ەڭبەك جولىن جوعارى وقۋ ورنىندا مۇعالىم بولىپ باستاعان كەيىپكەرىمىزدىڭ كەدەن سالاسىنا كەلۋى كەزدەيسوق ەمەس. تاعدىر قوسقان سەرىگى بولات مۇسابەكوۆتىڭ جۇمىس بابىمەن شەكارا شەبىندەگى دوستىق بەكەتىنە قونىس اۋدارىپ, قالالىق جايلى ءومىردى ارتقا تاستاعان ەرلى-زايىپتىلار ارمانعا بىرگە قانات قاققان. بولات – كەدەن ينسپەكتورى, بيبىگۇل مەكتەپكە مۇعالىم بولىپ ورنالاستى. ايسۇلۋ مەن ءجۇسىپ ەسىمدى ۇل-قىزدارى ءومىر ەسىگىن اشتى.
ول كەزدە قىتاي شەكاراسىنا جاقىن ستانساعا كەدەندىك ينسپەكتور بولىپ قىزمەتكە تۇرعان جاس ماماندى الدا قانداي سىناق كۇتىپ تۇرعانى بەيمالىم ەدى. ومىرگە قۇشتار ازاماتتىڭ ارمانى دوستىق-ءۇشارال تاس جولىنداعى قارلى بوراندا ءۇزىلدى. قاپيادا جارىنان ايىرىلۋ بيبىگۇلگە ۇلكەن سوققى بولدى. «قايعىنى كوتەرگەن ادام شىڭدالادى» دەگەندەي, كەلەر كۇننەن ءۇمىت ۇزبەگەن ول شيەتتەي ەكى بالاسىنىڭ بولاشاعى ءۇشىن كۇيەۋىنىڭ جۇمىسىن جالعاستىرۋعا بەل بۋدى. 2002 جىلى كەدەن سالاسىنداعى جاۋاپكەرشىلىگى مول جۇمىسقا كىرىستى. سول ساتتەن باستاپ ونىڭ ءومىرى جاڭا ارناعا ءتۇستى.
«وتكەن كۇندەردىڭ ەلەسىن شولىپ وتكەندە, كوڭىلگە كوپ وي ورالادى. باسقا تۇسكەن سىناق ادامدى قايراتتاندىرادى ەكەن. وكپەك جەلدىڭ وتىندە ءجۇرىپ, العا ۇمتىلدىم. قۇلادىم, قايتا تۇردىم. قۇداي ادامعا كوتەرە المايتىن سىناق بەرمەيدى دەگەنى راس ەكەن. ازاماتىمنىڭ وشاعىن وشىرمەي, ۇل-قىزىن اياقتاندىرىپ, ادال ەڭبەگىمنىڭ جەمىسىن كورىپ وتىرمىن», دەيدى بيبىگۇل تۇرىسبەكقىزى.
دوستىق ستانساسىنداعى جۇمىسىن 2012 جىلعا دەيىن جالعاستىرىپ, سول جىلى كەدەن قىزمەتى قايتا ۇيىمداستىرىلعان تۇستا الماتى وبلىسى بويىنشا مەملەكەتتىك كىرىستەر دەپارتامەنتىنىڭ باس مامانى قىزمەتىنە كىرىستى. ەڭبەگى جانعان بىلىكتى ماماندى ارىپتەستەرى مەن ورتاسى ءوز ءىسىنىڭ بىلگىرى رەتىندە قۇرمەتتەيدى. قىزمەت جولى 2013 جىلى قورعاس كەدەنىندە باس مامان, كەيىنىرەك «قورعاس-شىعىس قاقپاسى» حالىقارالىق ىنتىماقتاستىق ورتالىعىندا, قالجات كەدەن بەكەتىندە جالعاسىن تاپتى.
شەكارا شەبىندە ەڭبەك ەتۋ ۇلكەن كۇشتى قاجەت ەتەدى. قاجىر-قايراتىڭ مەن دەنساۋلىعىڭدى دا سارپ ەتەتىن ساتتەر از ەمەس. 2022 جىلى التىنكول كەدەن بەكەتىندە قىزمەت اتقارىپ جۇرگەندە بيبىگۇل تۇرىسبەكقىزى مي ارتەريالارىنىڭ ترومبوزىنان ينسۋلت الدى. بۇل وعان اۋىر سىناق بولدى, بىراق مىقتى ەرىك-جىگەرى مەن وتباسىنىڭ قولداۋى وعان دەم بەردى. سىرقاتىنان ايىعىپ, سۇيىكتى جۇمىسىنا قايتا ورالدى. بۇگىندە جەتىسۋ وبلىسىنداعى «التىنكول جول» كەدەن بەكەتىندەگى قىزمەتىن جالعاستىرىپ جاتىر.
ءوز ىسىنە جانىمەن بەرىلگەن مامان ۇزاق جىلعى ەڭبەگىنىڭ ارقاسىندا زور قۇرمەتكە يە بولدى. كەدەن ورگاندارىنداعى 10, 20 جىل ءمىنسىز قىزمەتى ءۇشىن مەدالدارىمەن, كەدەن قىزمەتىنىڭ 30 جىلدىعىنا ارنالعان مەرەيتويلىق مەدالمەن, سونداي-اق «وفيتسەردىڭ اناسى» مەدالىمەن ماراپاتتالدى. «ەڭ ۇلكەن ەڭبەك – ۇرپاق تاربيەسى» دەگەن انا بالالارىنىڭ ومىردەن ءوز جولىن تاپقانىنا قۋانادى. بۇگىندە قىزى ايسۇلۋ الماتىداعى قىتاي بانكىندە جەتەكشى اۋديتور بولىپ ەڭبەك ەتسە, ۇلى ءجۇسىپ سىبايلاس جەمقورلىققا قارسى قىزمەت سالاسىندا, كاپيتان شەنىندە جۇمىس ىستەيدى.
مىقتى مامان – قاي ۇجىمنىڭ دا ماقتانىشى. قۋاتتى قۇرىلىمنىڭ تىنىس تىرشىلىگىن تەرەڭ سەزىنەتىن بيبىگۇل تۇرىسبەكقىزىنا ەل يگىلىگى جولىنداعى ەڭبەگىڭىز ەلەنە بەرسىن دەيمىز.
الماتى
