ناۋرىزناما ونكۇندىگىنە سايكەس, «قايىرىمدىلىق كۇنى» ءوزارا سىيلاستىق پەن تاتۋ كورشىلىك تاقىرىبىنا ارنالعان. بۇل كۇنى ەل اۋماعىندا ادامگەرشىلىك قۇندىلىقتاردى نىعايتۋعا باعىتتالعان, جاناشىرلىق, مەيىرىمدىلىك, ىزگىلىك سياقتى اسىل قاسيەتتەردى تۋ ەتكەن قايىرىمدىلىق شارالارى وتەدى. ادەتتە ادامدار جەتىم-جەسىرگە, مۇقتاج جاندارعا قايىرىمدىلىق كومەك كورسەتىپ, قولداۋ بىلدىرەدى.
ەستەرىڭىزگە سالا كەتسەك, بىلتىر پرەزيدەنت قاسىم-جومارت توقاەۆتىڭ باستاماسىمەن ناۋرىز مەيرامىن تويلاۋدىڭ جاڭا فورماتى – ناۋرىزناما ونكۇندىگى ەنگىزىلىپ, مەرەكەنىڭ جاڭا لوگوتيپى بەكىتىلگەن. ۇلىستىڭ ۇلى كۇنىن جاڭا فورماتتا تويلاۋ كونەدەن تامىر تارتقان مەرەكەنىڭ ماعىناسىن تەرەڭدەتىپ, ءمانىن اشا تۇسپەك. حالقىمىزدىڭ مادەني مۇراسىنا اينالعان ناۋرىز مەيرامىن تويلاۋ 14-23 ناۋرىز ارالىعىندا جالعاسادى.
14 ناۋرىز – «كورىسۋ كۇنى – امال مەرەكەسى». بۇل كۇنى ادامدار ءبىر-بىرىمەن ەمەن-جارقىن قاۋىشىپ, ىزگى تىلەكتەرىن ايتادى.
15 ناۋرىز – «قايىرىمدىلىق كۇنى». بۇل كۇنى جاناشىرلىق پەن ءوزارا قول ۇشىن بەرۋ قۇندىلىقتارىن قالىپتاستىرۋعا باعىتتالعان جاپپاي قايىرىمدىلىق شارالارى وتەدى.
16 ناۋرىز – «مادەنيەت جانە ۇلتتىق سالت-ءداستۇر كۇنى». بۇل كۇن مادەني مۇرانى, ونەردى جانە ۇلتتىق سالت-داستۇرلەردى ناسيحاتتاۋعا ارنالعان.
17 ناۋرىز – «شاڭىراق كۇنى». بۇل كۇنى ۇلگىلى وتباسىلارعا, ادامگەرشىلىك تاربيە ماسەلەلەرىنە ارنالعان ءىس-شارالار وتەدى.
18 ناۋرىز – «ۇلتتىق كيىم كۇنى». بۇل كۇنى ستيلدەندىرىلگەن ءسان كورسەتىلىمدەرى مەن فەستيۆالدار وتەدى.
19 ناۋرىز – «جاڭارۋ كۇنى». بۇل كۇنى كوكتەمگى اعاش وتىرعىزۋ ءداستۇرى جالعاسىن تابادى.
20 ناۋرىز – «ۇلتتىق سپورت كۇنى». بۇل كۇنى ۇلتتىق سپورت تۇرلەرىنەن جارىستار مەن تۋرنيرلەر وتەدى.
21 ناۋرىز – «ىنتىماق كۇنى». بۇل كۇن قازاقستان حالقىنىڭ بەيبىتشىلىگى مەن بىرلىگىن بەينەلەيدى.
22 ناۋرىز – «جىل باسى». بۇل كۇننىڭ ونىڭ اياسىندا بۇقارالىق ءىس-شارالار مەن حالىقتىق مەرەكەلەر وتەدى.
23 ناۋرىز – «تازارۋ كۇنى». سۋ كوزدەرىن ارشىپ, اۋلالاردى قاردان جانە قوقىستان تازالاۋ بويىنشا جاپپاي ءىس-شارالار وتەدى.
