قازاقستان حالقى اسسامبلەياسىنىڭ 30 جىلدىعىنا وراي وتكىزىلگەن قازاقتىڭ ۇلتتىق ويىنى كوكپاردىڭ جالپى جۇلدە قورى – 4,5 ملن تەڭگە. تۇركىستان وبلىستىق قوعامدىق دامۋ باسقارماسى «قوعامدىق كەلىسىم» كمم-ءنىڭ قولداۋىمەن ۇيىمداستىرىلعان ءىس-شاراعا ەلىمىزدىڭ بىرقاتار ءوڭىرى مەن گەرمانيا, رەسەي, قىتايدان كەلگەن قوناقتار, سونداي-اق وبلىستىڭ بارلىق اۋدان, قالالارىنان اتبەگىلەر مەن شاباندوزدار, ارداگەر سپورتشىلار, جەرگىلىكتى تۇرعىندار قاتىستى. كوكپاردا اس بەرىلىپ, كيىز ۇيلەر تىگىلىپ, پاتريوتتىق اندەر شىرقالدى.
شاردارا اۋدانىنىڭ تۋماسى, ۇلتتىق سپورتتىڭ جاناشىرى, جەكە كاسىپكەر ۆيكتور دەرەۆيانكو ەلىمىزدىڭ تۇتاستىعى مەن بىرلىگىن, تاتۋلىعى مەن تىنىشتىعىن نىعايتۋ ءاربىر ازاماتتىڭ مىندەتى ەكەنىن اتاپ ءوتتى. «بيىل قوعامداعى دوستىق پەن بىرلىكتى نىعايتۋعا ولشەۋسىز ۇلەس قوسىپ وتىرعان قازاقستان حالقى اسسامبلەياسىنىڭ 30 جىلدىعى كەڭ كولەمدە اتالىپ ءوتىلىپ جاتىر. مەرەيلى جىلعا وراي وسى ەلدىڭ ازاماتى رەتىندە ءوز ۇلەسىمدى قوسايىن دەگەن نيەتپەن كوكپار وتكىزۋدى ماقسات ەتتىم. كوكپار – قازاقتىڭ ءتول سپورتى ءارى رۋحى مىقتى جىگىتتەردىڭ ويىنى. پىراقتىڭ ۇستىندە وسكەن ازامات ەلشىل, حالىقشىل كەلەدى دەپ ويلايمىن. سوندىقتان دا, بۇل ۇلتتىق سپورتتى ناسيحاتتاۋدى الداعى ۋاقىتتا دا جالعاستىرماق نيەتتەمىن», دەدى ۆيكتور دەرەۆيانكو.
سپورت سايىسىنىڭ قورىتىندىسىندا ۇزدىك شاباندوزدار قارجىلاي سىيلىقتارمەن ماراپاتتالدى. بۇل ورايدا, كەلەستىك عالىمجان مىرزاباەۆ پەن قازىعۇرتتىق بايدىبەك سابىروۆ ۇزدىك اتانىپ, ولارعا 500 مىڭ تەڭگە سىياقى تابىستالدى. باسقا دا شاباندوزدارعا قوماقتى سىيلىقتار بەرىلدى. ءدۇبىرلى دودا سوڭىندا قاريالار جاستارعا باتا بەرىپ, ەلىمىزدىڭ ىرىس-نەسىبەسى مولايىپ, حالقىمىزدىڭ بەرەكە-بىرلىگى ارتا بەرسىن دەگەن ىزگى تىلەكتەرىن جەتكىزدى.
تۇركىستان وبلىسى
