيدى «Kazakh Invest» ۇلتتىق كومپانياسىنىڭ وڭىرلىك ديرەكتورى مۇرات بالاباەۆ.
جوبانىڭ ەكىنشى كەزەڭى اياسىندا قوقىس ورتەۋ زاۋىتىن سالۋ جوسپارلانعان. قالدىقتى ورتەپ قانا قويماي, ودان 6-20 مۆت ەلەكتر ەنەرگياسىن وندىرۋگە مۇمكىندىك بەرەتىن جوبانىڭ قۇنى شامامەن 20,5 ملرد تەڭگە. وسىلايشا, قىزىلوردا قوقىس ماسەلەسىن كەشەندى ءارى ءتيىمدى شەشۋگە كىرىسىپ كەتتى. ايماققا تارتىلعان ينۆەستيتسيا مەن يننوۆاتسيالىق تەحنولوگيالار ەكولوگيالىق مادەنيەتتى دامىتۋمەن قاتار, جاڭا جۇمىس ورىندارىنىڭ اشىلۋىنا سەپ بولادى.
بۇگىندە ايماقتا تۇرمىستىق قاتتى قالدىقتى وڭدەپ, جيناپ, سۇرىپتايتىن 15 كومپانيا جۇمىس ىستەپ تۇر. بىلتىر جينالعان 303 مىڭ توننا تۇرمىستىق قاتتى قالدىقتىڭ 30,1%-ى وڭدەلىپتى.
قىزىلوردا
