جاڭاقورعاندا ماكارون شىعادى

جۋىردا اۋدان اكىمى ءماجيت ءساميتوۆ «رۋحانيات» ورتالىعىندا جەرگىلىكتى ونىمدەر كورمەسىمەن تانىسىپ, كاسىپكەرلەرمەن كەزدەستى. كەزدەسۋدە اۋدانداعى شاعىن جانە ورتا كاسىپتى دامىتۋ, جەرگىلىكتى ءونىمدى كوبەيتۋ ماسە­لەلەرى تالقىلاندى. اۋدان ورتالىعىنداعى كور­مەگە ءونىمىن جەتكىزگەن كاسىپكەردىڭ ءبىرى – ەركىنباي شىدەرباەۆ. ولاردىڭ وتباسىلىق بيزنەسى 2000 جىلدارى باستالىپتى. باستاپقىدا دۇكەن اشىپ, تاۋار ساۋدالادى. كەيىن ناۋبايحانانى ىسكە قوسىپ, نان ءپىسىرىپتى. «ون­شاقتى جىلدان كەيىن بۇل سالادا باسەكەلەس كوبەي­دى. ۇن باعاسى دا جىل سايىن قىمباتتاپ, ءونىمدى ازاي­تۋعا تۋرا كەلدى», دەيدى كاسىپكەر.

وسىدان كەيىن ول نارىقتاعى ءوتىمدى تاۋاردىڭ ءبىرى – ماكارون ونىمدەرىن زەرتتەي باستايدى. بازار سورەسىن تولتىرىپ تۇرعان وسى ءونىمنىڭ نەشە ءتۇرىنىڭ وزگە ەلدەن يمپورتتالىپ كەلەتىنىنە نازار اۋدارادى. جوبا دايىن­داپ, مەملەكەتتىك قولداۋ ناتيجەسىندە, 19,5 ملن تەڭگەگە قول جەتكىزگەندە ەڭ الدىمەن قوندىرعى ىزدەۋگە كىرىستى. تاپقان يتاليالىق قوندىرعى ساعاتىنا 160-200 كيلو ءونىم شىعارادى ەكەن.

«العاشقى ءونىمدى شىعارىپ, سورەگە قويعانعا دەيىن ءبىراز قارجى جۇمسادىق. وسىلايشا, «Baybol» ماكارونى اقپان ايىنىڭ العاشقى ونكۇندىگىنەن باستاپ, اۋدان نارىعىنا جول تارتتى. اي ىشىندە 2 توننادان استام ءونىم شىعاردىق. ماكارون ساپاسى وتە جوعارى, قۇرامىنا ەشقانداي بوياعىش قوسىلماعان. ازىرگە اۋدانداعى ساۋدا ۇيلەرى مەن دۇكەندەرگە وتكىزىپ جاتىرمىز. ەگەر سۇرانىس ارتىپ, تاپسىرىس كوبەيسە كورشى وڭىرلەرگە دە جەتكىزۋگە دايىنبىز», دەيدى كاسىپكەر.

قازىر تاپسىرىس بەرگەن قاپتامانىڭ كەلۋىن كۇتىپ وتىر. جاقىن كۇندەرى ساۋدا نۇكتەلەرىنە «Baybol» بار­لىق مالىمەتى جازىلعان جاڭا ورامامەن تۇسە باس­تايدى. كاسىپ­كەر بۇرىن مۇنداي ءوندىرىس تۇرىمەن اينالىسىپ كور­مەگەندىكتەن ءونىم كەپتىرگىش جاعى ازداۋ بولىپ تۇر­عانىن ايتادى. ونى كوبەيتكەسىن تسەح ءوز قۋاتىنا تولىق كوشەدى.

ازىرشە تسەحتا 3 ادام جۇمىس ىستەپ جاتىر. بيزنەس-جوسپاردا كورسەتىلگەندەي, كەپتىرگىش العان سوڭ جۇمىس­شى­لاردى 6 ادامعا دەيىن كوبەيتەدى. قازىر ماكاروننىڭ راكۋشكا, روجكي, ۆەرميشەل سەكىلدى تۇرلەرى شىعارىلىپ جاتىر. باستىسى – باعاسى سىرتتان كەلەتىن ونىمنەن ارزان. تاپسىرىس كولەمىنە قاراي مۇندا كەسپە, جايما تۇرلەرىن دە شىعارۋعا بولادى.

قىزىلوردا وبلىسى,

جاڭاقورعان اۋدانى