قورشاعان ورتانى قورعاۋ, ەكولوگيالىق مادەنيەتتى قالىپتاستىرۋ ماقساتىندا جۇزەگە اسىرىلاتىن اكتسيا «بايتەرەك» شاعىن اۋدانىنداعى №3 مەكتەپ-ليتسەيدەن باستاۋ الدى. مۇندا وبلىس باسشىسى ليتسەي وقۋشىلارىمەن بىرگە 150 كوشەت وتىرعىزدى.
«TazaLike» اكتسياسى سودان سوڭ ەلىمىزدەگى ەڭ ءىرى شاعىن اۋدان ساناتىنا ەنگەن « ۇلى دالا» ىقشام اۋدانىندا جالعاستى. جاڭا ىقشام اۋدانداعى ءىس-شاراعا وبلىستىق, تاراز قالالىق ارداگەرلەر كەڭەسىنىڭ مۇشەلەرى, ءماسليحات دەپۋتاتتارى, زيالى قاۋىم, قۇقىق قورعاۋ ورگاندارىنىڭ وكىلدەرى, سپورتشىلار مەن بەلسەندى جاستار قاتىستى. رەسمي دەرەكتەرگە سۇيەنسەك, « ۇلى دالا» شاعىن اۋدانىندا 500 دانا كوشەت ەگىلدى.
وڭىردە باستاۋ العان «TazaLike» اكتسياسى «تازا قالا» ءىس-شاراسىنا ۇلاستى. تاراز, جاڭاتاس, قاراتاۋ, شۋ قالالارىنىڭ تۇرعىندارى كۇل-قوقىستاردى شىعارىپ, ارىق-اتىزدار مەن كانالداردى قوقىستان تازارتتى.
وبلىس اكىمدىگىنىڭ ءباسپاسوز قىزمەتى كەلتىرگەن دەرەككە جۇگىنسەك, 20, 27 ناۋرىز كۇندەرى «بۇكىل قازاقستاندىق اعاش وتىرعىزۋ», «جاسىل قالا», «قالاعا ارنالعان اعاش» اكتسيالارى ۇيىمداستىرىلادى. ءىس-شارا بارىسىندا ءوڭىردىڭ بارلىق اۋداندارىندا جاپپاي كوشەت وتىرعىزۋ ءىسى قولعا الىنباق. 15 ناۋرىزدا باستالعان «TazaLike» اكتسياسى 20 ساۋىرگە دەيىن جالعاسادى. وعان ءوڭىردىڭ بارلىق اۋدانى ۇلەس قوسادى. ناتيجەسىندە, 7 مىڭنان اسا كوشەت وتىرعىزىلادى.
«تازا قازاقستان» ەكولوگيالىق اكتسياسى اياسىندا بيىل اۋقىمدى جۇمىستار اتقارىلادى. وڭىردە كوگالداندىرۋ جۇمىسىنا 1,2 ملرد تەڭگە قارجى قاراستىرىلعان.
«وبلىس ورتالىعى تاراز قالاسىندا «Jambyl Cement» كومپانياسىنىڭ ىقپال ەتۋىمەن 3,6 مىڭ, «تاراز مەتاللۋرگيالىق زاۋىتى» ۇجىمىنىڭ قولداۋىمەن 10 مىڭ, «Qazaq soda» كومپانياسىنىڭ اتسالىسۋىمەن 27 مىڭ كوشەت وتىرعىزۋ جوسپارلانعان», دەيدى وبلىس اكىمىنىڭ ورىنباسارى قاناتبەك مادىبەك.
وڭىردەگى كوگالداندىرۋ جۇمىستارى ىلكى ساتكە دە توقتاماق ەمەس. بيىل تاراز قالاسى مەن اۋدانداردا 195 مىڭ كوشەت وتىرعىزۋ جوسپارلانعان. سونداي-اق ەگىلگەن كوشەتتەردى تسيفرلاندىرۋ جۇمىسى دا جوسپارعا ساي جۇزەگە اسىرىلىپ جاتىر.
«بۇگىنگە دەيىن «بولاشاقتى بىرگە وتىرعىزامىز» اكتسياسىن وتكىزىپ ۇلگەردىك. ناتيجەسىندە, 28,9 مىڭ كوشەت ەگىلدى. وعان 381 مەكتەپتىڭ 47,8 مىڭ ءبىلىم الۋشىسى اتسالىستى. الداعى ۋاقىتتا «ۇلگىلى اۋىل», «ۇلگىلى اۋلا» بايقاۋلارى ۇيىمداستىرىلادى. وسىلايشا, تۇرعىنداردى كوشەت وتىرعىزۋعا ىنتالاندىرامىز», دەيدى وبلىس اكىمىنىڭ ورىنباسارى.
جامبىل وبلىسى
