ءاليا – قاھارماندىق داستانى

جاس ۇرپاقتىڭ بويىندا پاتريوتتىق رۋح قالىپتاستىرۋ, باتىرلاردىڭ ءومىر جولىن ناسيحاتتاۋ جانە تاريحي جادىنى ساقتاۋ ماقساتىندا وتكىزىلگەن ءىس-شاراعا اقتوبە قالاسىنداعى №21 مامانداندىرىلعان گيمنازيانىڭ وقۋشىلارى قاتىستى.

الياقاتىسۋشىلارعا مۋزەي قىزمەتكەرلەرى ءاليا مولداعۇلوۆانىڭ ءومىرى مەن ەرلىگى جايىندا مالىمەتتەر بەردى.

— ءاليا تۋرالى قىزىقتى مالىمەتتەر ءبىلدىم, باتىردىڭ قاي مەكتەپتە وقىعانى, سوعىسقا قاي جەردەن اتتانعانى, قۇرالايدى كوزگە اتقان مەرگەن بولعانى, ەرلىگى, وتان ءۇشىن جانىن قيعانى — بارلىق مالىمەت وتە اسەرلى بولدى, باتىر اپامىزدىڭ ەرلىگى — بىزگە ۇلگى, — دەيدى اتالعان مەكتەپتىڭ 5-سىنىپ وقۋشىسى حاننا جاسقايرات.

ال 8-سىنىپتا وقيتىن باتىرحان سەيىلحان ءاليا مۋزەيىنە بۇرىن دا بىرنەشە رەت كەلگەنىن, بىراق بۇل جولى مۋزەي ءىشى جاڭارىپ, كەلۋشىلەرگە, اسىرەسە بالالار ءۇشىن قىزىقتى بولا تۇسكەنىن ايتادى.

— ءاليا مۋزەيىنە كەلىپ, وتە ەرەكشە اسەر الدىق, كوپتەگەن جاڭا اقپاراتپەن تانىستىق. مۋزەيدىڭ ەكسپوزيتسيا زالىندا زاماناۋي تەحنولوگيالاردى قولدانۋ ارقىلى جاسالعان جوبالارى وتە اسەرلى, اسىرەسە ءاليانىڭ تۋعان جەرىنە, سوعىستاعى ەرلىگىنە قاتىستى ەكسپوزيالاردى كورگەندە قيالىڭمەن سول كەزەڭدەرگە بارىپ كەلگەندەي بولاسىڭ, — دەيدى ول.

وقۋشىلاردى الىپ كەلگەن مەكتەپ ديرەكتورىنىڭ تاربيە ءىسى جونىندەگى ورىنباسارى گۇلدانا كولەنكينا بۇل ءىس-شارا مەكتەپ وقۋشىلارى ءۇشىن تاربيە ساعاتىنىڭ ءبىر بولىگى بولعانىن ايتادى.

— مەكتەبىمىزدە جەڭىستىڭ — 80, ءاليا مولداعۇلوۆانىڭ 100 جىلدىعىنا وراي «ەرلىك ساباقتارى» تاقىرىبىندا تاربيە ساعاتتارى, سىنىپتان تىس ءىس-شارالار تۇراقتى ۇيىمداستىرىلىپ كەلەدى. وسى تاربيە جۇمىستارى اياسىندا وقۋشىلار ءاليا مۋزەيىنە كەلىپ, باتىردىڭ ءومىرى مەن ەرلىگى تۋرالى اقپاراتتارمەن تانىسىپ جاتىر. وتكەن سەنبىدە مۋزەيگە 2 «ب» سىنىبى وقۋشىلارى كەلىپ, ءاليانىڭ تۋىستارىمەن كەزدەستى. مەكتەبىمىزدىڭ 2-سىنىپ وقۋشىسى قايسار قۇدايبەرگەن ء«اليانىڭ اتىن شىعارعان تۇلعالار» اتتى عىلىمي جوبا ازىرلەپ, عىلىمي جوبالار بايقاۋىنا قاتىستى, — دەيدى ول.

مۋزەي ديرەكتورى جانار ماقسۇتوۆا جوندەۋ جۇرگىزىلىپ, زاماناۋي تەحنولوگيامەن جابدىقتالعان مۋزەيگە كەلۋشىلەر قاتارى 2-3 ەسە كوبەيگەنىن ايتادى.

— اسىرەسە وقۋشىلار, بالالار بەلسەندىلىك تانىتۋدا. قالا تۇرعىندارى, شاھارىمىزدىڭ قوناقتارى دا كۇن قۇرعاتپاي كەلىپ جاتىر. مۋزەي زالىنىڭ ەكسپوزيتسياسىندا قويىلعان AR-تەحنولوگيا, VR (ۆيار) كوزىلدىرىكتى مۋلتيمەديالىق تەحنولوگيا, «ۆيزۋاليزاتسيا», تسيفرلىق ستوريتەللينگ, 3D-mapping, ءاليانىڭ حات جازىپ وتىرعان گولوگرامماسى, «3D انيماتسيا» گولوگرافياسىنداعى ۆيرتۋالدى پروموۋتەر, 3D فورماتتاعى رەلەفتى كارتا, ۆيرتۋالدى تۋر, باعدارلامالىق-ينتەراكتيۆتى سەنسورلىق كيوسك كەلۋشىلەرگە ەرەكشە اسەر ەتەتىنى ايقىن, — دەيدى ول.

ءىس-شارا بارىسىندا وقۋشىلارعا ءاليا مولداعۇلوۆا تۋرالى دەرەكتى فيلم كورسەتىلدى.