سولتۇستىك قازاقستاندا قايىڭدى القاپ وتالىپ جاتىر

پەتروپاۆل. 19 ماۋسىم. قىزىلجار ءوڭىرىنىڭ تۇرعىندارى تەرەك-قايىڭى ارالاس قالىڭ اعاشتىڭ وتالۋى جايلى   ءتيىستى ورىندارعا سان مارتە دابىلداتقانىمەن, ناقتى شارا قولدانىلماي وتىر.  بۇل تۋرالى كتك تەلەارناسى حابارلادى. ال, جاڭعىرتۋ ءۇشىن جاسىل القاپتى جالعا العان كومپانيا 3 جىل بويى اعاش كەسۋمەن اينالىسىپ, بىردە-ءبىر وسكىن وتىرعىزباعان كورىنەدى. «جىل وتكەن سايىن ايىرتاۋدىڭ جەلەگى جايقالعان ايگىلى قايىڭدى ورمانى سيرەپ بارادى. اۋىل ماڭىنىڭ دا سيقى قاشىپ, بەرەكەسى كەتتتى.  اعاش وڭدى-سولدى وتالىپ, جۇمىرتقادان ءجۇن قىرىققان پايداكۇنەمدەر قالتالارىن قالىڭداتۋدا», دەيدى ايىرتاۋلىقتار. كاراسەۆكا اۋىلىنىڭ تۇرعىنى عازەز ەسماعۇلوۆتىڭ پىكىرىنشە, كەسىلگەن اعاش ورنىنا كوشەت وتىرعىزىپ جاتقان ەشكىم جوق. جەرگىلىكتى بيلىككە شاعىمدانعانمەن, ولاردان قايىر بولماي تۇر. سوعان قاراعاندا اعاشتى زاڭسىز كەسۋ بۇيرىعى جوعارى جاقتان كەلگەن سەكىلدى. قىستاي توناعاندارى ازداي جازدا دا بىلەك سىبانا كىرىسىپتى.  كەسىلگەن جۇزدەگەن تۇبىرلەرگە قاراعاندا, قۇلاشتى الىسقا سىلتەيتىن تۇرلەرى بار. جاقىن ارادا توقتايتىن تۇرلەرى كورىنبەيدى. ورمانشىلار بولسا, كەسىلگەندەر تەك اۋرۋ-سىرقاۋ, شىرىگەندەرى دەپ جايباراقات قاراپ وتىر. «جۇمىس زاڭ جۇزىندە اتقارىلىپ جاتىر. قۋراعان اعاشتار عانا وتالادى», دەيدى ورمانشى ساعات جازباەۆ. جاسىل جەلەكتى جاڭعىرتۋ ورماندى القاپتى 10 جىلعا جالعا العان «ۋگلەجوگ» سەرىكتەستىگىنىڭ ءوڭى تۇگىل تۇسىنە دە كىرىپ شىقپايتىن ءتارىزدى.  ورمانشىلاردان كۇدەر ۇزگەن جۇرت ەندى سەرىكتەستىكپەن سوتتاسپاقشى. ءومىر ەسقالي. دەرەك: كتك تەلەارناسى. سۋرەت: egemen.kz