قاراعاندىدا «اباي بول, جالعان اقشا» شاراسى ءوتتى

قاراعاندى. 19 ماۋسىم. وبلىسى بويىنشا مەملەكەتتىك كىرىستەر دەپارتامەنتىنىڭ ەكونوميكالىق تەرگەۋلەر قىزمەتى ۇلتتىق بانكتەرمەن بىرلەسىپ «اباي بول, جالعان اقشا» تاقىرىبىندا دوڭگەلەك ۇستەل وتىرىسىن وتكىزدى. وعان ەكىنشى دەڭگەيلى بانكتەردىڭ وكىلدەرى قاتىستى. بۇل تۋرالى وبلىستىق مەمەلكەتتىك كىرىستەر دەپارتامەنتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. جيىندا قاتىسۋشىلار ايماقتا جاسىرىن تۇردە اقشا بەلگىلەرىن شىعارۋ مەن اينالىمعا ەنگىزۋ سانى ارتقانىن ايتتى. ماسەلەن, قىلمىستىق كودەكستىڭ 231-بابى (جاساندى اقشالار مەن قۇندى قاعازداردى جاساپ شىعارۋ, ساقتاۋ, قوزعالىسقا ءتۇسىرۋ جانە وتكىزۋ) بويىنشا جىل باسىنان بەرى 31 قىلمىستىق ءىس تىركەلگەن. سونىمەن قاتار, ماماندار جىل باسىنان بەرى اينالىمعا زاڭسىز 36 اقشا بىرلىگى تۇسكەنىن انىقتاعان. اسىرەسە, 2000 تەڭگەلىك قولدان جاسالعان جالعان اقشا ءجيى كەزدەسەتىنىن مالىمدەدى. ايتا كەتەيىك, شارادا بانك وكىلدەرى مەن قۇقىق قورعاۋ سالاسىنىڭ قىزمەتكەرلەرى جالعان اقشانى جويۋ, كۇدىكتىلەردى ۇستاۋ باعىتىندا بىرلەسىپ جۇمىس قاجەتتىگىن تارقاتتى. سونداي-اق, اقشا بەلگىلەرىنىڭ شىنايىلىعىن مۇقيات تەكسەرۋ ءۇشىن ەكىنشى دەڭگەيلى بانكتەرگە قازىرگى زامانعى قوندىرعىلاردى قولدانۋ جونىندە ۇسىنىستار بەرىلدى. ايقىن نەسىپباي. دەرەك: وبلىستىق مەمەلكەتتىك كىرىستەر دەپارتامەنتىنىڭ ءباسپاسوز قىزمەتى. سۋرەت: businessnews.kz.