فوتو: تۋريزم جانە سپورت مينيسترلىگى
كەزدەسۋ بارىسىندا اندرەي كريۋكوۆ ءوز قىزمەتىن مەرزىمىنەن بۇرىن توقتاتاتىنىن مالىمدەدى. ونىڭ ورنىنا فەدەراتسيا پرەزيدەنتتىگىنە «سامۇرىق-قازىنا» ۇلتتىق ءال-اۋقات قورى» اق باسقارما توراعاسى نۇرلان جاقىپوۆتىڭ كانديداتۋراسى ۇسىنىلعان. جيىنعا قاتىسۋشىلار, ونىڭ ىشىندە وبلىستىق فەدەراتسيا باسشىلارى مەن سپورت قاۋىمداستىعى وكىلدەرى ءبىراۋىزدان بۇل ۇسىنىستى قولداعان.
مينيستر ەربول مىرزابوسىنوۆ 2019 جىلدان بەرى فەدەراتسيانى باسقارعان اندرەي كريۋكوۆكە اتقارعان جۇمىسى ءۇشىن العىس ءبىلدىرىپ, نۇرلان جاقىپوۆقا جاڭا قىزمەتىنە ساتتىلىك تىلەدى.
«تۋريزم جانە سپورت مينيسترلىگى اتىنان اندرەي كريۋكوۆكە ەلدەگى سۋ سپورتى تۇرلەرىنىڭ دامۋىنا قوسقان ۇلەسى ءۇشىن ريزاشىلىعىمدى بىلدىرەمىن. سۋ سپورتى – قازاقستانداعى ەڭ تانىمال سپورت تۇرلەرىنىڭ ءبىرى. بۇگىندە 120 مىڭنان استام ادام وسى سپورت تۇرىمەن اينالىسادى. ۇلتتىق قۇرامانىڭ حالىقارالىق ارەناداعى جەتىستىكتەرى وسى سپورتتىڭ ەل ىشىندە كەڭىنەن تانىمال بولۋىنا ىقپال ەتتى. دميتري ءبالانديننىڭ 2016 جىلعى ريو وليمپياداسىنداعى تاريحي جەڭىسى جانە بىلتىرعى الەم چەمپيوناتىندا كوركەم جۇزۋدەن ەدۋارد كيم مەن نارگيزا بولاتوۆانىڭ جەڭىسى – سۋ سپورتىنىڭ ەلىمىزدەگى الەۋەتىنىڭ جوعارى ەكەنىن دالەلدەدى. فەدەراتسيانىڭ جاڭا باسشىلىعى بۇل جەتىستىكتەردى ودان ءارى نىعايتىپ, جاڭا بەلەستەرگە جەتەدى دەپ سەنەمىن», دەدى مينيستر.
جيىن سوڭىندا ەربول مىرزابوسىنوۆ نۇرلان جاقىپوۆقا ەلىمىزدەگى سۋ سپورتى تۇرلەرىنىڭ حالىقارالىق ىنتىماقتاستىعىن ارتتىرۋعا, سپورتشىلاردىڭ دايىندىق دەڭگەيىن جاقسارتۋعا جانە سپورتتىق رەزەرۆتى دايارلاۋعا ەرەكشە كوڭىل بولەتىنىنە سەنىم ءبىلدىردى.
