باتىس قازاقستان وبلىستىق تاريحي-ولكەتانۋ مۋزەيى ۇيىمداستىرعان كورمەدە 80 جۇمىس قويىلعان. ا.پ.بوگوليۋبوۆ اتىنداعى ساراتوۆ كوركەمسۋرەت ۋچيليششەسىن جانە م.وتەمىسوۆ اتىنداعى بقمۋ-دى بىتىرگەن نۇرتاي ەكپىن ۇلى – بۇعان دەيىن دە رەسپۋبليكالىق, حالىقارالىق كونكۋرستاردا لاۋرەات اتانىپ جۇرگەن تانىمال سۋرەتشى. 2020 جىلى كيپردە وتكەن «Kıbrıs Modern Sanat Museum» جوباسىنداعى سۋرەتشىلەر سيمپوزيۋمىنا قاتىسقان.
كورمەگە قويىلعان بوياۋى قانىق, كەڭ كولەمدى كارتينالار كەلۋشىنىڭ جانارىن بىردەن وزىنە تارتىپ, اۆتوردىڭ جۇمباق الەمىنە جەتەلەيدى. مۇنداعى كوپ جۇمىس ەشقانداي كانون, ەرەجە, زاڭدىلىقتارعا باعىنبايتىن, كەرىسىنشە قالىپتاسقان قاعي- دالاردى بۇزىپ جىبەرەتىن سيۋررەاليزم باعىتىندا سالىنعان.
«بۇل تۋىندىلار ادام تابيعاتىن زەرتتەۋگە باعىتتالعان. مەن دەربەس كورمەم ارقىلى ادام بالاسىن ءتۇرلى زياندى ادەتتەردەن اۋلاق بولۋعا, ومىردەن ءوز ورنىن تابا بىلۋگە, ءوز بولمىسىن, تابيعاتىن تانىپ-تۇسىنۋگە شاقىرعىم كەلدى. ويتكەنى ءوزىن-ءوزى زەرتتەمەگەن ادام كوزى بايلاۋلى سوقىرمەن بىردەي عوي», دەيدى اۆتور.
كورمەدەن فيلوسوفيالىق باعىتتاعى كارتينالاردى عانا ەمەس, سونىمەن قاتار وتانسۇيگىشتىككە باۋليتىن پاتريوتتىق تاقىرىپتاعى ءارى الەمدىك ونەر جۇلدىزدارىنا ارناپ جازىلعان تۋىندىلاردى دا تاماشالاۋعا بولادى.
باتىس قازاقستان وبلىسى
