25 جىل وتكەن سوڭ ءوز تامىرىن تانىپ-ءبىلۋ ءۇشىن قازاقستانعا ورالعان جىگىت Tengrinews.kz تىلشىسىنە ءوز وقيعاسىن باياندادى.
اقش-تا وسكەن اتا-اناسى وعان پول ساردار بەبكوك دەگەن ەسىم بەردى. “ساردار” ەسىمى وعان قازاقستاندا, پەرزەنتحانادا بەرىلگەن. 20 جاسىندا ول ءوز بيولوگيالىق اتا-اناسىن ىزدەۋدى باستاعان, ال بيىل قاڭتار ايىندا الماتىعا كەلىپ, قازىر قازاق ءتىلىن ۇيرەنىپ ءجۇر.
اقش-تا “حالىقارالىق قاتىناستار” ماماندىعى بويىنشا وقىعان ول, قازىر تۋريستىك كومپانيادا تاعىلىمدامادان وتۋدە. قازاق ءتىلىن ۇيرەنۋدى وزىنە مىندەت ساناعانىمەن, ونىڭ وتە قيىن ەكەنىن مويىندايدى.
- قازاقستاندى مەن ءوز وتانىم دەپ ەسەپتەيمىن. قازاق ءتىلىن ۇيرەنىپ جاتىرمىن, ويتكەنى بۇل مەن ءۇشىن ماڭىزدى. بالالىق شاعىمدا مەنى اسىراپ الدى, سوندىقتان امەريكادا وسكەندە ءوز مادەنيەتىمدى دە, ءتىلىمدى دە بىلمەدىم. قازىر قازاق ءتىلى ماعان وتە قيىن, بىراق كوبىرەك كۇش سالۋ كەرەك دەپ ويلايمىن. قاي ەلدە تۇرساڭ دا, ءوز انا تىلىڭدە سويلەي ءبىلۋ ماڭىزدى. ونى ۇيرەنۋگە تىرىسىپ جاتىرمىن, بىراق بۇل وتە باياۋ جانە قيىن ءجۇرىپ جاتىر. دەگەنمەن ۋاقىت وتە كەلە جەتىستىكتەرگە جەتەمىن دەپ ۇمىتتەنەمىن, – دەيدى پول ساردار.
پول سارداردىڭ ايتۋىنشا, قازاقتار مەن امەريكالىقتاردىڭ ءومىر ءسۇرۋ سالتى ايتارلىقتاي ەرەكشەلەنەدى. قازاقتار وتباسىعا باسا ءمان بەرەدى, ال امەريكالىقتار كوبىنەسە جەكە ومىرگە باعىتتالعان. قازاقستاندا ادامدار باستاپقىدا سۋىق كورىنگەنىمەن, جاقىن تانىسقان سوڭ وتە قامقور بولادى. قازاقتار ويىن اشىق ايتادى, ال اقش-تا مۇنداي تىكەلەي پىكىر ايتۋ ادەتكە ساي ەمەس. سپورتتىق قىزىعۋشىلىقتار دا ءارتۇرلى: قازاقتار بوكس, كۇرەس, فۋتبولدى ۇناتادى, ال امەريكالىقتار امەريكالىق فۋتبول مەن باسكەتبولعا جاقىن.
پول بولاشاقتا قازاق قىزىمەن ۇيلەنىپ, بالالارىن قازاق تىلىندە تاربيەلەگىسى كەلەدى. قازاقستاندا ۇزاق ۋاقىت تۇرىپ, مادەنيەتىن تەرەڭىرەك ءتۇسىنۋدى قالايدى. سونىمەن قاتار اقش پەن قازاقستان اراسىندا جۇمىس ىستەۋگە مۇمكىندىك بەرەتىن ماماندىق تاپقىسى كەلەدى.
پول تۋعان اتا-اناسىن بەس جىلدان بەرى ىزدەپ ءجۇر, بىراق ازىرگە ناتيجە جوق. ول تارازداعى بالالار ۇيىنە بارىپ, جۋرناليستەردىڭ كومەگىمەن ىزدەۋ جۇمىستارىن جۇرگىزگەن. الايدا اناسى ونى نە سەبەپتى تاستاپ كەتكەنى جانە كەزدەسۋگە دايىن با, ول جاعى با بەلگىسىز. سوعان قاراماستان, ول اتا-اناسىن تابۋدان ءۇمىتىن ۇزبەي كەلەدى.
