اۋىل ورتاسىنان كورشى ەلدىڭ «وڭتۇستىك – ورال» تەمىرجولى ءوتىپ جاتىر. بۇل جەردە رەسەيلىك پويىزدار توقتاماي وتە شىعادى. 2000 جىلداردىڭ باسىندا شەكارانى دەماركاتسيالاۋ كەزىندە ەكىجاقتى كەلىسىممەن تەمىرجولدى سول كۇيى قالدىرعان. اۋىلداعى «ايتەكە بي – سويۋزنايا» جەڭىلدەتىلگەن وتكىزۋ بەكەتىنەن ورىنبور وبلىسىنىڭ دومباروۆكا ەلدى مەكەنى مەن ياسنىي قالاسىنا كىدىرىسسىز وتۋگە بولادى. ايتەكە بي اۋدانى ديقاندارى وسى جەردەن رەسەيگە استىق وتكىزەدى. دومباروۆكا اۋدانىنىڭ شارۋالارى كۇزدە كوكونىس پەن ءداندى داقىلدارىن بەرى قاراي ساۋدالايدى. اۋىلى ارالاس, قويى قورالاس دەپ وسىنى ايتۋعا بولادى.
ۇشقاتتى اۋىلدىق وكرۋگىن 2010 جىلدان بەرى وسى جەردىڭ تۋماسى گۇلنارا الدابەرگەنوۆا باسقارادى. 1996 جىلى ور قالاسىنداعى پەداگوگيكالىق ينستيتۋتتى ءبىتىرىپ كەلىپ, ەڭبەك جولىن مۇعالىمدىكتەن باستادى. الاڭسىز ەڭبەك ەتىپ جۇرگەندە ادامى كوشىپ, ۇيلەرى توزىپ, بارشا يگىلىكتەن قۇر قالىپ جاتقان اۋىلدى كوتەرۋگە ۇسىنىس تۇسكەندە باس تارتا المادى. بيۋدجەتى جوق اۋىلدى باسقارۋ وڭاي ەمەس. اكىمى اركىمگە جالىنىشتى بولادى. سوعان قاراماستان, ۋاقىت وتە كەلە تاجىريبە جينادى. العاشقى قيىندىق اۋىزسۋ جەتىسپەۋشىلىگىنەن باستالدى. جەراستى سۋىن الاتىن ۇڭعى اۋىلدان 18 شاقىرىم جەردە بولاتىن. جارامسىز قوندىرعى, توزعان موتور, ەسكىرگەن قۇبىردان سۋ ۇيلەرگە سىزدىقتاپ قانا جەتىپ تۇردى. قوندىرعىنى جاڭارتۋ تۋرالى وتىنىشپەن كوپ مەكەمەنىڭ ەسىگىن قاقتى, جوبالاۋ-سمەتالىق قۇجاتىن ازىرلەدى, مەردىگەر جۇمىسىن ءجىتى قاداعالادى. باقىلاۋ قاتاڭ بولعان جەردە ءىس جەدەل ءارى ساپالى اياقتالادى. قازىرگى كەزدە اۋىزسۋدان شاعىم جوق. گۇلنارا تۇيتكىلدى ماسەلەنىڭ شەشىلۋ جولىن تەز تابا بىلەدى.
تۇرعىنداردىڭ تاعى ءبىر ءوتىنىشى كوكتەم مەن كۇزدە ميباتپاققا اينالاتىن جولدى رەتكە كەلتىرۋ ەدى. ءتيىستى مەكەمەلەرگە ارىزدانا ءجۇرىپ, ءماسليحات دەپۋتاتتارىنىڭ قوزعاۋىمەن ۇشقاتتىنىڭ كىرەبەرىس جولى دۇرىستالدى. ايەل ادام باسشىلىققا كەلسە, الەۋمەتتىك نىسانداردىڭ جارقىراپ تۇرۋىن تالاپ ەتەدى. سەبەبى مەكتەپ پەن بالاباقشا, مادەنيەت ءۇيىنىڭ تازالىعى مەن اۋلاسىنداعى سانمەن وسىرىلگەن جاسىل جەلەگى سول ەلدى مەكەن تۇرعىندارىنا بەرىلەتىن باعا. ۇشقاتتىدا جاڭا بالاباقشا سالىندى, دارىگەرلىك امبۋلاتورياعا كۇردەلى جوندەۋ جۇرگىزىلدى, اۋىل كلۋبى بوي كوتەردى. ەكى قاباتتى مادەني وشاقتا كىتاپحانا, ءتۇرلى مەرەكەلىك ءىس-شارالار وتەتىن ساحنا مەن زالدار بار, ءبىر جاعىندا اۋىل اكىمدىگى ورنالاسقان. مۇنداعى وقۋ زالى كەڭ دە ىڭعايلى, كىتاپ قورى جەتكىلىكتى. 2022 جىلى ورتا مەكتەپكە كۇردەلى جوندەۋ جۇرگىزىلىپ, جىلۋ جۇيەسى جاڭارتىلدى. بۇل كۇندەرى وقۋشىلار كەڭ دە جارىق, جىلى, پاندىك كابينەتتەر تولىق جاڭعىرتىلعان جەردە ءبىلىم الىپ جاتىر. سول جىلى كوگىلدىر وتىن كەلدى. قىسى قىتىمىر, ايازى مەن بورانى كوپ, جازى ىستىق جەردە وتىن-سۋ مەن مال ازىعى التى اي قىسقا جەتكىلىكتى ەتىپ دايىندالادى. اۋىلعا تارتىلعان گاز قۇبىرى تۇرعىنداردى كومىر جاعۋدان قۇتقاردى. گۇلنارانىڭ تىنىمسىز ەڭبەگىنىڭ ارقاسىندا كوشەلەر تۇگەل جارىقتاندىرىلدى.
اۋىلدىق وكرۋگتە استىق ەگەتىن شارۋاشىلىقتار كوپ. شەكارا سىزىعىنداعى ەلدى مەكەننىڭ تاعى ءبىر ارتىقشىلىعى – 60-جىلدارى سالىنعان ۇلكەن ەلەۆاتور ءالى جۇمىس ىستەپ تۇر. بۇل جەردە ايتەكە بي اۋدانىنىڭ بارلىق شارۋاشىلىعى استىق ساقتايدى. اۋماعى اتشاپتىرىم, مەزگىل-مەزگىل بيداي كەپتىرەتىن قوندىرعىلارى بار, جەلدەتكىشپەن جابدىقتالعان ورىن. ەلىمىزدە استىق, كوكونىس ساقتايتىن قامبالار مەن قويمالاردىڭ جەتكىلىكسىزدىگىنەن, شارۋالار جىل سايىن جيناعان ونىمدەرىن كۇزدە سۋ تەگىن باعامەن وتكىزۋگە ءماجبۇر. ۇشقاتتى جۇرتىنىڭ ۇقىپتىلىعى وسىندا, ەلەۆاتوردى ساتقان دا جوق, بۇزعان دا جوق. مەنشىك «داۋت-م» سەرىكتەستىگىنە قارايدى, ونىڭ ديرەكتورى ايتقالي مۋشيروۆ بىرنەشە ادامدى جۇمىسپەن قامتىپ وتىر. قامبادا جاقسى ساقتالعان ءونىمدى قىمبات باعامەن قايتا ساتۋعا بولادى. كوكتەمدە تۇقىمدىق كارتوپ پەن بيداي ىزدەگەندەر ەلەۆاتورعا باس سۇعادى.
گۇلنارا بايەدىلقىزىنىڭ ايتۋىنشا, اۋىلدا جۇمىس جەتكىلىكتى. تەك ەرىنبەي ەڭبەك ەتە ءبىلۋ كەرەك. الداعى كۇندەرى سۋ تاسقىنىنان قيىندىقسىز وتسە, ەگىس ناۋقانى باستالادى. بۇل ۋاقىتتا اكىمگە تىنىم جوق. شارۋالاردىڭ تۇقىم قورىنىڭ جەتكىلىكتى بولۋى, تىڭايتقىش جەتكىزۋ, ۇكىمەت قورىنان بولىنەتىن ارزانداتىلعان جانار-جاعارماي الۋعا قامدانۋ قاجەت.
ەلدى مەكەندەردەگى ادام سانىن تۇراقتاندىرۋعا ساپالى مەكتەپ, جايلى بالاباقشا, ينتەرنەت بايلانىسى, كوگىلدىر وتىن, سۋمەن جابدىقتالۋ جۇيەسى قاجەت. الاقانداي اۋىلدىڭ شارۋاسىن دوڭگەلەتىپ وتىرعان گۇلنارا تاعى دا بىرنەشە جوبانى جوسپارلاپ قويدى. جاس وتباسىلار مەن وقۋ بىتىرگەن جاستاردىڭ كەلگەنىن قۇپ كورەدى. بىراق بۇگىنگى جاس ەلگە كوپ جولامايدى. قول ەڭبەگىنە ۇمتىلمايدى. قولداعى بار دۇنيەنى ۇقساتا بىلەتىن, ارتىق ۋادە بەرمەيتىن باسشى ۇشقاتتىنى تابىستى اۋىلعا اينالدىرۋدى ماقسات ەتەدى. مۇنىڭ توتە جولى – اۋىزبىرشىلىك پەن ەڭبەك قانا. انىعى سول, ەڭبەكقور, بىرلىگى مول ادامدارى كوپ اۋىلدىڭ بوساعاسىنا بەرەكە ۇيالايدى.
اقتوبە وبلىسى
