ءبىراز جىل بۇرىن اشىلعان ءاسانالى ءاشىموۆ اتىنداعى شىعارماشىلىق ورتالىعىندا جۇمىس قارقىنى ىلكى ساتكە دە باسەڭسىگەن ەمەس. ىقىلاس دۇكەن ۇلى اتىنداعى قالالىق مادەنيەت ۇيىندە ورنالاسقان ورتالىقتىڭ جۇمىس اۋقىمى كەڭ. مۇندا ايگىلى ونەر تارلانىنا تيەسىلى قۇندى قۇجاتتار مەن تەاتر ساحناسىندا, كينوداعى نەگىزگى رولدەرىن سومداعان كەزدە پايدالانعان بۇيىمدارى ساقتالعان.
ورتالىقتىڭ اۋىر جۇمىسىن نازىك يىعىمەن ەڭسەرىپ جۇرگەن جانات توقبانبەتوۆانىڭ قولعا العان, اتقارار شارۋاسى جەتەرلىك. ونىڭ ايتۋىنشا, ورتالىققا ونەر الەمىنە اڭسارى اۋعان شاھار تۇرعىندارى عانا ەمەس, ءوڭىردىڭ ءار قيىرىنان كەلگەن ازاماتتار ءجيى باس سۇعادى. ايگىلى اكتەر الەمىمەن تانىسۋعا كەلگەندەردىڭ ىشىندە جاسوسپىرىمدەر مەن بالدىرعاندار دا بار.
«اۋەلى قارجى جانە نەسيە ماماندىعىمەن جوعارى وقۋ ورنىن ءبىتىردىم. كەيىننەن بۇرىنعى تاراز مەملەكەتتىك پەداگوگيكالىق ينستيتۋتىندا تاريحشى ماماندىعى بويىنشا ءبىلىمىمدى جەتىلدىردىم. باستاپقىدا شالعايداعى مويىنقۇم اۋدانىندا العاشقى ماماندىعىممەن جۇمىس ىستەدىم. شىعارماشىلىققا جاقىن بولعان سوڭ با, ايتەۋىر وزىمە قازىر ىستەپ جۇرگەن جۇمىسىم ۇنايدى. ءبىرشاما ۋاقىتتان بەرى ءاسانالى ءاشىموۆ اتىنداعى شىعارماشىلىق ورتالىعىندا ەڭبەك ەتىپ ءجۇرمىن. ىلگەرىدە «داڭق» زالىندا تاجىريبە جيناقتاعانىمنىڭ پايداسى ءتيىپ جاتىر. ورتالىقتىڭ عىلىمي قىزمەتكەرى رەتىندە بىزگە كەلگەن قوناقتارعا قولدا بار دەرەكتەر مەن قۇندىلىقتار نەگىزىندە ەكسكۋرسيا جۇرگىزەمىن. ءاسانالى اعامىز بىزگە ءجيى ات باسىن بۇرادى. ول كىسى تاپسىرعان جادىگەرلەردى قابىلداپ الۋ مىندەتى دە ماعان جۇكتەلگەن», دەيدى جانات.
ورتالىق عىلىمي قىزمەتكەرىنىڭ ايتۋىنشا, ونىڭ جۇمىسى ەكسكۋرسيا جۇرگىزۋ, جادىگەرلەردى قابىلداپ الۋمەن بىتپەيدى. تۇراقتى تۇردە عىلىمي زەرتتەۋ جۇمىستارىمەن دە اينالىسادى. ويتكەنى ورتالىققا كەلگەن ءتۇرلى ساناتتاعى ازاماتتار تاراپىنان قويىلاتىن ساۋال جەتكىلىكتى. ونەر تارلانىنا قاتىستى تۋىنداعان كەز كەلگەن سۇراققا مۇدىرمەي جاۋاپ بەرۋ – جاناتتىڭ مىندەتى. سوندىقتان دا ۇدايى ىزدەنىس ۇستىندە جۇرەدى.
«بىزگە كەلگەن ازاماتتاردىڭ ىشىندە اساعاڭنىڭ جەكە ومىرىنە قاتىستى ساۋال قوياتىندار كوپ. ايگىلى تۇلعا بولعان سوڭ, ول كىسىنىڭ ومىرىنە قاتىستىنىڭ ءبارى قىزىق. مۇندا ساقتالعان قۇندى جادىگەرلەردىڭ تاريحىن دا بىلگىسى كەلەدى. مۇندايدا ءبىزدىڭ ءمۇدىرىپ قالۋعا قاقىمىز جوق. مەن مۇندا عىلىمي قىزمەتكەر رەتىندە ەڭبەك ەتەتىندىكتەن, ورتالىق جۇمىسى تۋرالى تۇراقتى تۇردە جەرگىلىكتى باسىلىمدارعا ماقالالار جازىپ تۇرامىن. كوبىنە جازعان-سىزعانىم وبلىستىق «اق جول», «اراي» گازەتتەرىندە جاريالانادى. ماقالا جازۋ مەن ءان ايتۋ – سۇيىكتى ءحوببيىم, ورتالىق جۇمىسىن باق بەتىندە ناسيحاتتاۋ مەن ءۇشىن قيىندىق تۋدىرمايدى», دەيدى كەيىپكەرىمىز.
تاراز قالاسىندا ورنالاسقان ءاسانالى ءاشىموۆ اتىنداعى شىعارماشىلىق ورتالىق كوزگە شاعىنداۋ كورىنگەنىمەن, مۇندا ءۇش قىزمەتكەر تىنىمسىز ەڭبەك ەتەدى. دەرەكقوردى تولىقتىرۋ, ءتۇرلى ءىس-شارالار وتكىزۋ مىندەتىنىڭ ءبىر بولىگى جانات توقبانبەتوۆاعا جۇكتەلگەن. ول ءارى كوپبالالى انا, جارى جانداربەك ەكەۋى ءتورت بالانى باعىپ-قاعىپ, وتباسىنىڭ بەرەكەسىن كەلتىرىپ وتىر. ال ورتالىق جۇمىسىن جانداندىرۋعا بارىنشا ۇلەس قوسىپ جۇرگەن كەيىپكەرىمىزدى ورتالىقتىڭ شىراقشىسى دەسە دە بولادى.
تاراز
