«UBC Group» باسشىلىعى 2023 جىلى وندىرىستىك الاڭدارىن قازاقستاندا ورنالاستىرۋ تۋرالى شەشىم قابىلداپ, جاڭا زاۋىت سالۋ ءۇشىن بىرقاتار ءوڭىر اراسىنان تۇركىستان وبلىسىن تاڭداعان. جوباعا سايكەس, ءبىر شاڭىراق استىندا وندىرىستىك تسەحتار, قويمالار, اكىمشىلىك جانە كەڭسە عيماراتتارى ورنالاساتىن زاماناۋي كاسىپورىن بوي كوتەرەدى. جوباعا سالىناتىن ينۆەستيتسيا كولەمى 30 ملن ەۋروعا دەيىن جەتپەك. «UBC Group» پرەزيدەنتى يگور گۋمەننىيدىڭ ايتۋىنشا, كومپانيا – توڭازىتقىش جابدىقتارىن ءوندىرۋ سالاسىندا جۇمىس ىستەيتىن جانە دامىپ كەلە جاتقان ۋكراينانىڭ ەڭ ءىرى ونەركاسىپتىك حولدينگتەرىنىڭ ءبىرى. تۇتىنۋشىلارى – الەمنىڭ تۇكپىر-تۇكپىرىندەگى تانىمال برەندتەر مەن ءىرى كورپوراتسيالار.
«قولداۋ كورسەتكەن وبلىس اكىمدىگىنە العىس ايتامىز. توڭازىتقىشتار ءوندىرىسى جوباسىنىڭ ءساتتى جۇزەگە اساتىنىنا سەنىمدىمىن. «UBC Group» سۋسىندار مەن ازىق-ت ۇلىككە ارنالعان توڭازىتقىش جابدىقتارىن ءوندىرۋ, جارنامالىق ماتەريالداردى ازىرلەۋ جانە ءوندىرۋ, جابدىقتار مەن تەحنيكالىق ۇدەرىستەردى جوبالاۋ جانە مونتاجداۋ, توڭازىتقىش جابدىقتارىن جاڭارتۋ جانە قىزمەت كورسەتۋ, تاۋار مەن قىزمەتتى ساتۋ سياقتى بىرنەشە باعىت نەگىزىندە جۇمىس ىستەيدى», دەدى يگور گۋمەننىي.
تۇركىستان وبلىسىنىڭ اكىمى نۇرالحان كوشەروۆتىڭ سوزىنشە, باستاما تىكەلەي مەملەكەت باسشىسىنىڭ قولداۋىمەن جۇزەگە اسىپ جاتىر.
«مۇنداي زاماناۋي ءوندىرىس ورنىن اشۋ – وبلىس ءۇشىن ماڭىزدى ەكونوميكالىق قادام عانا ەمەس, سونىمەن قاتار ءوڭىردىڭ يننوۆاتسيا جانە زاماناۋي تەحنولوگياعا دايىن ەكەنىنىڭ كورسەتكىشى. كاسىپورىن جاڭا جۇمىس ورىندارىن قۇرۋعا, وڭىرگە قوسىمشا ينۆەستيتسيا تارتۋعا مۇمكىندىك بەرمەك. باستاما – شەتەلدەرمەن ىنتىماقتاستىقتىڭ جارقىن كورىنىسى. ءبىز جاڭا جوبالارعا, جاڭا ينۆەستورلارعا قولداۋ كورسەتۋگە دايىنبىز», دەدى نۇرالحان ورالباي ۇلى.
ءوندىرىس ورنىنىڭ اشىلۋ راسىمىنەن كەيىن قوناقتارعا زاۋىت اۋماعىنا ەكسكۋرسيا ۇيىمداستىرىلدى. سونداي-اق تۇركىستاندا 100-دەن اسا وتاندىق جانە شەت مەملەكەتتىڭ بيزنەس وكىلدەرىنىڭ قاتىسۋىمەن بيزنەس-فورۋم ءوتتى. حالىقارالىق فورۋمعا قاتىسۋشىلار قاتارىندا ۋكراينا, تۇركيا, گرۋزيا, قىتاي, ازەربايجان, وزبەكستان جانە ەلىمىزدىڭ ءىرى كومپانيا يەلەرى مەن وكىلدەرى بار. ايماقتىڭ ينۆەستيتسيالىق-ەكونوميكالىق الەۋەتى كەڭىنەن تانىستىرىلعان فورۋمدا وبلىس اكىمى جيىنعا قاتىسۋشىلاردى بىرلەسە جۇمىس ىستەۋگە شاقىردى.
«باتىس پەن شىعىس اراسىنداعى ساۋدا قاتىناستارى, ءتيىمدى گەوگرافيالىق ورنالاسۋى جانە كوپتەگەن تاريحي نىسانى تۇركىستاندى ورتالىق ازياداعى ينۆەستيتسيا مەن ءتۋريزمنىڭ ورتالىعىنا اينالدىرۋعا زور مۇمكىندىك بەرەدى. قازىر ءوڭىردىڭ ينۆەستيتسيالىق قورجىنىندا 2025–2028 جىلدارعا جوسپارلانعان 110 ينۆەستيتسيالىق جوبا بار. بۇل جوبالار 4,6 ملرد دوللارعا دەيىن ينۆەستيتسيا تارتۋعا, 19 مىڭنان استام جاڭا جۇمىس ورنىن قۇرۋعا جول اشادى. سونداي-اق وڭىردە «Turan» ارنايى ەكونوميكالىق ايماعى جانە ينۆەستيتسيالىق الاڭدار بار», دەدى وبلىس اكىمى.
«تۇركىستان ينۆەست» كومپانياسىنىڭ باسقارما توراعاسى ومىرزاق يۋسۋپوۆ ءوڭىردىڭ ينۆەستيتسيالىق الەۋەتىن تانىستىرىپ, ۇسىنىلاتىن مۇمكىندىكتەر تۋرالى باياندادى. فورۋمعا قاتىسۋشىلار پىكىر الماسىپ, شەت مەملەكەتتەردەن كەلگەن ينۆەستورلار بىرلەسە جۇمىس ىستەۋگە نيەت ءبىلدىردى.
وبلىستا 210 مىڭنان استام شاعىن جانە ورتا بيزنەس وكىلى, ونىڭ ىشىندە 160-تان استام كومپانيا شەتەلدىك ينۆەستورلاردىڭ قاتىسۋىمەن جۇمىس ىستەيدى. 80 مىڭنان استامى – شارۋاشىلىق جانە فەرمەرلىك قوجالىق. كەيىنگى 6 جىلدا ۇكىمەت پەن وبلىس اكىمىنىڭ قولداۋى ناتيجەسىندە شامامەن
9 ملرد دوللار كولەمىندە ينۆەستيتسيا تارتىلدى. ونىڭ ىشىندە 63%-ى – جەكە ينۆەستيتسيا. ينۆەستيتسيا ونەركاسىپ, جىلجىمايتىن مۇلىك, اۋىل شارۋاشىلىعى, تۋريزم جانە جاڭارتىلاتىن ەنەرگيا كوزدەرى سياقتى سالالارعا باعىتتالدى.
تۇركىستان وبلىسى
