جالپى, وڭىردە بيىل 1,2 ملن اعاش وتىرعىزۋ, ونىڭ ىشىندە 631 ءتۇپ اعاشتى كوكتەم مەزگىلىندە وتىرعىزۋ جوسپارلانعان. اقپاننىڭ اياعىندا باستالعان جۇمىس ناتيجەسىندە وتىرعىزىلعان 200 مىڭنان استام اعاش سۋ جۇيەسىمەن قامتاماسىز ەتىلىپ, قورشاۋ جاسالدى.
وبلىس اكىمى نۇرالحان كوشەروۆتىڭ توراعالىعىمەن وتكەن اپپارات ماجىلىسىندە «TazaQazBot» اقپاراتتىق جۇيەسىنە تۇسكەن 1 527 ءوتىنىمنىڭ 1 505-ءى ورىندالعانى ءمالىم ەتىلدى. بيىل قوعامدىق ورىنداردا سانيتارلىق تالاپتاردى ساقتاماعاندارعا 4 487 حاتتاما تولتىرىلعان. بارلىق اۋدان, قالا اكىمدىكتەرى, مەملەكەتتىك كوممۋنالدىق كاسىپورىنداردىڭ ءتيىستى قۇجاتتارىنا قاتتى تۇرمىستىق قالدىقتاردى جيناۋ, شىعارۋ ماسەلەسى جونىندە تولىقتاي وزگەرىستەر ەنگىزىلگەن. ناۋرىز ايىندا وتكىزىلەتىن مەرەكەلىك باعدارلامالاردا تازالىققا, كوگالداندىرۋ جۇمىسىنا دا ەرەكشە ءمان بەرىلەدى. مىسالى, سايرام اۋدانىندا «جاسىل جەلەك» ءىس-شاراسىندا 12 مىڭنان اسا اعاش كوشەتى وتىرعىزىلدى. وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسى سايرام اۋدانى بويىنشا بەكىتكەن, 2023–2025 جىلدارعا ارنالعان ەلدى مەكەندەردى كوگالداندىرۋدىڭ ءىس-شارا جوسپارىنا سايكەس, بيىل كوكتەمدە 23 300 ءتۇپ كوشەت وتىرعىزۋ جوسپارلانعان.
وبلىستا بيىلعى جوسپارعا سايكەس, ەلدى مەكەندەرگە 1 ملن-نان استام كوشەت ۇلەستىرۋ كوزدەلگەن. بۇگىندە 206 375 ءتۇپ كوشەت اۋدان-قالا اكىمدىكتەرىنە جونەلتىلگەن. تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى قايرات ابدۋاليەۆتىڭ مالىمدەۋىنشە, وڭىردە 3 ملن 472 مىڭ گەكتاردى قۇرايتىن مەملەكەتتىك ورمان قورى بار.
«مەملەكەت باسشىسىنىڭ «جاڭا جاعدايداعى قازاقستان: ءىس-قيمىل كەزەڭى» اتتى جولداۋىندا رەسپۋبليكا كولەمىندە 2 ملرد اعاش وتىرعىزۋدى تاپسىرعان بولاتىن. تاپسىرماعا سايكەس, وبلىستىڭ ورمان قورى جەرلەرىنە 2021–2027 جىلدارى 110 مىڭ گەكتارعا 170 ملن كوشەت ەگۋ جۇمىسىنا قاتىستى ارنايى كەشەندى جوسپار بەكىتىلگەن. سول جوسپارعا سايكەس, 2021–2024 جىلدار ارالىعىندا 79 مىڭ گەكتار جەرگە 117 ملن ءتۇپ كوشەت ەگىلدى. 2025–2027 جىلدارى ارالىعىندا قالعان 31 مىڭ گەكتار جەرگە 53 ملن ءتۇپ كوشەت ەگۋ جۇمىسى تولىعىمەن جۇرگىزىلەدى. وتكەن جىلى ورمان شارۋاشىلىعى مەكەمەلەرىندە جالپى كولەمى 343 گەكتاردى قۇرايتىن 24 ورمان تۇقىمباعىندا 30 ملن-عا جۋىق كوشەت ءوسىرىلىپ, 10 ملن-نان استام كوشەت ەگىلدى», دەدى باسقارما باسشىسى.
«وتىرار ورمان جانە جانۋارلار الەمىن قورعاۋ جونىندەگى مەملەكەتتىك مەكەمەسىندەگى» تۇقىمباقتا وسىرىلگەن كوشەتتەر تۇركىستان, ارىس قالالارى مەن وتىرار اۋداندارىن كوشەتپەن قامتىپ وتىر. ون گەكتار القاپتى الىپ جاتقان قوعام اۋىلىنداعى تۇراقتى تۇقىمباقتا قاراعاش, ورىك, ۇيەڭكى, شاعان, جيدە, قىلقان جاپىراقتى تاعى باسقا اعاش تۇرلەرى وسىرىلەدى. تۇقىمباقتى دامىتۋ ماقساتىندا بيىل گۇلدى, سيرەك كەزدەسەتىن ساندىك اعاشتاردى ءوسىرۋ كوزدەلىپ وتىر. مەكەمە تۇقىمباعىنان اۋدان, قالا ەلدى مەكەندەرىن كوگالداندىرۋ جۇمىستارىنا وتكەن جىلدىڭ كۇز مەزگىلىندە 117 820 ءتۇپ اعاش-بۇتا كوشەتى بوساتىلدى. سونداي-اق تۇقىمباقتا تازالىق شارالارى قارقىندى جۇرگىزىلىپ كەلەدى. «تازا قازاقستان» باعدارلاماسى اياسىندا سەنبىلىكتەر ۇيىمداستىرىلىپ, ورمانشىلار تۇقىمباق اۋماعىندا رەتسىز وسكەن شوپتەردى ج ۇلىپ, قۋراعان تالداردى بۇتالاپ, اعاش تۇپتەرىن اكتەپ جاتىر. جالپى, جىل سايىن ورمانشىلار تۇقىمباقتى تازالاپ, جاسىل جەلەكتەردى كوكتەم-كۇز ايلارىندا بوساتۋعا دايىندايدى.
تۇركىستان وبلىسى
