اقپاننىڭ ءبىر كۇنى

ەرەيمەنتاۋ اۋدانىنداعى «جاڭا بەرەكە» شارۋا قوجا­لى­عى­نىڭ قۇرىلعانىنا ەكى جىلعا ەندى تاياعانىمەن, جاڭاشىل ءوندى­رىسشىلەردىڭ اياق الىسى وبلىس اۋماعىندا جاقسى قىرىنان اتالا باستادى. تاجىريبەلى مامان اي­گۇل رامازانوۆا ءاۋ باستان-اق جۇ­مىستىڭ ۋاقىت تالابىنا ساي ءۇي­لەس­تىرىلۋىن ءبىرىنشى كەزەككە شىعارۋى ءوز قايتارىمىن بەرۋدە. مۇنداعى باستى باعىت – مال شارۋاشىلىعىن اسىلداندىرۋ بولىپ تابىلادى. نوۆوماركوۆكا اۋىلىنىڭ 15 تۇرعىنىن جۇمىسپەن قامتاماسىز ەتكەن قوجالىق بۇرىنعى مال قو­رالارىن جوندەۋمەن قاتار, قوسىمشا قۇرىلىستار سالىپ, ماتەريالدىق-تەحنيكالىق بازاسىن نىعايتىپ وتىر. اۋ­داندىق اكىم­دىكتىڭ قولداۋىمەن 50 گەكتار جەر ءبولىنىپ, 3000 ءىرى قاراعا ار­نالعان بورداقىلاۋ الاڭى پاي­دا­لانۋعا بەرىلدى. جايىلىمدىق جەردىڭ اۋقىمى 1 700 گەكتارعا جەتتى. شارۋا قوجالىعى 2013 جىلى قالماقتىڭ اسىل تۇقىمدى 93 تايىنشاسىن, دوندىق 5 بۇقا مەن 5 جىلقى ساتىپ العان. ال, وتكەن جىلى شارۋاشىلىقتاعى ءىرى قارانىڭ سانى 589 باسقا جەتسە, ونىڭ ىشىندە 326 قۇناجىن, ال 5-ەۋى ءوندىرۋشى بۇقالاردى قۇراعان. بۇعان قوسا, باشقۇرت تۇقىمدى 98 باس اسىل تۇقىمدى جىلقى مەن قۇشىم تۇقىمدى 5 ايعىر ساتىپ الىندى. بۇگىندە جىلقى ءۇيىرى 109 باسقا جەتكەندىگى العا قويىلعان ماقساتتىڭ بيىكتىگىن ايقىندايدى. مال شارۋاشىلىعىن اسىل­داندىرۋ باعىتىنداعى رەسپۋب­ليكالىق پالاتانىڭ قۇرامىنا ەنگەن ەرەي­مەن­تاۋلىق قوجالىق اۋىل ءومىرىن جانداندىرىپ, ەل يگىلىگىن ەسەلەي تۇسەتىنى انىق. باقبەرگەن امالبەك, «ەگەمەن قازاقستان». اقمولا وبلىسى, ەرەيمەنتاۋ اۋدانى.