فوتو: depositphotos.com
وبلىستىق سوتتىڭ مالىمەتىنشە, 2023 جىلعى 18 قازاندا ش. «ب» بالاباقشاسىنا تاربيەشى بولىپ جۇمىسقا قابىلدانعان.
وقيعا كەزىندە بالالار اكۆارەلمەن سۋرەت سالىپ جاتقان. سول ساتتە تاربيەشى 2022 جىلى 12 تامىزدا تۋعان تاربيەلەنۋشى م-نىڭ بوياۋدى اۋزىنا سالىپ جاتقانىن بايقاپ, ەسكەرتۋ جاساپ, بالانىڭ ەرنىن قولىمەن ۇرعان. كەيىننەن ونى جەلكەسىنەن ۇرىپ, ورنىنان تۇرعىزىپ, جۋىناتىن بولمەگە جەتەكتەمەك بولعان. سول كەزدە بالانى جەلكەسىنەن ۇستاپ, العا يتەرىپ جىبەرىپ, قۇلاتىپ العان. كەيىن ونى قولىنان تارتىپ تۇرعىزىپ, بولمەگە الىپ كەتكەن.
سوت وتىرىسىندا ش. ءوز كىناسىن مويىنداماعان. ول بالانى تەك قاتتى كوتەرگەنىن, بىراق ۇرماعانىن ايتقان. الايدا سوتتا قارالعان بەينەباقىلاۋ جازبالارى مەن وزگە دە دالەلدەر تاربيەشىنىڭ كىناسىن تولىقتاي دالەلدەگەن.
«سوت ۇكىمىمەن ش. قك-نىڭ 140 بابىنىڭ 2-بولىگىمەن كىنالى دەپ تانىلىپ, وعان پەداگوگيكالىق لاۋازىمداردى جانە كامەلەتكە تولماعاندارمەن جۇمىس ىستەۋمەن بايلانىستى لاۋازىمداردى اتقارۋعا 3 جىلعا تىيىم سالۋمەن قوسا, 80 ساعاتقا قوعامدىق جۇمىستارعا تارتۋ جازاسى تاعايىندالدى. سونىمەن قاتار, كامەلەتكە تولماعان جابىرلەنۋشىنىڭ زاڭدى وكىلىنىڭ پايداسىنا كەلتىرىلگەن مورالدىق زيان ءۇشىن 200 000 تەڭگە ءوندىرىلدى», دەلىنگەن حابارلامادا.
سوت ۇكىمى ءالى زاڭدى كۇشىنە ەنگەن جوق.
