ۇبت-دا شەكتى بالدى 75,5%-عا جۋىق تالاپكەر جينادى. ورتاشا بالعا كەلەتىن بولساق, ول 69 بالدى (5 پاننەن) قۇرادى. ەڭ جوعارى بالل – 140, ونى الماتى وبلىسىنىڭ تالاپكەرى جينادى.
تەستكە قاتىسۋشىلاردىڭ باسىم بولىگى «بيولوگيا-حيميا» كومبيناتسيالارىن تاڭداعان, اتاپ ايتقاندا, 17,3%-ى تاپسىردى. «ماتەماتيكا-فيزيكا» پاندەرىن 17,1% تاڭداعان. سونداي-اق, توپ-3 قاتارىنا تالاپكەرلەردىڭ 10,5% تاڭداعان «ماتەماتيكا-ينفورماتيكا» كومبيناتسياسى كىردى. ەڭ از تاڭدالعان كومبيناتسيا – «حيميا-فيزيكا», ونى 171 ادام تاپسىرعان.
2025 جىلعى ناۋرىز ۇبت-سىنىڭ قورىتىندىسى بويىنشا مەكتەپ تۇلەكتەرى «وقۋ ساۋاتتىلىعى» ءپانىن جوعارى دەڭگەيدە تاپسىردى. ورتاشا ەسەپپەن, سۇراقتاردىڭ 77,9%-ىنا دۇرىس جاۋاپ بەرىلگەن.
ەرەكشە ءبىلىم بەرۋ قاجەتتىلىكتەرى بار وقۋعا تۇسۋشىلەر ءۇشىن قولايلى جاعداي جاساۋدىڭ ارقاسىندا ناۋرىز ۇبت-سىنا 386 تالاپكەر قاتىسقانىن ايتا كەتكەن ءجون.
ۇبت وتكىزۋ بارىسىندا 235 ەرەجە بۇزۋشىلىق انىقتالعان. عىلىم جانە جوعارى ءبىلىم مينيسترلىگىنىڭ مالىمدەۋىنشە, 85 تالاپكەر سمارتفون جانە شپارگالكا سياقتى تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى, تەستىلەۋ كەزىندە ەرەجەلەردى بۇزعانى ءۇشىن اۋديتوريادان 95 ادام شىعارىلدى, ال 55 ادامنىڭ سەرتيفيكاتى تەستىلەۋ بەينەجازباسىن تەكسەرۋ ناتيجەسىندە جويىلعان.
