ءجۇزىن جالت بەرىپ كەرى بۇراتىن ءفاني جالعاننان ءوزى وتسە دە, ونىڭ ءۇنى قۇلاعىمىزدا قالىپ قويعانىن نەسىنە جاسىرامىز؟ قۇلاقتىڭ قۇرىشىن قاندىراتىن سول ءبىر ءمولدىر داۋىستى ءالى كۇنگە دەيىن ساعىناتىنىمىز, اندەرىن قايىرا تىڭداعاندا قۋ مەديەن دالادا جالعىز قالعان شاعالاداي شارق ۇراتىنىمىز تاعى بار. وندايدا توڭىرەك تۇگەل التىندانىپ كەتكەندىكتەن بە, ايتەۋىر مەزگىل مەن اننەن ۇيلەسىم ىزدەي جونەلەمىز... سول ۇيلەسىمدى ساناۋلى شىعارمادان عانا تابامىز.
ول جىلداردىڭ وزىنە عانا ءتان رومانتيكاسى مەن تالعامى بار ەدى. قايدا جۇرسەك تە سول ەسكى اندەر شىرقالىپ جاتاتىن. شلياگەرگە اينالعان شىعارمالار تىڭدارمان جادىنان ەشقاشان وشپەيتىنى دە اقيقات قوي. ويتكەنى ءتاۋىر دۇنيەنىڭ عۇمىرى قاشاندا ۇزاق بولادى ەمەس پە. ايماڭداي ءانشى ءمادينا ەراليەۆا شىرقاۋ شەگىنە جەتكىزە شىرقاعان «كۇرەڭ كۇز» ءانى ءالى كۇنگە دەيىن ەسكىرگەن جوق. تۇلا بويىڭدى وتكەن شاقتىڭ ەلەسى كەزگەن كەزدە ايگىلى ءاندى قايتا تىڭداپ, ءبىر جاساپ قالامىز.
«كۇپ-كۇرەڭ مەنىڭ رەڭىم
قوش ەندى, قوش بول, كۇرەڭ كۇن.
جاز كەلەر جانە جاپ-جاسىل,
قوش ەندى, قوش بول, كۇرەڭ كۇز», دەپ باستالاتىن نوستالگياعا اينالعان ادەمى ءاننىڭ ءماتىنى كىسى بالاسىن ويلاندىرماي, تولعاندىرماي قويمايتىنى انىق قوي.
ساعىمعا اينالعان سول ءبىر جىلداردا قازاقتىڭ اقيىق اقىنى مۇقاعالي ماقاتاەۆتىڭ سوزىنە جازىلعان عاجاپ تۋىندىنى جۇرەگىمىزبەن جىلى قابىلداپ, تەبىرەنىپ تىڭداساق تا, استارىنا اسا ءبىر قاتتى ءمان بەرمەگەن سەكىلدىمىز. «قوش ەندى, قوش بول, كۇرەڭ كۇن», دەپ باستالاتىن تارماقتىڭ سالماعى سونشالىقتى اۋىر ەكەنىن ول كەزدە قايدان بىلەيىك. ەندى عوي, ءتۇيسىنىپ جۇرگەنىمىز.
گۇلنار داۋكەنوۆا ءانىن جازعان عالامات شىعارمانىڭ تاريحى تراگەديامەن تامىر جالعاپ جاتقانىن شيرەك عاسىر ۋاقىت بۇرىن ەشكىم سەزبەگەن دە, بىلمەگەن دە شىعار. دەرەككە سەنسەك, بۇل شىعارما كومپوزيتوردىڭ ارىپتەسى جاستاي باقيعا بەت تۇزەگەن شاقتا تۋعان كورىنەدى. جانعا جارا سالعان مەزەتتە جازىلعان ءاننىڭ استارى تۇڭعيىققا باتىراتىنى داۋسىز. ءبىر سوزبەن ايتقاندا, اۋەنىمەن دە, اۋەزىمەن دە جان تەربەيتىن تۋىندى قوشتاسۋ ءانى سەكىلدى.
«قوش ەندى, قوش بول, كۇرەڭ كۇز,
كۇرەڭ مۇڭ ساعان جىبەردىم.
كۇلەرمىن دەپ ەم تۇنەردىم,
بىلەرمىن, قالاي بىلەرمىن», دەپ باستالاتىن ءاننىڭ قايىرماسى دا تىڭدارمان جۇرەگىنە اۋىر جۇك تۇسىرەتىنى راس. تايتالاس پەن قايشىلىققا تولى ءانشى تاعدىرىندا ەزۋگە كۇلكى ۇيىرەتىن ساتتەن گورى, قاراشىعىنا مۇڭ ۇيالاتاتىن كەزدەر از بولماعانى اقيقات قوي. اننەن جانىنىڭ كۇيزەلىسكە, سەنىمى مەن سەزىمىنىڭ سەرگەلدەڭگە تۇسكەنىن اڭعارۋ دا قيىن ەمەس.
«كۇرەڭ كۇز» ءانىن ءمادينا ەراليەۆانىڭ ورىنداۋىندا تىڭداعان سايىن ءوزىمىزدىڭ دە جانىمىز مۇڭ قۇرساۋىندا قالىپ قوياتىنى نەسى ەكەن؟ ساعىمعا اينالعان ساعىنىشتاي بولعان ءانشىنىڭ بەينەسىن, ءۇنىن ساعىنعاندىقتان شىعار, بالكىم. ايتەۋىر, ىشكە تۇسكەن ءبىر سەزىم شوعى ادام جانىن جاي تاپتىرمايتىنى انىق.
تىڭداعان سايىن جانىڭدى قوڭىر مۇڭنىڭ ىڭىرىنە تارتا تۇسەتىن «كۇرەڭ كۇز» ءانى ەسترادا كوگىندە جۇلدىزى جارقىراعان ءمادينا ەراليەۆانىڭ دا جارىق جالعانمەن قوشتاسۋ انىنە اينالعانداي كورىنەتىنى راس. وسى ءان ارقىلى ول ء«وزىمدى دە, ونەرىمدى دە ۇمىتپاڭدار» دەگەندى تۇسپالداپ ايتىپ كەتكەن بە دەرسىڭ...
«قوش ەندى, قوش بول, كۇرەڭ كۇز,
اق قىستى تەزدەپ جىبەرگىز.
اق قىستاي اپپاق ءبىر ەلمىز,
شيرىعىپ ءبىراز جۇرەرمىز,
قوش ەندى, قوش بول, كۇرەڭ كۇز,
شىنىعىپ ءومىر سۇرەرمىز», دەگەن تارماق جۇرت جادىنان ەش ۋاقىتتا وشپەيتىنى انىق. «شيرىعىپ ءبىراز جۇرەرمىز» دەگەن ءان الەمىنىڭ اق بايانىنىڭ دا باقيلىق بولعانىنا ءبىراز جىلدىڭ ءجۇزى تولدى.
ۋاقىتتان اسقان جۇيرىكتىڭ جوق ەكەنى راس-اۋ. زىمىرانداي زۋلاعان جىلدار كوشىن كەرى بۇرا الماعانىمىزبەن, ساعىنىش سازىنا اينالعان تاڭداۋلى تۋىندىلار ءالى كۇنگە دەيىن جۇرەگىمىزدى, جانىمىزدى جىلىتىپ تۇرعانى ايداي اقيقات. شىن ونەردىڭ ءبىر قۇدىرەتى دەگەنىمىز دە وسى ەمەس پە؟
