ءوڭىر باسشىسى اسحات شاحاروۆ «جايلى مەكتەپتەردىڭ» جاي-كۇيىمەن تانىسىپ, وقۋشىلار مەن ولاردىڭ اتا-انالارى, مۇعالىمدەرمەن كەزدەستى. اقجار-2 ەلدىمەكەنىندەگى 300 وقۋشىعا لايىقتالعان مەكتەپكە 4-وقۋ توقسانىنا 325 وقۋشى قابىلداندى. ولار ەكى اۋىسىمدا وقىپ جاتىر. مەكتەپ عيماراتىندا زاماۋي وقۋ كابينەتتەرى, زەرتحانالار, IT قۇزىرەتتىلىگىن دامىتۋعا ارنالعان كەشەندەر بار. سونداي-اق ەكى كومپيۋتەرلىك كابينەت, روبوتوتەحنيكا سىنىبى, STEM-زەرتحانا, شەبەرحانالار, زاماناۋي كىتاپحانا, وقۋ زالى, كوۆوركينگ الاڭدارى مەن ويىن الاڭدارى, سپورت جانە اكت زالدارىمەن جابدىقتالعان. مەكتەپتە ەرەكشە قاجەتتىلىگى بار بالالاردىڭ وقۋىنا جاعداي جاسالعان.
اتا-انا ايناگۇل سابيتەۆا وسى مەكتەپكە نەمەرەلەرىن وقۋعا الىپ كەلگەن. «مەكتەپ عيماراتى وتە ادەمى, وقۋشىلار ءۇشىن بارلىق جاعداي جاسالعان. نەمەرەمە دومبىرا سىنىبى, قىزدار مەن ەر بالالارعا ارنالعان شەبەرحانالار ۇناپ وتىر. بالا وقىپ قانا قويماي ءوزى تاڭداعان كاسىپ ءتۇرىن مەكتەپ قابىرعاسىندا ءجۇرىپ ۇيرەنىپ شىعاتىنىنا قۋانىشتىمىن», دەيدى ول.
تۇرعىندار كوپ شوعىرلانعان ەسەت باتىر الابىندا بوي كوتەرگەن №82 جالپى ءبىلىم بەرەتىن ورتا مەكتەپ 2 مىڭ وقۋشىعا لايىقتالعان. مۇندا 55 وقۋ كابينەتى بار. سونىڭ ىشىندە 28 باستاۋىش سىنىپ كابينەتى, 7 مەكتەپالدى دايارلىق توبى, حيميا, اعىلشىن, فيزيكا, بيولوگيا كابينەتتەرى, IT, روبوتوتەحنيكا, STEM زەرتحانالارى اشىلعان. سونىمەن قاتار 440 بالاعا ارنالعان اسحانا دا جۇمىس ىستەيدى.
«وسىنداي زاماناۋ ءبىلىم ورداسىنىڭ سالىنعانىنا وتە قۋانىشتىمىن. ءبىلىم سالاسىندا كوپجىلدىق تاجىريبەم بولسا دا, زاماناۋي كابينەتتەرى, جايلى دەمالىس ورىندارى, وقۋشىنى تۇلعالىق دامىتۋعا بارلىق مۇمكىندىك قاراستىرىلعان جوبانى ءبىرىنشى رەت كورىپ تۇرمىن.
اتا-انالارعا مەكتەپتى قادىرلەڭىزدەر, مۇعالىمدەرمەن بىرگە جۇمىس ىستەپ, بالانىڭ ازامات بولىپ قالىپتاسۋىنا ۇلەستەرىڭىزدى قوسىڭىزدار دەگىم كەلەدى», دەيدى ءبىلىم سالاسىنىڭ ارداگەرى ءجانيا مۇحامبەتوۆا.
