ميكەلاندجەلونىڭ شىعارماشىلىق ادامى بولۋىنا بالالىق شاقتاعى وقيعالارى اسەر ەتكەن.
اكەسى ليۋدوۆيك سيموني قالالىق رەزيدەنتسيادا نوتاريۋس بولعان. اناسى فرانچەسكو دي نەري ميكەلاندجەلو التى جاسقا تولعاندا ومىردەن وتەدى. اكەسى ەكىنشى رەت ۇيلەنەدى. اناسىنان ەرتە ايىرىلعان بالا جەتىمدىكتىڭ تاقسىرەتىن تارتادى. اكەسى وتە قاتال ادام بولعاندىقتان, ول ءوز ۇيىندە وتە از قوناتىن. تاس قاشاۋشى كورشىسىنىڭ ۇيىنەن شىقپايتىن. ونىڭ شىعارماشىلىق ۇدەرىسىنە قىزىعا قاراپ وتىرا بەرەتىن.
ميكەلاندجەلونىڭ ابىرويىن اسىرىپ, اتىن الەمگە تانىتقان شىعارما – «ادامنىڭ جاراتىلۋى» كارتيناسى. بۇل تۋىندى 1508 جىلدىڭ كوكەك ايىندا پاپا ءيۋليدىڭ تاپسىرماسىمەن شىركەۋ توبەسىنە سالىنعان فرەسكا ەدى. مۇندا سۋرەتشى دۇنيەنىڭ جاراتىلۋى حاقىنداعى ءىنجىلدىڭ ىلكى اڭىزىن بەينەلەيدى. وندا جاراتۋشى ادامدى ءوز بەينەسىنە ۇقساتىپ جاراتقانىن ايتادى. ميكەلاندجەلو ءدال وسىعان باسىم باعىت بەرەدى.
كارتينانىڭ ەڭ درامالىق شيەلەنىسىن قۇداي مەن ادامنىڭ سوزعان قولدارى جاساپ تۇر. بۇل ەكى بولمىس اراسىنداعى رۋحاني بايلانىستى بىلدىرەدى دەيدى ونەرتانۋشىلار. ءيا, ءتاڭىر ادامعا ءوز رۋحىن ۇرلەدى. بويىنا قۇدىرەت دارىتتى. وزىنە ۇقساۋىنا مۇمكىندىك بەردى. ءدال وسى ساۋلەلى ءساتتى بەينەلەۋ ميكەلاندجەلونىڭ قىلقالامىنا بۇيىرعان ەدى. كەيىن بۇل كارتينا ونىڭ تولقۇجاتىنا اينالىپ كەتتى.
ميكەلاندجەلو 1564 جىلى 18 اقپاندا بەزگەك اۋرۋىنان قايتىس بولادى. اقتىق دەمى شىعار الدىندا سۇلەي سۋرەتكەر: «مەن ءوز ماماندىعىمنىڭ تەك ءالىپبيىن عانا ۇيرەنە باستاعانىمدا ومىردەن ءوتىپ بارا جاتقانىما قاتتى وكىنەمىن», دەپ كۇرسىنىپتى.
