بيىلعى 18 اقپاندا بوكەي ورداسى اۋدانىنا قاراستى ۇيالى اۋىلى ماڭىندا ۇشقىشسىز ۇشاتىن اپپاراتقا ۇقساس قۇرىلعى قۇلاعان بولاتىن.
ودان كەيىن 18 ناۋرىزدا تاسقالا اۋدانىنىڭ قازاقستان اۋىلدىق وكرۋگىندە, اتامەكەن اۋىلىنان 18 شاقىرىم جەردەن ۇزىندىعى 3 مەتر شاماسىندا تاعى ءبىر اپپارات تابىلدى. نىساندى العاش كورگەن تۇرعىندار تۇسىرگەن بەينەجازبادا اپپاراتتىڭ جەر سىزىپ كەلىپ توقتاعان ءىزى بايقالادى.
24 ناۋرىز كۇنى جانىبەك اۋدانى ۇزىنكول اۋىلدىق وكرۋگى اۋماعىندا تاعى دا وسىنداي وقيعا بولدى. ەلدى مەكەننەن شامامەن 8 شاقىرىم قاشىقتىقتا بەلگىسىز اپپاراتتىڭ بولشەكتەرىن اۋىل تۇرعىنى كورىپ, ءتيىستى مەكەمەلەرگە حابارلاعان.
26 ناۋرىز كۇنى جانىبەك اۋدانى ورتالىعىنان 55 شاقىرىم قاشىقتىقتا قامىستى اۋىلى اۋماعىنان تاعى ءبىر اپپاراتتىڭ بولشەكتەرى تابىلعانى جونىندە حابارلاما ءتۇستى.
وسى جاعدايدىڭ بارىندە دە اۋداندىق پروكۋراتۋرا, اۋداندىق پوليتسيا ءبولىمىنىڭ جەدەل توبى, توتەنشە جاعدايلار ءبولىمى, جەرگىلىكتى اتقارۋشى بيلىك جانە اۋداندىق شەكارا باسقارماسىنىڭ وكىلدەرى وقيعا ورنىنا بارىپ, قۇلاعان اپپاراتتاردى الىپ كەتكەن. «وقيعانىڭ ءمان-جايى تەكسەرىلىپ جاتىر» دەگەنمەن, حالىققا ءالى ناقتى اقپارات بەرىلگەن جوق.
بۇگىن, 26 ناۋرىز كۇنى استانادا ءماجىلىس وتىرىسىنا كەلگەن سىرتقى ىستەر ءمينيسترىنىڭ ورىنباسارى الىبەك قۋانتىروۆ جۋرناليستەر ساۋالىنا «بقو اۋماعىنداعى جاعدايعا قاتىستى تەرگەۋ جۇرگىزىلىپ جاتىر. تەحنيكالىق ماسەلەلەر قارالىپ جاتىر, ياعني اپپارات قايدان ۇشتى, قايدا قۇلادى جانە كىمگە تيەسىلى. قۇزىرلى ورگاندار مەن تەحنيكالىق ماماندار زەرتتەپ, انىقتايدى. كەيىن بەلگىلى بولادى», دەپ جاۋاپ بەرگەن.
ال قازاقپارات اگەنتتىگى قر قورعانىس ءمينيسترىنىڭ ورىنباسارى شايح-حاسان جازىقباەۆتىڭ «بقو-داعى ۇشقىشسىز ۇشاتىن اپپاراتتىڭ قۇلاۋ فاكتىسى بويىنشا قۇزىرەتتى ورگاندار تەرگەۋ جۇرگىزىپ جاتىر. تەرگەۋدەن قورعانىس مينيسترلىگى دە تىس قالعان جوق. اۋە قورعانىسى ارقاشان ءبىزدىڭ قاراۋىمىزدا. تەرگەۋدىڭ قورىتىندىسى بويىنشا قاجەت بولسا, قوسىمشا ءىس-شارا قابىلدايمىز. مۇمكىن تەحنيكالىق اقاۋ بولىپ, سىرتقا شىعىپ كەتكەن شىعار, باسقا دا سەبەپ بولۋى مۇمكىن. تەرگەۋ اياقتالعانشا, ناقتى ايتا المايمىز», دەگەن جاۋابىن تاراتتى.
ءمينيستردىڭ ورىنباسارى حالىقتى الاڭداماۋعا شاقىرىپ, جاعدايدىڭ باقىلاۋدا ەكەنىن ايتقان.
باتىس قازاقستان وبلىسى
