وبلىستىق دەنەشىنىقتىرۋ جانە سپورت باسقارماسىنىڭ باسشىسى مەيرامبەك ماحامبەتوۆتىڭ ايتۋىنشا, اقتوبە وبلىسىندا ۇلتتىق سپورت تۇرلەرى جاقسى دامىپ كەلەدى. ء«بىزدىڭ سپورتشىلار اراسىندا ەل چەمپيوناتىندا ۇزدىك شىققان, ازيا, الەم چەمپيوناتتارىندا ۇزدىك تانىلعان سپورتشىلارىمىز دا بار. كوكپار اۋداندارىمىزدا ەرەكشە قارقىنمەن دامىپ كەلەدى. ات بايگەسىنەن جەتىستىكتەرىمىز كوپ. ۇلتتىق سپورت كۇنىنە وراي قالادا, اۋدان ورتالىقتارىندا ۇلتتىق سپورت تۇرلەرىنەن ءىس-شارالار ءوتىپ جاتىر. بۇركىتشىلەرىمىز اۋدانداردا ءجۇر», دەيدى م. ماحامبەتوۆ.
كورمەگە تازىلارىن الىپ كەلگەن «قۇماي تازى» قوعامدىق فەدەراتسياسىنىڭ پرەزيدەنتى ورالبەك ماقاتوۆتىڭ دا ايتارى بار. وسى قوعامدىق ۇيىم 2022 جىلى قۇرىلعان. قازىر 100-دەن استام مۇشەسى بار. «2022 جىلى 1 قاراشادا اقتوبە وبلىسىندا 443 تازى تىركەلسە, بۇگىندە ولاردىڭ سانى 700-گە جەتتى. وڭىرىمىزدە قۇماي تازىنىڭ جارعاق جانە شاشاقتى تۇقىمدارى بار. بۇلاردىڭ ەرەكشەلىگى, جارعاق تازىنىڭ قۇلاعىندا شاشاعى, اياعىندا تۇگى جوق بولسا, شاشاقتى تازىنىڭ قۇلاعىندا شاشاعى, اياعىندا تۇگى بولادى. ءبىز ۇزاق جىلدان بەرى تازىلاردى وسىرۋمەن كاسىبي تۇردە اينالىسپادىق. قازاقستان كينولوگتەر وداعى دا بەلسەندى بولعان جوق. وتىز جىلدىڭ ىشىندە پاتەنت الۋعا بولاتىن ەدى. بىزگە دەيىن تازى تۇقىمىنا ءتورت ەل پاتەنت العىسى كەلدى. ءبىرىنشىسى – «سۇلتان تازى» دەپ پاتەنت العىسى كەلگەن تۇركيا بولسا, ەكىنشىسى قىرعىزدار, ءۇشىنشىسى «وڭتۇستىك ۋرال» تۇقىمى» دەپ رەسەي فەدەراتسياسى دا پاتەنت الۋعا ۇمتىلدى. بىلتىر قۇماي تازىمىزعا پاتەنت العانىمىز ساتتىلىك دەپ تۇسىنەمىن. تازى – قانىنا اڭشىلىق قاسيەت سىڭگەن, ۇيرەتكەندى بىردەن قاعىپ الاتىن امبەباپ جانۋار. بابالارىمىزعا بەس مىڭ جىلدان بەرى جىلقىمىز بەن تازىمىز سەرىك بولعان. ءوز باسىم ءبىر تازىنىڭ كۇتىمىنە ايىنا 15 مىڭ تەڭگە جۇمسايمىن. بۇرىن اتالارىمىز ءۇيدىڭ ىرگەسىندە ۇستاسا, ءبىز جىلى ۇيشىكتە ۇستايمىز. نەگىزى دالانى جاقسى كورەدى. كەيدە تاۋىق جەيدى, قويعا شابادى دەپ ايتادى. ونىڭ سەبەبى, تازىنىڭ كۇشى سىيماي بارا جاتقان سوڭ, جۇگىرگەن زاتتىڭ بارىنە اۋەس. مەن اپتاسىنا ەكى رەت 40–50 شاقىرىم جۇگىرتەمىن. كەيدە ساياتشىلىققا شىعامىز. قويان, تۇلكى, بورسىق, قارساق الادى», دەيدى ول.
ۇلتتىق سپورت تۇرلەرىنەن سايىسقا شىققاندارعا ءبىرىنشى ورىنعا 200 مىڭ, ەكىنشى ورىنعا 100 مىڭ, ءۇشىنشى ورىنعا 50 مىڭ تەڭگەدەن جۇلدە قورى بەكىتىلدى. قازاق كۇرەسى سايىسىنا 80 كيلو سالماقتان جوعارى بالۋاندار, ارقان تارتۋعا دجيۋ-دجيتسۋ, مما, قازاق كۇرەسى, گرەك-ريم كۇرەسىنىڭ سپورتشىلارى قاتىستى.
اقتوبە وبلىسى
