سونىڭ ىشىندە ۇلتتىق ورتالىقتىڭ قورىندا 6 مىڭنان اسا ماتەريال ساقتالسا, ورتالىق عىلىمي كىتاپحانا مەن ادەبيەت جانە ونەر ينستيتۋتىندا 3 600-دەن اسا قولجازبا بار.
تۇركى حالىقتارىنىڭ ورتاق جازبا مۇراسىن زەرتتەپ, ناسيحاتتاۋ ماقساتىندا جول كارتاسى ازىرلەنىپ, ونى مادەنيەت جانە اقپارات مينيسترلىگى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى, سىرتقى ىستەر مينيسترلىگى جانە عىلىم جانە جوعارى ءبىلىم مينيسترلىگىمەن كەلىسىپ بەكىتكەن ەدى. بۇل قۇجات تۇركى حالىقتارىنىڭ جازبا مادەنيەتىن ساقتاپ, ولاردىڭ قولجەتىمدىلىگىن ارتتىرۋعا باعىتتالعان.
اتالعان باعدارلاما اياسىندا ەلدەگى سيرەك قورلاردىڭ بىرىڭعاي رەەسترى قۇرىلىپ, كىتاپحانالار, مۋزەيلەر, جوعارى وقۋ ورىندارى مەن عىلىمي ورتالىقتاردا ساقتالعان قۇندى قولجازبالار مەن سيرەك كىتاپتاردىڭ ءتىزىمى جاسالدى. سونداي-اق تۇركى حالىقتارىنىڭ ورتاق جازۋىن زەرتتەۋ مەن ونىڭ نەگىزىندە قورىتىندى جاساۋ ءۇشىن سالالىق جۇمىس توبى قۇرىلدى. بۇل توپقا ءتيىستى مينيسترلىكتەرمەن قاتار, عىلىم كوميتەتىنىڭ فيلوسوفيا, ساياساتتانۋ جانە ءدىنتانۋ ينستيتۋتى, ۇلتتىق اكادەميالىق كىتاپحانا جانە ۇلتتىق ارحيۆ ماماندارى ەندى.
تۇركى مەملەكەتتەرىنىڭ تسيفرلىق كىتاپحاناسىن قالىپتاستىرۋدا ۇلتتىق ەلەكتروندى كىتاپحانانىڭ www.kazneb.kz پلاتفورماسى ماڭىزدى ءرول اتقارادى. قازىرگى ۋاقىتتا بۇل پلاتفورمادا «تۇركىتىلدەس ەلدەردىڭ كىتاپحاناسى» جوباسى ءساتتى جۇزەگە اسىرىلىپ كەلەدى. جوباعا ا.وسمانوۆ اتىنداعى قىرعىز رەسپۋبليكاسىنىڭ ۇلتتىق كىتاپحاناسى, ساحا رەسپۋبليكاسىنىڭ ۇلتتىق كىتاپحاناسى (ياكۋتيا), ازەربايجان ۇلتتىق كىتاپحاناسى, مولدوۆا رەسپۋبليكاسىنىڭ اتب گاگاۋز اتىنداعى وبلىستىق كىتاپحاناسى, باشقۇرتستان مەن تاتارستاننىڭ ۇلتتىق كىتاپحانالارى, سونداي-اق وزبەك ادەبيەتى پورتالى سەرىكتەستىك ەتىپ وتىر. بارلىق سەرىكتەس ۇيىممەن ىنتىماقتاستىق جونىندە مەموراندۋم جاسالىپ, كىتاپتار مەن تسيفرلىق جيناقتارمەن الماسۋ باستالعان.
اتاپ ايتساق, 2023–2024 جىلدارى جول كارتاسى اياسىندا وزبەكستان رەسپۋبليكاسىنىڭ ورتالىق ازيانى زەرتتەۋ حالىقارالىق ينستيتۋتىنان 122 ەلەكتروندى كوشىرمە, تۇرىك تاريحى مەن مادەنيەتى قورىنان (TÜRKTAV) 138 ەلەكتروندى كوشىرمە الىندى. سونداي-اق تۇرىكمەنستان عىلىم اكادەمياسى ماقتىمق ۇلى اتىنداعى ءتىل, ادەبيەت جانە ۇلتتىق قولجازبالار ينستيتۋتىمەن ىنتىماقتاستىق تۋرالى مەموراندۋم جاسالعان. بۇگىندە 550 قۇجات اۆتوماتتاندىرىلعان اقپاراتتىق كىتاپحانالىق جۇيەگە ەنگىزىلسە, انكاراداعى «Türktav» قورىنان الىنعان 25 مىڭعا جۋىق قۇجات www.kazneb.kz پلاتفورماسىنا جۇكتەلىپ جاتىر.
تۇركىتىلدەس ەلدەردىڭ تسيفرلىق كىتاپحاناسى – مادەني مۇرانى ساقتاۋداعى ماڭىزدى جوبا. ونىڭ اياسىندا قولجازبا مۇرالارىنىڭ ءتىزىمى جاسالىپ, كونە تۇركى, شاعاتاي, اراب (قادىم, ءجاديت, توتە) جازۋلارىنداعى سيرەك كىتاپتار مەن ماتەريالدار قازاق تىلىنە اۋدارىلىپ, تسيفرلاندىرۋ جۇمىستارى اتقارىلىپ جاتىر. جوبا اياسىندا اۆتوماتتاندىرىلعان جۇيەگە قۇجاتتاردى ەنگىزۋ بويىنشا ساراپشىلاردىڭ قاتىسۋىمەن ارنايى مودۋل ازىرلەندى.
تسيفرلىق كىتاپحانانىڭ اشىق رەسۋرستارعا اينالۋى تۇركى حالىقتارىنىڭ مادەنيەتارالىق بايلانىسىن نىعايتىپ, ورتاق قۇندىلىقتاردى ساقتاۋ مەن ناسيحاتتاۋعا ىقپال ەتەرى ءسوزسىز. بۇل جوبا – مادەني ينتەگراتسيانىڭ بىرەگەي ۇلگىسى بولا وتىرىپ, تۇركى حالىقتارىنىڭ بولاشاق ۇرپاقتارىنا رۋحاني مۇرانى جەتكىزۋدىڭ باستى قۇرالىنا اينالادى.
