فوتو: قىرمىزى جۇماعاليقىزى
بۇگىن, جاڭارۋ مەن جاقسىلىقتىڭ بەلگىسى بولعان ناۋرىز مەيرامىنا وراي, تۇركىستاننىڭ «كەرۋەن ساراي» كەشەنىندە ۇلكەن مەرەكەلىك شارا ۇيىمداستىرىلىپ, قالا تۇرعىندارى مەن قوناقتارىنا كەرەمەت كوڭىل-كۇي سىيلادى. ۇلتتىق ءداستۇرىمىزدى دارىپتەيتىن, اتا-بابامىزدىڭ اسىل مۇراسىن جاڭعىرتاتىن بۇل مەيرام بىرلىك پەن تاتۋلىقتىڭ سيمۆولىنا اينالدى دەسەك تە بولادى.
مەرەكەلىك شارانىڭ اشىلۋ سالتاناتىندا وبلىس اكىمى نۇرالحان كوشەروۆ جينالعان جۇرتشىلىقتى ناۋرىز مەيرامىمەن قۇتتىقتاپ, بۇل كۇننىڭ حالقىمىز ءۇشىن قانشالىقتى ماڭىزدى ەكەنىن اتاپ ءوتتى.
« ۇلىستىڭ ۇلى كۇنى حالقىمىزعا قۇت-بەرەكە, مولشىلىق اكەلسىن! تاۋەلسىزدىگىمىز تۇعىرلى, ىرىسىمىز ۇزاعىنان بولسىن!», دەدى ايماق باسشىسى.
ناۋرىز مەيرامى – تەك تابيعاتتىڭ جاڭارۋىمەن عانا ەمەس, ادامنىڭ رۋحاني جاڭعىرۋىمەن دە استاساتىن ەرەكشە كۇن. بۇل كۇنى رەنجىسكەن جاندار تاتۋلاسىپ, باۋىرمالدىق پەن دوستىق ارتادى. وسى ءداستۇردى ۇلىقتاعان شارا بارىسىندا جينالعان كوپشىلىك ءبىر-بىرىنە اق جارما تىلەكتەرىن جاۋدىرىپ, مەرەكەنىڭ ءسانىن كەلتىردى.
كۇننىڭ شۋاعىنداي جىلىلىق پەن قۋانىشقا تولى بۇل مەرەكە ۇلتتىق ويىندارمەن, اسەم ءان مەن كوركەم بيمەن ايشىقتالدى. الاڭعا تىگىلگەن كيىز ۇيلەر قازاق حالقىنىڭ تۇرمىس-سالتىن ايشىقتاپ, ءار ءۇيدىڭ تورىندە قازاقتىڭ قاسيەتتى داستارقانى جايىلدى. قوناقتار ناۋرىز كوجە مەن باسقا دا ۇلتتىق تاعامداردان ءدام تاتىپ, اق جاۋلىقتى انالاردان باتا الدى.
مەرەكەلىك شارا اياسىندا قازاقتىڭ باي مادەنيەتىن تانىتاتىن ءتۇرلى باعدارلامالار ۇيىمداستىرىلدى. سونىمەن قاتار الاڭداعى جينالعان جۇرت دومبىرا ۇنىنە قوسىلىپ, حالىق اندەرىن شىرقاپ, قازاق حالقىنىڭ ۇلتتىق بولمىسىن ايقىندايتىن سالت-ءداستۇر كورىنىستەرىن تاماشالادى.
مەرەكەنىڭ باستى نىشانى – ناۋرىز كوجە كوپشىلىككە ۇسىنىلىپ, مەرەكەگە جينالعاندار ىرىس پەن مولشىلىقتىڭ ءدامىن تاتتى. داستارقان باسىندا اقساقالدار مەن ەل اعالارى باتا بەرىپ, حالقىمىزدىڭ «ىرىس الدى – ىنتىماق» دەگەن ءسوزىن تاعى ءبىر دالەلدەگەندەي بولدى.
قازاق حالقى ءۇشىن ناۋرىز – تەك كوكتەم مەرەكەسى عانا ەمەس, بىرلىك پەن مەيىرىمنىڭ, دوستىق پەن ىزگىلىكتىڭ سيمۆولى. بۇگىنگى شارا دا وسى قۇندىلىقتاردى دارىپتەپ, كوپشىلىكتىڭ جۇرەگىنە جىلۋلىق ۇيالاتتى.
