2021 جىلى قۇرىلعان ءبىلىم بەرۋ پلاتفورماسى – CodiPlay قىزمەتىنىڭ الەمدە 1 ميلليوننان استام قولدانۋشىسى بار. پلاتفورما ۇلىبريتانيا, وڭتۇستىك كورەيا, تۇركيا جانە بىرىككەن اراب امىرلىكتەرى مەكتەپتەرىنىڭ وقۋ باعدارلاماسىنا ەنگەن.
CodiPlay كومپانياسىنىڭ قازاقستانداعى كەڭسەسىنىڭ ديرەكتورى اليار كاديكەنوۆتىڭ ايتۋىنشا, قازىرگى كەزدە قالاداعى 100-دەن استام مەكتەپتە وقۋشىلار تسيفرلىق تەحنولوگيالارعا بەيىمدەلىپ, جاڭا تەحنولوگيانىڭ قىر-سىرىن مەڭگەرىپ جاتىر. اتاپ وتكەندەي, وقۋشىلار وتە العىر ءارى تسيفرلىق جوبالارعا بارىنشا يكەمدى. ولار 1-سىنىپتان-اق العاشقى جوبالارىن جاساپ, ناتيجەسىن ينتەراكتيۆتى قۇرىلعىلار تۇرىندە باقىلاۋعا ماشىقتاندى.
«بالالار CodiPlay جوباسى اياسىندا لوگيكا مەن الگوريتم نەگىزدەرىنەن باستاپ, جەكەلەگەن ازىرلەمەلەردى جاساۋعا العاشقى قادامداردى ۇيرەنەدى. باعدارلامانى قابىلداۋىنا, دەڭگەيىنە قاراماستان, ماتەريالدى جىلدام يگەرۋ مۇمكىندىگى باسىم. ناتيجەسىندە وقۋشىلار تسيفرلىق ورتاعا تەز بەيىمدەلىپ, پلاتفورمانىڭ ينتەرفەيسىن وڭاي مەڭگەرىپ, باعدارلامالاۋدى جىلدام مەڭگەرىپ جاتىر» دەيدى ول.
CodiPlay مەملەكەتتىك قىزمەتتەرمەن جۇمىس جونىندەگى دەپارتامەنتىنىڭ ديرەكتورى نۇرعالي تۇرىمبەتوۆتىڭ ايتۋىنشا, جوبانىڭ باستى ماقساتى – وقۋشىلاردى تسيفرلاندىرۋعا بەيىمدەۋ. باعدارلامالاۋ ارقىلى وقۋشىلار لوگيكالىق جانە كرەاتيۆتى ويلاۋىن, جاڭا تەحنولوگيالارمەن جۇمىس ىستەۋ قابىلەتىن دامىتاتىن بولادى. ولاردىڭ قاتارىنان بولاشاقتىڭ IT-ماماندارى شىعاتىنى انىق. جوبا بارىسىنان اڭعارىلعانىنداي, وقۋشىلاردىڭ تسيفرلى بىلىمگە دەگەن قىزىعۋشىلىعى جوعارى. ءبىرى ويىن نەمەسە انيماتسياعا جاساۋعا بەيىم بولسا, ەندى ءبىرى تسيفرلىق الەمنىڭ وزگە سالالارىن يگەرۋگە قۇشتار.
اتاپ وتكەندەي, پرەزيدەنتتىڭ 100 مىڭ IT-مامان دايارلاۋ تاپسىرماسىنا سايكەس CodiPlay سياقتى EdTech جوبالاردىڭ ماڭىزى جوعارى. مۇنداي كومپانيالار ءبىلىم بەرۋ تەحنولوگيالار نارىعىنداعى باسەكەلەستىكتىڭ ارتۋىنا ىقپال ەتەدى. ءبىلىم بەرۋ ونىمدەرى نەعۇرلىم كوپ بولعان سايىن, ساپالى شەشىمدەردىڭ العا وزىپ شىعاتىنى انىق. سوندىقتان كومپانيا ماماندارى CodiPlay جوباسى ارقىلى ساپالى كونتەنت قالىپتاستىرىپ, وقىتۋدا جوعارى تيىمدىلىككە قول جەتكىزبەكشى.
