اق حالاتتى ابزال جانداردىڭ كومەگىنە جۇگىنگەن 66 جاستاعى قالا تۇرعىنىنىڭ جاعدايى ءماز ەمەس ەدى. ءحالى مۇشكىل ناۋقاستىڭ جاعدايىن تولىققاندى تەكسەرگەن دارىگەرلەر وعان «وڭ جاق ورتا مي ارتەرياسىنداعى انەۆريزما» دەگەن دياگنوز قويعان. بۇل دەرتتى ەمدەۋدە ارنايى ادىستەردى قولدانۋدىڭ ماڭىزى زور.
دارىگەرلەر كەلتىرگەن دەرەككە جۇگىنسەك, ادەتتە انەۆريزمانى كليپس (قىسقىش) ورناتىپ, اشىق ورتا ارقىلى ەمدەيدى. الايدا اۋرۋحاناعا تۇسكەن تۇرعىننىڭ جۇرەگىندە دەرت بار بولعاندىقتان, وپەراتسيانى باسقا ءتاسىل ارقىلى جۇزەگە اسىرۋ قاجەتتىگى تۋىنداعان. تاۋەكەلگە بەل بۋعان اق حالاتتىلار وپەراتسيانى قان تامىرلارى ارقىلى, جەرگىلىكتى انەستەزيامەن جۇزەگە اسىرۋعا ءماجبۇر بولعان.
«انگيوگرافيالىق سۋرەتتەردەن ستەنت انەۆريزمانىڭ موينىنا ورنالاستىرىلعانىن انىق بايقاۋعا بولادى. الدەن ۋاقىتتان كەيىن ستەنتتىڭ ىشىنە ميكروسپيرال ەنگىزىلدى. ناتيجەسىندە, انەۆريزما اۋماعى تولىققاندى جابىلدى. وپەراتسيانى جاساماس بۇرىن يتاليادان كەلگەن بىلىكتى ساراپشىلارمەن كەڭەستىك. مۇندايدا جان-جاقتى اقىلداسقان مامانداردىڭ پىكىرىن بىلگەن ءجون. «جەتى رەت ولشەپ, ءبىر رەت كەسكەننەن» كەيىن عانا تاۋەكەلگە بەل بۋعان ابزال. جىلدار بويى جينالعان تاجىريبەنىڭ ارقاسىندا كۇردەلى وپەراتسيانى ءساتتى جاسادىق دەۋگە نەگىز بار. ەشقانداي اسقىنۋ بولعان جوق. قىسقاسى, قولدان كەلگەن مۇمكىندىكتىڭ ءبارىن قاراستىردىق», دەدى تاراز قالالىق اۋرۋحاناسىنىڭ نەيروحيرۋرگيا ءبولىمىنىڭ مەڭگەرۋشىسى نۇرجان ايتىمبەتوۆ.
وپەراتسيانى نەيروحيرۋرگ ەركەبۇلان مەركىبەكوۆ پەن بولات كەڭشىلىك جاسادى. دارىگەرلەردىڭ ايتۋىنشا, انەۆريزمانى تولىق جابۋ ءۇشىن «pConus» اتالاتىن ارنايى ستەنت-شاتىر قولدانىلعان. بۇل قۇرىلعى انەۆريزمانىڭ موينىن جاپپاي, سول جەردەگى قان تامىرلارىن باستاپقى قالىپتا ساقتاۋعا مۇمكىندىك تۋعىزادى. ستەنت انەۆريزمانى بارىنشا قورعاپ, ميكروسپيرال ارقىلى ونى تولىقتاي جابۋعا مۇمكىندىك بەرەدى.
«ناۋقاستىڭ بويىنان ەشقانداي نەۆرولوگيالىق ماسەلە بايقالعان جوق. كەلەسى كۇنى ەركىن قوزعالىپ, بولمەدە ءوزى ءجۇردى. الداعى ۋاقىتتا قان ۇيىپ قالماس ءۇشىن ساقتانعاننىڭ ارتىقتىعى جوق. سوندىقتان مەرزىمى التى ايدى قامتيتىن ارنايى ەم-دوم شاراسى تاعايىندالدى. جارتى جىل ىشىندە ستەنت تولىققاندى جابىلادى. سودان سوڭ تاعايىندالعان ءدارى-دارمەكتى قابىلداۋ مەرزىمى توقتاتىلادى», دەيدى
دارىگەرلەر.
دارىگەرلەردىڭ دەر كەزىندە ارالاسۋىنىڭ ارقاسىندا كۇردەلى انەۆريزما ەكنوۆاسكۋليارلىق ادىسپەن جابىلدى. ناۋقاستىڭ جاعدايى دەر كەزىندە قالپىنا كەلدى. جوعارى بىلىكتى ماماندار زاماناۋي تەحنيكانى قولدانا وتىرىپ, كۇردەلى وپەراتسيانى ساتىمەن جۇزەگە اسىردى.
تاراز
