وسى تاقىرىپقا قاتىستى ماسەلەلەر پرەزيدەنت ءىس باسقارماسىنىڭ پرەزيدەنتتىك ورتالىعىندا وتكەن گيدتەر مەن ەكسكۋرسيا جەتەكشىلەرىنىڭ ءى فورۋمىندا ايتىلدى. باسقوسۋدى استانا قالاسىنىڭ اكىمدىگى, «استانا دامۋ ورتالىعى» جشس, استانا گيدتەر كلۋبى, قازاقستاننىڭ گيدتەر جانە ەكسكۋرسوۆودتار وداعى, «Kazakh Tourism» ۇك» اق بىرلەسىپ ۇيىمداستىردى. جيىنعا استانا قالاسىندا تۋريستەرگە ەكسكۋرسيا جاساۋمەن اينالىسىپ جۇرگەن 100-دەن اسا ازامات قاتىستى. ءپىب پرەزيدەنتتىك ورتالىعى ديرەكتورىنىڭ ورىنباسارى بوتاگوز قايىپوۆا ەكسكۋرسيا جەتەكشىلەرىنىڭ ارقاسىندا پرەزيدەنتتىك ورتالىققا كەلەتىن قوناقتاردىڭ كوبەيگەنىن اتاپ ءوتتى.
– ساپالى تۋريستىك سەرۆيس قۇرۋ بىلىكتى كادرلار دايارلاۋ ىسىمەن دە تىعىز بايلانىستى. ياعني تۋريستەرگە ەلدىڭ باي مۇراسىن دۇرىس كورسەتە الاتىن گيدتەردىڭ جۇمىسىن ەلەۋسىز قالدىرۋعا بولمايدى. گيد-ەكسكۋرسوۆود جاي عانا جول كورسەتۋشى ەمەس, ول – قوناقتاردىڭ ساناسىنا ەلىمىز تۋرالى جاقسى وي قالىپتاستىراتىن «مادەني ەلشى». دەمەك, قوناقتاردىڭ ساپارى ءساتتى بولماعى گيدتەردىڭ كاسىبيلىگىنە, بىلىمىنە, شەبەرلىگىنە, ءتىپتى جەكە قاسيەتتەرىنە دە بايلانىستى. جوعارى بىلىكتى گيد ەلدىڭ تاريحىن, مادەنيەتىن, ەتنوگرافياسىن جانە گەوگرافياسىن جاقسى بىلۋگە ءتيىس. پرەزيدەنتتىك ورتالىق ەلوردانىڭ ەڭ ماڭىزدى تۋريستىك نىساندارىنىڭ ءبىرى رەتىندە مادەني ءتۋريزمدى دامىتۋعا ەرەكشە كوڭىل بولەدى. ەكسكۋرسيا جەتەكشىلەرىنىڭ كاسىبيلىگىنىڭ ارقاسىندا ورتالىق ەلىمىزدىڭ ساياسي تاريحىنا قىزىعۋشىلىق تانىتقان جاستارعا, زەرتتەۋشىلەرگە, ديپلوماتيالىق دەلەگاتسيالارعا, تۋريستەرگە ارنالعان مادەني وشاققا اينالىپ كەلەدى, – دەيدى ب.قايىپوۆا.
استانا قالاسى ينۆەستيتسيالار جانە كاسىپكەرلىكتى دامىتۋ باسقارماسى باسشىسىنىڭ ورىنباسارى ماقسات جاڭاباەۆتىڭ ايتۋىنشا, بىلتىر ەلورداعا كەلگەن تۋريستەر سانى 2023 جىلمەن سالىستىرعاندا 14% -عا ءوسىپ, 1,5 ملن ادامدى قۇراعان. ولاردىڭ ىشىندە قىتاي, تۇركيا, رەسەي, ءۇندىستان, گەرمانيا, وڭتۇستىك كورەيا, اقش-تان كەلگەن قوناقتاردىڭ ۇلەسى باسىم. دەمەك, قازىر استانادا قازاق, ورىس, اعىلشىن ءتىلىن بىلەتىن گيدتەردەن بولەك, قىتاي, كورەي, ءۇندى, تۇرىك ءتىلىن بىلەتىن گيدتەرگە دە سۇرانىس جوعارى. اتالعان ەلدەردەن تۋريستەر توپ بولىپ كەلگەن سوڭ, ولار ساپاردىڭ باسى-قاسىندا كاسىبي مامان جۇرگەنىن قالايدى. وسى شەتەلدىك قوناقتارعا ەلدىڭ تۋريستىك الەۋەتىن بارىنشا ايشىقتاپ كورسەتۋگە كەلگەندە گيدتەر مەن ەكسكۋرسيا جەتەكشىلەرىن اتتاپ وتە المايمىز. ويتكەنى ولار ساپارلاعان ولكە تۋرالى مازمۇندى اقپارات ۇسىنعاننان بولەك, تۋريستەر قىزىعاتىن ورىنداردى جاقسى بىلەدى. ءبىز قازىر وقىعان, كۋرستان وتكەن, سالانى ۇڭعىل-شۇڭعىلىنا دەيىن زەرتتەگەن گيدتەر تۋرالى ايتىپ وتىرمىز. ولاردىڭ جۇمىسىنا وقىماعان, وقىسا دا ءبىردى-ەكىلى كۋرستان ءوتىپ جۇمىس ىستەپ جۇرگەندەر كەدەرگى بولماۋعا ءتيىس. وسى رەتتە «Kazakh Tourism» ۇك» اق باسقارما توراعاسىنىڭ ورىنباسارى دانيەل سەرجان ۇلى بىلاي دەيدى:
– شەتەلدىك تۋريستەردى قارسى الاتىن ءبىرىنشى ادام – گيد. گيدتەر قوناقتاردىڭ ساپارى ماعىنالى, مازمۇندى بولۋىنا اسەر ەتەدى. قازىر بۇل باعىتتا ەڭبەكتەنەتىن مامانداردىڭ تۇراقتاپ قالمايتىنى قىنجىلتادى. 10 ادام گيدتىڭ وقۋىن وقىپ, كۋرستاردان وتسە, ونىڭ تورتەۋى جۇمىس ىستەيدى دەلىك. سول تورتەۋدىڭ ءوزى بىرەر جىلدا باسقا سالاعا اۋىسىپ جاتاتىن ساتتەر ءجيى كەزدەسەدى. ەلىمىزدىڭ تۋريستىك الەۋەتى ارتىپ كەلە جاتقانىن ەسكەرسەك, گيدتەردىڭ, ەكسكۋرسيا جەتەكشىلەرىنىڭ مارتەبەسىن قازىردەن كوتەرۋىمىز كەرەك. ماسەلەگە «Kazakh Tourism» اق بەيجاي قاراپ وتىرعان جوق. گيدتەر مەن ەكسكۋرسيا جەتەكشىلەرىنىڭ باسىن قوساتىن تسيفرلىق پلاتفورما ازىرلەنىپ جاتىر. گيد ماماندار وسى ارقىلى ءبىر جەردەن وقىپ, كەرەك اقپاراتىن تاۋىپ, وعان قوسا ونىڭ قىزمەتىن راستايتىن جەكە بەيدجىن الا الادى. ياعني باسىمدىققا يە بولادى. بەيدجبەن ءاربىر تۋريستىك نىسانعا تەگىن, ەمىن-ەركىن كىرەدى. بۇدان باسقا, زاڭنامالىق تۇرعىدا گيدتەردىڭ مارتەبەسىن, نەگىزگى قۇقىقتارىن بەكىتۋ جونىندە دە جۇمىس ءجۇرىپ جاتىر. سونىڭ ناتيجەسىندە, قوناقتارعا جول سىلتەيتىن, ساپالى, مازمۇندى, ءونىمدى قىزمەت كورسەتەتىن مامانداردىڭ سانى ارتادى دەپ ويلايمىز.
گيد بولىپ جۇمىس ىستەپ جۇرگەن جاستار سۇرانىسقا يە بولۋدى ويلاسا, اۋەلى وقۋ ماسەلەسىنە قاتىستى تالاپتاردى ورىنداۋى كەرەك. مىسالى, شاعىن كۋرستارمەن شەكتەلىپ, كەشە جۇمىسقا كىرىسكەن جاس قالانىڭ تاريحى, نەگىزگى تۋريستىك باعىتتارى تۋرالى اقپاراتتى ءدال تاجىريبەلى مامان سەكىلدى بىلمەيتىنى انىق. سوندىقتان وقىعان, ءوز جۇمىسىن جاقسى بىلەتىن گيدتەردىڭ, ەكسكۋرسيا جەتەكشىلەرىنىڭ مارتەبەسىن كوتەرىپ, ولاردى رەسمي تىركەلگەن گيد رەتىندە دارەجەسىن ارتتىرۋ قۇپتارلىق ءىس. وسىلايشا, وقىماي, ءوز بەتىنشە جۇمىس ىستەپ كەلگەن گيدتەر ىسىرىلىپ قالادى نەمەسە سۇرانىستا بولۋى ءۇشىن جاڭا تالاپتاردى ورىنداۋعا بەل بۋادى. ەلىمىزدىڭ الماتىدان بولەك, بارلىق دەرلىك وڭىرىندە تۋريستىك ماۋسىم قىسقا. كۇز, قىستا ۇلتتىق پاركتەرگە, تاريحي-مادەني ورىندارعا باراتىن قوناقتار ازايادى. سول ءۇشىن دە گيد بولىپ جۇمىس ىستەپ جۇرگەن جاستاردىڭ كوپشىلىگى سالانى قوسىمشا جۇمىس رەتىندە قاراستىرادى.
كەزدەسۋدە قوناقتار وسى ماسەلەمەن قاتار گيدتەر مەن ەكسكۋرسيا جەتەكشىلەرىن كاسىبي دايارلاۋ, بەدەلىن ارتتىرۋ, قوعامدىق بىرلەستىكتەردىڭ ۇسىناتىن جەڭىلدىكتەرى, قارجىلىق قىزمەت, سالىق ماسەلەلەرى تۋرالى دا ءسوز قوزعادى.
