ەسىم-سويى ۇلت ونەرىنىڭ بيىگىندە ماڭگى قالعان تۇلعا شىعارماشىلىعىنا ارنالعان ءىس-شارا جامبىلدىق ونەرسۇيەر قاۋىمدى بەيجاي قالدىرعان جوق. ماەسترو ونەرىنە باس يگەن جۇرت ۇلكەن زالدى لىق تولتىردى. كومپوزيتوردىڭ ليريكالىق اندەرىن قوسىلا شىرقاعانداردىڭ ىشىندە كوزىنە جاس العانداردى دا بايقادىق.
كونتسەرت شىمىلدىعى كۇيشى-كومپوزيتوردىڭ ايگىلى «اتا تولعاۋى» كۇيىمەن ءتۇرىلدى. دۋلات بايزىلداەۆ جەتەكشىلىك ەتەتىن قازاق ۇلت-اسپاپتار وركەسترى ورىنداعان تۋىندى كوپشىلىكتىڭ جۇرەگىنە جەتكەنى انىق. تۇمانباي مولداعاليەۆ ءسوزىن جازعان ايگىلى «قۇستار ءانى», «جۇرەگىم مەنىڭ» اندەرى دە زالعا جينالعان جۇرتتى تولقىتتى.
ادەمى اندەرمەن ادىپتەلگەن كەشتە قوڭىر ءۇندى جاناتبەك قادىروۆ, مادەنيەت سالاسىنىڭ ۇزدىكتەرى وڭال ازاماتوۆا, ءمادينا ساعىنبەكوۆا, ايگۇل ماقاشەۆا باستاعان وزگە دە ەسىمى وڭىرگە بەلگىلى انشىلەر نۇرعيسا تىلەنديەۆتىڭ ەل ءسۇيىپ تىڭدايتىن عاجاپ اندەرىن ناقىشىنا كەلتىرە شىرقادى.
بۇل كۇنى نۇرعيسا تىلەنديەۆتىڭ, «كۋا بول», «بالاميشكا», «سارجايلاۋ», ء«وز ەلىم» سەكىلدى وزگە دە بىرقاتار شىعارمالارى ورىندالدى. كەش سوڭى وركەستردىڭ سۇيەمەلدەۋىندەگى «ماحامبەت» پوەماسىمەن تۇيىندەلدى.
ونەرسۇيەر قاۋىم ءۇشىن نۇرعيسا شىعارما-لارى ەشقاشان ولمەيتىنى داۋسىز. تۇلعا تۋىندىلارى ناسيحاتتالعان كەشتە دە مۇنى انىق اڭعاردىق. فيلارمونيا ۇجىمى ۇيىمداستىرعان كونتسەرتتىڭ جوعارى دەڭگەيدە وتۋىنە «اقكەربەز», «بوزتورعاي» سەكىلدى بي انسامبلدەرى دە ايتارلىقتاي ۇلەس قوستى.
تاراز
