ء«بورىلى بايراق استىندا
بوگەلىپ كورگەن جان ەمەن.
بورىدەي جورتىپ كەتكەندە,
ءبولىنىپ قالعان جان ەمەن.
ءبورىلى نايزا ۇستاسا,
تۇيرەمەي كەتكەن جان ەمەن.
ءبورىلى بايراق قۇلاسا,
كۇيرەمەي كەتكەن جان ەمەن.
ءبورى باسى — ۇرانىم,
ءبورىلى مەنىڭ بايراعىم.
ءبورىلى بايراق كوتەرسە,
قوزىپ كەتەر قايداعىم», دەگەن ەكەن التى الاشتى اۋزىنا قاراتقان ارقالى شايىر.
ءارتۇرلى سالتاناتتى جيىنداردا جانە حالىقارالىق سپورت جارىستارىندا مەملەكەتتىك تۋىمىز كوتەرىلىپ, ءانۇرانىمىز ورىندالعان سايىن كەۋدەمىزدى ماقتانىش پەن قۋانىش كەرنەيدى. سول قاسيەتتى مەملەكەتتىك ءرامىزىمىزدى جۋىردا اتىراۋدا نيقاب كيگەن ءتورت جاس قىز قورلاعانى جۇرتشىلىقتىڭ اشۋ-ىزاسىن تۋعىزدى. ولار اراب تىلىندەگى سوزدەر جازىلىپ, استىنا قىلىش قويىلعان مەملەكەتتىك تۋدى ۇستاپ تۇرىپ سۋرەتكە تۇسكەن. سول سۋرەت الەۋمەتتىك جەلىدە تاراپ كەتكەن. وسىعان وراي قازىر جەرگىلىكتى پوليتسيا قىلمىستىق ءىس قوزعاپ, سوتقا دەيىنگى تەرگەۋ امالدارىن جۇرگىزىپ جاتىر.
«تارالعان جازباداعى ءتورت كۇدىكتى دە انىقتالىپ, پوليتسيا بولىمشەسىنە جەتكىزىلدى. ولاردىڭ ەكەۋى كامەلەتكە تولماعاندىقتان, اتا-انالارىنىڭ قاتىسۋىمەن جاۋاپ الىنىپ جاتىر», دەپ مالىمدەدى اتىراۋ وبلىسى پوليتسيا دەپارتامەنتىنىڭ ءباسپاسوز قىزمەتى.
كۇدىكتىلەردىڭ كىناسى دالەلدەنسە, ولار سوت ارقىلى جازاعا تارتىلۋى مۇمكىن. قىلمىستىق كودەكستىڭ 372-بابىندا: «قازاقستان رەسپۋبليكاسىنىڭ مەملەكەتتىك رامىزدەرىن قورلاۋ – ءۇش مىڭ ايلىق ەسەپتiك كورسەتكiشكە دەيىنگى مولشەردە ايىپپۇل سالۋعا نە سول مولشەردە تۇزەۋ جۇمىستارىنا نە 900 ساعاتقا دەيىنگى مەرزىمگە قوعامدىق جۇمىستارعا تارتۋعا نە ەكى جىلعا دەيiنگi مەرزiمگە باس بوستاندىعىن شەكتەۋگە نە سول مەرزiمگە باس بوستاندىعىنان ايىرۋعا جازالانادى», دەپ كورسەتىلگەن. بۇعان قوسا قورلانعان مەملەكەتتىك تۋ ەلەكتروندى ساۋدادان الىنىپ تاستالدى.
وسى كەلەڭسىز وقيعاعا بايلانىستى پارلامەنت ءماجىلىسىنىڭ دەپۋتاتى ايگۇل قۇسپان الەۋمەتتىك جەلىدەگى پاراقشاسىندا: «جەلىدە اراب تىلىندەگى جازۋى بار قازاقستاندىق تۋدى ۇستاپ تۇرعان ءتورت ءجاسوسپىرىمنىڭ سۋرەتى پايدا بولعاندا مەنىڭ كوزىمە جازۋدىڭ وتە ساپالى, زاۋىتتىق ادىسپەن باسىپ شىعارىلعانى ءتۇستى. بىردەن ورەسكەل ارانداتۋشىلىق تۋرالى وي كەلدى. سوندىقتان مەن ازاماتتارىمىزدى دانالىق تانىتۋعا, ارانداتۋشىلىققا ەرمەۋگە, مۇنداي ءونىمدى ساتىپ الماۋعا شاقىرامىن. ويتكەنى الداعى ۋاقىتتا ماركەتپلەيستەر شەكارالارى بۇرمالانعان قازاقستان كارتاسىن نەمەسە وسىنداي ارانداتۋشىلىق سيپاتتاعى وزگە دە تاۋارلاردى ۇسىنۋى عاجاپ ەمەس. ءبىزدىڭ قۇقىق قورعاۋ ورگاندارىمىز مۇنداي فاكتىلەرگە جەدەل دەن قويىپ وتىرۋى قاجەت. سەبەبى ولاردىڭ ارتىندا ءبىزدىڭ قوعامدا تۇراقسىزدىق تۋىنداۋىنا مۇددەلى كۇشتەر تۇرۋى ىقتيمال. ال ءوز ارىپتەستەرىم – پارلامەنتشىلەرگە قولدانىستاعى زاڭناماعا مەملەكەتىمىزدىڭ نەگىزىنە نۇقسان كەلتىرەتىن تاۋارلاردى ساتاتىن ماركەتپلەيستەرگە قارسى سانكتسيالاردى كوزدەيتىن تۇزەتۋلەر ەنگىزۋ تۋرالى بىرلەسىپ ويلانۋدى ۇسىنامىن. سونداي-اق وسى ناقتى جاعدايدا مەملەكەتتىك رامىزدەردى قورلاۋعا جول بەرگەنى ءۇشىن ەلەكتروندىق ساۋدا الاڭىنىڭ وڭىرلىك باسشىلىعىن دا جاۋاپقا تارتۋ قاجەت دەپ سانايمىن», دەپ جازدى.
بۇل رەتتە ۇلتتىق قۇرىلتايدىڭ جاقىندا بۋرابايدا وتكەن ءتورتىنشى وتىرىسىندا پرەزيدەنت قاسىم-جومارت توقاەۆ: «تەرىس اعىمدارعا, قازاقتىڭ بولمىسىنا جات يدەولوگيالارعا توسقاۋىل قويۋ قاجەت ەكەنىنە ەش كۇمان جوق. ەلىمىزدە ءدىن بوستاندىعىنا كەپىلدىك بەرىلگەن. بىراق جۇگەنسىزدىككە, تارتىپسىزدىككە جول بەرۋگە بولمايدى. ءدىننىڭ اسا ماڭىزدى ميسسياسى – ۇلتتى ۇيىستىرۋ. ءدىني ۇيىمداردىڭ قىزمەتىن رەتتەيتىن قۇجاتتار وسى تالاپقا ساي بولۋعا ءتيىس. بۇل ماسەلەنى جان-جاقتى قاراۋ كەرەك. سونىڭ ىشىندە زاڭنامانى جاڭا جاعدايعا بەيىمدەپ وتىرۋ وتە ماڭىزدى», دەپ اتاپ ايتقانى ويعا ورالادى. ۇكىمەت پەن پارلامەنت مەملەكەت باسشىسىنىڭ تاپسىرماسىن سوزباققا سالماي, جەدەلدەتە ورىنداپ, پارمەندى شەشىمدەر قابىلدايدى دەپ سەنەمىز.
