حالىقتىڭ جادىندا ايگىلى قىز جىبەك رولىمەن ماڭگى قالعان مەرۋەرت قاراتايقىزىنىڭ ماراپاتى باتىس قازاقستان وبلىستىق ءماسليحاتىنىڭ كەزەكتەن تىس وتكەن 17-سەسسياسىندا تاپسىرىلدى. ماراپاتتاۋ راسىمىنە ءوڭىر باسشىسى ناريمان تورەعاليەۆ قاتىستى.
مەرۋەرت وتەكەشوۆا 1951 جىلى 25 اقپاندا جانىبەك اۋدانىندا دۇنيەگە كەلگەن. 1968 جىلى الماتى قالاسىندا مەكتەپ ءبىتىرىپ, سول جىلى «قىز جىبەك» ءفيلمىنىڭ باستى ءرولىن ويناۋعا شاقىرىلعان. 1973 جىلدان كۇنى بۇگىنگە دەيىن مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىندا قىزمەت ەتىپ كەلەدى.
وبلىستىق ءماسليحات دەپۋتاتتارىنىڭ الدىندا ءسوز العان مەرۋەرت قاراتايقىزى قۇرمەتتى اتاققا ۇسىنعان جەرلەستەرىنە العىس ايتىپ, ومىردەن وتكەن جارى قۇمان تاستانبەكوۆتى ەسكە الدى.
– كەشە عانا, ناۋرىزدىڭ 10-ى كۇنى, قۇماننىڭ تۋعانىنا 80 جىل تولدى. باياعىدا قۇمان ەكەۋمىز باتىس قازاقستان وبلىسىنىڭ تالاي اۋىلىن ارالاپ, تالانتتى بالالاردى ىزدەپ ەدىك, حالىقتىڭ كوڭىلىن تالاي كوتەرىپ ەدىك. قۇمان دا باتىس قازاقستاندى جاقسى كورەتىن. جول قيىندىعىنا قاراماي ەل ارالاپ, كەزدەسۋ جاسايتىن ەدىك. بىزگە اسىرەسە اۋىلدان ۇزاي المايتىن ۇلكەن كىسىلەر قاتتى ريزا بولاتىن. مەن بۇگىن قاتتى تولقىپ تۇرمىن. قاي جەردە جۇرسەم دە باتىس قازاقستانداي حالقىم, تۋعان جەرىم بار ەكەنىنە قۋانامىن. حالىق ءۇشىن شارشاماي ءالى قىزمەت ەتىپ ءجۇرمىن. حالقىمنىڭ ءبىر كادەسىنە ءالى جاراپ جۇرگەنىم – مەن ءۇشىن باقىت, – دەدى ايگىلى كينوشەبەرى كوزىنە جاس الىپ تۇرىپ.
ءدال وسى كۇنى مەملەكەتتىك قىزمەت سالاسىندا ەسەلى ەڭبەگىمەن تانىلعان ميربولات جاقىپوۆ پەن تابىلعالي ساپاروۆقا دا «باتىس قازاقستان وبلىسىنىڭ قۇرمەتتى ازاماتى» اتاعى بەرىلدى.
باتىس قازاقستان وبلىسى
