فوتو:اشىق دەرەككوز
ءمينيستردىڭ حابارلاۋىنشا, ساراپشىلار قاۋىمداستىعىن تارتا وتىرىپ بىرىڭعاي ۋاقىت بەلدەۋىنە كوشۋدىڭ حالىق دەنساۋلىعىنا, ەنەرگيا تۇتىنۋعا جانە ەڭبەك ونىمدىلىگىنە اسەرىن زەرتتەۋ ماقساتىندا كەشەندى مونيتورينگ جۇرگىزىلگەن.
زەرتتەۋ ادىستەمەسى ۋاقىت بەلدەۋىن ەنگىزۋدىڭ اسەرىن باعالاۋ ءۇشىن 40-تان استام كورسەتكىشتى قامتىعان. ونىڭ ىشىندە:
- دەنساۋلىق ساقتاۋ سالاسى – ءتۇرلى جاس توپتارى مەن قالا جانە اۋىل تۇرعىندارى قامتىلعان;
- ەنەرگيا تۇتىنۋ – ەلەكتر قۋاتىن تۇتىنۋ ستاتيستيكاسى, سونىڭ ىشىندە ەڭ جوعارى جۇكتەمە كەزەڭدەرى زەرتتەلگەن;
- ەڭبەك تيىمدىلىگى – جۇمىس كولەمى, كەشىگۋلەر مەن جۇمىستان قالۋ جاعدايلارى, جاراقات الۋ فاكتىلەرى مەن ءتارتىپ بۇزۋشىلىقتار تالدانعان.
«ناتيجەلەر ءبىرتۇتاس ۋاقىت بەلدەۋىنە كوشۋدىڭ حالىقتىڭ ومىرلىك بەلسەندىلىگىنىڭ نەگىزگى كورسەتكىشتەرىنە تەرىس اسەرى جوق ەكەنىن كورسەتتى», دەدى ارمان شاققاليەۆ.
بۇل رەتتە ولجاس بەكتەنوۆ پارلامەنت ماجىلىسىمەن بىرلەسىپ, ءتيىستى جۇمىستى ۇيىمداستىرۋدى تاپسىردى.
«مەملەكەت باسشىسى ۇكىمەت پەن پارلامەنتكە اتالعان ماسەلەنى ەگجەي-تەگجەيلى قاراپ, بىرلەسىپ وڭتايلى شەشىم قابىلداۋدى تاپسىرعانىن بىلەسىزدەر. ءمينيستردىڭ بايانداماسىندا ايتىلعانداي, مونيتورينگ بىرىڭعاي ۋاقىت بەلدەۋىن ەنگىزۋ تۋرالى قابىلدانعان شەشىمنىڭ تەرىس اسەرى جوق ەكەنىن كورسەتتى», دەدى و.بەكتەنوۆ.
