كەزەكتى كەزدەسۋ گەرمانيا استاناسىندا قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى رومان ۆاسيلەنكونىڭ جانە گەرمانيا فەدەرالدىق ۇكىمەتىنىڭ قونىس اۋدارۋشىلار جانە ۇلتتىق ازشىلىقتار ىستەرى جونىندەگى ۋاكىلى, گەرمانيا بۋندەستاگىنىڭ دەپۋتاتى ناتالي پاۆليكتىڭ توراعالىعىمەن ءوتتى.
ۇاك وتىرىسىنىڭ كۇن تارتىبىنە ءبىلىم بەرۋ, نەمىس ءتىلىن قولداۋ, مادەنيەت, عىلىم, جاستار ساياساتى, مۇراعات ءىسى سياقتى سالالارىنداعى ىنتىماقتاستىق, سونداي-اق ىسكەرلىك بايلانىستاردى دامىتۋ جانە ۆيزا رەجيمىن جەڭىلدەتۋ ماسەلەلەرى ەنگىزىلدى.
كەلىسسوزدەر بارىسىندا قازاقستاندىق نەمىستەردىڭ ۇلتتىق بىرەگەيلىگىن قولداۋعا باعىتتالعان بىرلەسكەن جوبالاردى ىسكە اسىرۋعا ەرەكشە نازار اۋدارىلدى.
تاراپتار 2024 جىلى ەۋرازيا ۇلتتىق ۋنيۆەرسيتەتىندە نەمىس ءتىلى مەن مادەنيەتى ورتالىعىنىڭ جانە الماتى ەنەرگەتيكا جانە بايلانىس ۋنيۆەرسيتەتىندە انحالت قولدانبالى عىلىمدار ۋنيۆەرسيتەتى فيليالىنىڭ اشىلۋىن قۇپتادى. سونداي-اق, استاناداعى قازاق-نەمىس ورتالىعىنىڭ, الماتىداعى قازاق-نەمىس ۋنيۆەرسيتەتىنىڭ, اقتاۋداعى قازاق-نەمىس تۇراقتى ينجەنەريا ينستيتۋتىنىڭ, رەسپۋبليكالىق اكادەميالىق نەمىس دراما تەاترىنىڭ جانە باسقا دا قۇرىلىمداردىڭ ەكى ەل اراسىنداعى ىنتىماقتاستىقتى دامىتۋعا قوسقان ماڭىزدى ۇلەسىن اتاپ ءوتتى.
ءمينيسترىڭ ورىنباسارى ءوز سوزىندە: «قازاق جەرى ءداستۇرلى تۇردە باتىس پەن شىعىستى بايلانىستىراتىن كوپىر. ال قازاقستانداعى نەمىس دياسپوراسى مەن گەرمانياداعى بۇرىنعى وتانداستارىمىز قازاقستان مەن گەرمانيا اراسىنداعى «جاندى كوپىر» عانا ەمەس, سونىمەن قاتار ەكىجاقتى قارىم-قاتىناستاردىڭ بولاشاعىنا بەرىك نەگىز», دەپ اتاپ ءوتتى.
ول سونداي-اق ءارتۇرلى ۇلت وكىلدەرىنىڭ ورتاق الەۋمەتتىك-مادەني كەڭىستىكتە بەيبىت قاتار ءومىر ءسۇرۋى ءۇشىن قولايلى جاعداي جاساۋ قازاقستان ۇكىمەتىنىڭ باستى مىندەتتەرىنىڭ ءبىرى ەكەنىن ايتتى. بۇل رەتتە بيىل قۇرىلعانىنا 30 جىل تولاتىن قازاقستان حالقى اسسامبلەياسى ەرەكشە ءرول اتقاراتىنى اتالىپ ءوتتى.
ءوز كەزەگىندە, بۋندەستاگ دەپۋتاتى گەرمانيا ۇكىمەتى قازاقستاندا تۇراتىن ەتنيكالىق نەمىستەردى جان-جاقتى قولداۋدى جالعاستىراتىنىن راستادى. «قازاقستان مەن گەرمانيا اراسىنداعى ىنتىماقتاستىقتىڭ قارقىندى دامۋىن, سونىڭ ىشىندە قازاقستانداعى ەتنيكالىق نەمىستەرگە كورسەتىلىپ وتىرعان قولداۋدى جانە ولاردىڭ ەكىجاقتى قاتىناستاردى ودان ءارى تەرەڭدەتۋدە ماڭىزدى ءرولىن تاعى دا اتاپ وتكىم كەلەدى», - دەدى ن.پاۆليك.
تاراپتار قازاقستانداعى ەتنيكالىق نەمىستەردى كەشەندى قولداۋ جونىندەگى شارالاردى جوسپارلى تۇردە جۇزەگە اسىرۋدى جالعاستىرۋعا كەلىستى جانە بۇل مىندەتتەر كەزدەسۋدىڭ قورىتىندىسى بويىنشا قول قويىلعان كومميۋنيكەدە بەكىتىلدى.
سونىمەن قاتار, بەرلينگە ساپارى اياسىندا ر.ۆاسيلەنكو گەرمانيا بۋندەستاگىنىڭ دەپۋتاتى شتەفان روۋەنحوففپەن جانە گەرمانيا سىرتقى ىستەر مينيسترلىگىنىڭ ورتالىق ازيا, شىعىس ەۋروپا جانە كاۆكاز ەلدەرى جونىندەگى ۋاكىلى كونراد ارتس فون شتراۋسسەنبۋرگپەن كەزدەستى. كەزدەسۋلەر بارىسىندا تاراپتار ەكىجاقتى ىنتىماقتاستىقتىڭ قازىرگى جاي-كۇيى مەن ودان ءارى دامۋىنىڭ كەلەشەگىن تالقىلاپ, جاھاندىق جانە وڭىرلىك كۇن ءتارتىبى بويىنشا پىكىر الماستى.
قازاقستان رەسپۋبليكاسىندا تۇراتىن ەتنيكالىق نەمىستەر ماسەلەلەرى جونىندەگى ۇكىمەتارالىق كوميسسيا قازاقستان رەسپۋبليكاسى ۇكىمەتى مەن گەرمانيا فەدەراتيۆتىك رەسپۋبليكاسى ۇكىمەتى اراسىنداعى قازاقستان رەسپۋبليكاسى ازاماتتارىنىڭ نەمىس ۇلتىن قولداۋ جونىندەگى ىنتىماقتاستىق تۋرالى 1996 جىلعى 31 مامىردا الماتى قالاسىندا قول قويىلعان كەلىسىمگە سايكەس قۇرىلعان.
ستاتيستيكالىق دەرەكتەرگە سايكەس, قازاقستاندا 226 مىڭ ەتنيكالىق نەمىس, ال گەرمانيادا قازاقستاننان قونىس اۋدارعان شامامەن 1 ميلليون نەمىس تۇرادى.
