قازاقتىڭ كۇي ونەرىندە وزىندىك ورنى بار داۋلەتكەرەي شىعاي ۇلىنىڭ تۋعانىنا بيىل 205 جىل تولىپ وتىر. وسى ءبىر مەرەيلى داتاعا وراي كۇيشىنىڭ تۋعان جەرىندە ادەمى ءىس-شارا ءوتتى. بۇل جيىنعا قازاقستاننىڭ حالىق ءارتىسى, پروفەسسور ايگۇل ۇلكەنباەۆا مەن «دارىن» مەملەكەتتىك جاستار سىيلىعىنىڭ لاۋرەاتى ەرجان جامەنكەەۆ ارنايى كەلدى.
رەسپۋبليكالىق بايقاۋلاردىڭ لاۋرەاتى ادىلەت جولدىعاليدىڭ ورىنداۋىنداعى «كوركەم حانىم» كۇيىمەن باستالعان كونتسەرت سىرلى دا سازدى شىعارمالار بىرىنەن سوڭ ءبىرى اۋەلەگەن ونەر كەشىنە اينالدى.
مارتەبەلى مەيمان ايگۇل ناريمانقىزىنىڭ ءوزى داۋلەتكەرەيدىڭ «قىز اقجەلەڭ», دينانىڭ «بۇلبۇل», قۇرمانعازىنىڭ «قايران شەشەم» كۇيلەرىن بىرىنەن سوڭ ءبىرىن تارتىپ, كەلگەن جۇرتتىڭ قۇلاق قۇرىشىن قاندىردى. ەرجان جامەنكەەۆ ورىنداعان داۋلەتكەرەيدىڭ «قوس ىشەك», قوجەكە نازار ۇلىنىڭ «كۇي شاقىرتقى» شىعارمالارى دا كوپشىلىكتى بەي-جاي قالدىرمادى.
كەش بارىسىندا قازاقستاننىڭ ەڭبەك سىڭىرگەن قايراتكەرى نۇرجان سەرتەكوۆ داۋلەتكەرەيدىڭ «توپان» كۇيىن, «دارىن» مەملەكەتتىك جاستار سىيلىعىنىڭ لاۋرەاتى جاراس ساتىبالديەۆ «كوروعلىنى», مادەنيەت سالاسىنىڭ ۇزدىگى ەربول عۇبايدۋللين تۇركەشتىڭ «قوڭىرالاسىن», رەسپۋبليكالىق بايقاۋلاردىڭ لاۋرەاتى تۇرلىحان ءابۋحانوۆ داۋلەتكەرەيدىڭ «جىگەر» كۇيىن ۇسىندى. مادەنيەت سالاسىنىڭ ۇزدىكتەرى اسقار كەنجەعاليەۆ «قوسالقا» كۇيىنىڭ ءبىرىنشى نۇسقاسىن, اسىلحان قازيەۆ «باپاس» كۇيىن, ەرماك مولدابەكوۆ «جەڭگەم سۇيەردى» كۇمبىرلەتتى.
– ءحىح عاسىردا قازاق كۇي ونەرىنىڭ اسپانىندا سونبەس جۇلدىز بولعان قۇرمانعازى, داۋلەتكەرەيدىڭ ونەر جولى شامعون قاجىعاليەۆ, تۇياق شامەلەۆتەرمەن جالعاستى. بۇگىندە ەرمەك قازيەۆ, ەدىگە نابيەۆ اعالارىمىز ارامىزدا ءجۇر. بۇلاردىڭ ءبارى دە ءبىزدىڭ ارقا سۇيەرىمىز, ونەردە ۇلگى تۇتقان جاندار. ءوز باسىم 1984 جىلى قۇرمانعازى اكادەميالىق وركەسترىنىڭ قۇرامىندا وردا جەرىنە دەيىن بارىپ ەدىم. وسى جولى بايقاعانىم – عاريفوللا قۇرمانعاليەۆ اتىنداعى فيلارمونيا ۇجىمى «اتامەكەن» ونەر ورداسى دەپ اتالاتىن كەرەمەت عيماراتقا يە بولعان ەكەن. ونەردىڭ دامۋىنا بارلىق جاعداي جاسالىپتى. سول ءۇشىن قۋانىشتىمىن, – دەيدى حالىق ءارتىسى ايگۇل ۇلكەنباەۆا.
باتىس قازاقستان وبلىسى
