وڭىردەگى جەر سىلكىنىسى بيلىك نازارىنان تىس قالعان جوق. مەملەكەت باسشىسى قاسىم-جومارت توقاەۆ جامبىل وبلىسىنىڭ اكىمى ەربول قاراشوكەەۆ پەن توتەنشە جاعدايلار ءمينيسترى شىڭعىس ءارىنوۆتىڭ بايانداماسىن تىڭداپ, ۇكىمەت باسشىسى ولجاس بەكتەنوۆكە الەۋمەتتىك نىساندار مەن ب ۇلىنگەن تۇرعىن ۇيلەردى قالپىنا كەلتىرۋ بويىنشا جەدەل ىسكە كىرىسۋدى تاپسىردى.
قازىرگى كەزدە وڭىردەگى احۋالدى پرەمەر-مينيستر جەكە باقىلاۋىنا العان. ۇكىمەت باسشىسىنىڭ تاپسىرماسىنا سايكەس وڭىردە بولعان جەر سىلكىنىسىنە بايلانىستى جەرگىلىكتى اتقارۋشى بيلىك وكىلدەرى جاعدايدى زەردەلەۋ, جەدەل شارالار قابىلداۋ جۇمىسىن ۇيلەستىرىپ جاتىر. توتەنشە جاعدايلار ۆيتسە-ءمينيسترى باستاعان ۇكىمەتتىك جۇمىس توبى وڭىرگە كەلىپ, جاعدايمەن تانىستى.
28 ناۋرىز كۇنى بولعان جەر ءدۇمپۋى سول كۇنى ءتۇس الەتىندە ءبىر قايتالاندى دەمەسەك, ودان كەيىن قاۋىپ تونەتىندەي جاعداي تۋىنداعان جوق. ءوڭىر باسشىسى ەربول قاراشوكەەۆ باستاعان جەرگىلىكتى بيلىك وكىلدەرى تاڭ بوزىنان مەركى, تۇرار رىسقۇلوۆ اۋداندارىنا ات باسىن بۇرىپ, ب ۇلىنگەن الەۋمەتتىك نىساندار مەن تۇرعىن ۇيلەردى ارالاپ شىقتى. كەيىننەن توتەنشە جاعدايلار ۆيتسە-ءمينيسترى كەگەن تۇرسىنباەۆ باستاعان ۇكىمەتتىك كوميسسيا مۇشەلەرى دە تۇرار رىسقۇلوۆ اۋدانىندا بولىپ, زارداپ شەككەن تۇرعىن ۇيلەر مەن الەۋمەتتىك نىساندارعا ارنايى ات باسىن بۇردى.
كوميسسيا مۇشەلەرى مەن وبلىس باسشىسى ەربول قاراشوكەەۆ الدىمەن تۇرار رىسقۇلوۆ اۋدانى اۋماعىنداعى جاڭاتۇرمىس اۋىلىنا باردى. ەلدى مەكەندەگى بىرنەشە ءۇيدىڭ قابىرعاسىندا جارىقشاق پايدا بولعانىن كورگەن ءوڭىر باسشىسى باسپاناسى ب ۇلىنگەن ازاماتتارعا اتاۋلى الەۋمەتتىك كومەك كورسەتىلەتىنىن جەتكىزدى.
رەسمي دەرەككە سەنسەك, اۋىلداعى ءبىلىم وشاعىنىڭ قابىرعاسىندا جارىقتار پايدا بولعانى انىقتالعان. ە.قاراشوكەەۆ ءبىلىم الۋشىلارعا قولايسىزدىق تۋماۋى ءۇشىن جاۋاپتىلارعا قالپىنا كەلتىرۋ جۇمىسىن جەدەل جۇرگىزۋ كەرەكتىگىن شەگەلەپ تاپسىردى.
قازىر مەملەكەت باسشىسىنىڭ تاپسىرماسىنا سايكەس كەلتىرىلگەن شىعىندى باعالاۋ, ب ۇلىنگەن م ۇلىكتى قالپىنا كەلتىرۋگە قاتىستى ناقتى جۇمىستار جۇرگىزىلىپ جاتىر. قۇرامىندا وبلىس اكىمدىگىنىڭ, سەيسمولوگيالىق باقىلاۋ جانە زەرتتەۋلەر ۇلتتىق عىلىمي ورتالىعىنىڭ, ءتيىستى ۆەدومستۆولاردىڭ وكىلدەرى بار جۇمىس توبى جاعدايدى تولىقتاي باقىلاۋعا العان.
كوميسسيا مۇشەلەرى مەركى, تۇرار رىسقۇلوۆ اۋدانىنا قاراستى بىرنەشە ەلدى مەكەندەگى عيماراتتار مەن تۇرعىن ۇيلەردى ارالاپ, تەحنيكالىق تەكسەرۋ جۇمىسىن جۇرگىزدى. رەسمي دەرەككە سەنسەك, ەكى اۋداندا جالپى سانى 17 الەۋمەتتىك نىسان ب ۇلىنگەن. ونىڭ 11-ءى – ءبىلىم بەرۋ, ەكەۋى دەنساۋلىق ساقتاۋ, ەكەۋى الەۋمەتتىك قورعاۋ, بىرەۋى سپورت, تاعى بىرەۋى مادەنيەت سالاسىنا قاراستى مەكەمەلەر. اۋىلدىق وكرۋگ اكىمدەرىنە قازىرگى ۋاقىتقا دەيىن باسپانانىڭ ب ۇلىنگەنى تۋرالى 104 ارىز-شاعىم تۇسكەن. كوميسسيا مۇشەلەرى تۇرعىن ۇيلەردى تەكسەرۋ جۇمىسىن جالعاستىرىپ جاتىر. شىعىن كولەمى الداعى كۇندەرى انىقتالادى.
تاڭ شاپاعى كورىنگەنشە مازاسى قاشقان جۇرت جەرگىلىكتى اتقارۋشى بيلىك وكىلدەرىنىڭ جۇدىرىقتاي جۇمىلعانىن, بارلىق قاۋىپسىزدىك شارالارىن قابىلداعانىن, حالىقپەن تىكەلەي بايلانىس ورناتقانىن كورگەن سوڭ ەڭسە تىكتەدى.
«مەملەكەت باسشىسى وڭىردەگى جاعدايدى جەكە باقىلاۋىنا الدى. پرەزيدەنت الەۋمەتتىك نىساندار مەن تۇرعىن ۇيلەردى قالپىنا كەلتىرۋ, جوندەۋ جۇمىستارىن جۇرگىزۋگە قاجەتتى كومەك كورسەتۋدى جۇكتەدى. ۇكىمەت باسشىسىنىڭ تاپسىرماسىمەن ۇكىمەتتىك جۇمىس توبى دا جەدەل ىسكە كىرىستى. ءوڭىر تۇرعىندارىنىڭ قاۋىپسىزدىگىن قامتاماسىز ەتۋ بويىنشا ءتيىستى جۇمىس اتقارىلدى. حالىقتىڭ قاۋىپسىزدىگى ىلكى ساتكە دە نازاردان تىس قالمايدى», دەيدى ءوڭىر باسشىسى ە. قاراشوكەەۆ.
قالاي دەسەك تە جەر ءدۇمپۋى مەركى, تۇرار رىسقۇلوۆ اۋدانى تۇرعىندارىنىڭ قۇتىن قاشىرعانى انىق. ابىروي بولعاندا, جەرگىلىكتى اتقارۋشى بيلىك وكىلدەرى دەر كەزىندە جۇدىرىقتاي جۇمىلىپ, بارلىق قاۋىپسىزدىك شاراسىن قابىلدادى. جەر سىلكىنىسى سالدارىنان كەلتىرىلگەن شىعىن تولىق ەسەپتەلىپ جاتىر. الداعى ۋاقىتتا الەۋمەتتىك نىساندار مەن تۇرعىن ۇيلەردىڭ ب ۇلىنگەن قابىرعالارىن قالپىنا كەلتىرۋ جۇمىسىن جەدەل اياقتاۋ مىندەتى تۇر.
جامبىل وبلىسى
