اقتوبە. 19 ماۋسىم. اقتوبە وبلىستىق ىشكى ىستەر دەپارتامەنتىندە قازاقستان پوليتسياسى كۇنى قارساڭىندا «مەنىڭ قازاقستانىم. مەنىڭ پوليتسيام» اتتى بالالاردىڭ شىعارماشىلىق بايقاۋى ۇيىمداستىرىلدى. بۇل بايقاۋعا وبلىستىڭ ىشكى ىستەر ورگاندارى قىزمەتكەرلەرىنىڭ 3-13 جاس ارالىعىنداعى بالالارى قاتىستى. بۇل تۋرالى egemen.kz ءتىلشىسى حابارلادى.
بايقاۋدىڭ باستى ماقساتى – جاس ۇرپاقتىڭ بويىندا قازاقستان پوليتسياسىنا دەگەن قۇرمەتتى قالىپتاستىرۋ, بالالاردى وتانسۇيگىشتىككە, ءوزىنىڭ اتا-اناسىن ماقتان ەتۋگە باۋلۋ جانە ەڭ باستىسى, مەملەكەتتىك ءتىلدى ءبىلۋ مەن قۇرمەتتەۋگە تاربيەلەۋ.
«مەنىڭ قازاقستانىم. مەنىڭ پوليتسيام» بايقاۋى بالالاردىڭ جاس ەرەكشەلىكتەرىن ەسكەرە وتىرىپ, ەكى باعىتتا وتكىزىلدى. ءبىرىنشى باعىت بويىنشا 3-10 جاستاعى بالالار وزدەرىنىڭ سالعان سۋرەتتەرىن ۇسىنسا, ەكىنشى باعىت بويىنشا 6-13 جاستاعى جەتكىنشەكتەر وزدەرى جازعان شىعارمالارىن تاپسىردى.
بالالاردىڭ جۇمىستارىن قابىلداۋ ءساۋىر ايىنىڭ ورتاسىنان باستالىپ, 1 ماۋسىم – بالالاردى قورعاۋ كۇنى قارساڭىندا اياقتالدى. بايقاۋعا بارلىعى 30 بالا قاتىستى. پوليتسيا قىزمەتكەرلەرىنىڭ بالالارى ۇسىنعان ءاربىر سۋرەتتە ولاردىڭ وتانعا, تۋعان جەرىنە دەگەن سۇيىسپەنشىلىگى ايقىن كورىنسە, جازعان شىعارمالارىندا پوليتسيا قىزمەتكەرى بولىپ جۇمىس ىستەيتىن اتا-انالارىنا دەگەن قۇرمەتى, ماقتانىشى اڭعارىلادى.
بايقاۋ وبلىستىق دەڭگەيدە وتكىزىلگەندىكتەن, وعان بارلىق قالالىق, اۋداندىق پوليتسيا بولىمدەرىندە قىزمەت ەتەتىن پوليتسەيلەردىڭ بالالارى دا قاتىستى. اسىرەسە, شالقار, تەمىر, ايتەكە بي اۋداندارىندا قىزمەت ەتەتىن پوليتسيا قىزمەتكەرلەرىنىڭ بالالارى بەلسەندىلىك تانىتتى.
سايىس قورىتىندىسىن شىعارىپ, جەڭىمپازداردى انىقتاۋ جانە قاتىسقان ءار بالانى نازاردان تىس قالدىرماۋدى وبلىستىق ىشكى ىستەر دەپارتامەنتىنىڭ باستىعى, پوليتسيا گەنەرال-مايورى ماحسۋدحان ءابلازيموۆتىڭ ءوزى مىندەتىنە الىپ وتىر. ونىڭ توراعالىعىمەن وتكەن كوميسسيا وتىرىسىندا بالالاردىڭ جۇمىستارى سارالانىپ, تالقىلاندى. سونداي-اق, بالالاردىڭ تۋىندىلارىن بارىنشا وبەكتيۆتى باعالاۋ ءۇشىن كوميسسيا قۇرامىندا جۋرناليستەر, تىلشىلەر, وبلىستىق تىلدەردى دامىتۋ باسقارماسىنىڭ, قالاداعى قازانعاپ اتىنداعى بالالار ونەر مەكتەبىنىڭ ماماندارى دا بولدى.
بايقاۋ قورىتىندىسى بويىنشا جۇلدەلى ورىندار مەن بەس نوميناتسيا تاعايىندالدى. ونىڭ ىشىندە ەڭ كىشكەنتاي قاتىسۋشىلار دا نازاردان تىس قالعان جوق. ولارعا «ەڭ كىشكەنتاي ونەرپاز», «تالابى تاۋداي بالاپان» ت.ب. نوميناتسيالار بەلگىلەندى. سالتاناتتى ماراپاتتاۋ ءراسىمى 23 ماۋسىم – قازاقستان پوليتسياسى كۇنىنە ارنالعان مەرەكەلىك كونتسەرتتە وتەدى. قاتىسۋشى بالاقايلاردىڭ بارلىعىنا وبلىستىق دەپارتامەنت باستىعىنىڭ ماقتاۋ قاعازدارى مەن العىس حاتتارى, سىيلىقتار تابىستالادى.
ساتىبالدى ءساۋىرباي.
دەرەك, سۋرەت: egemen.kz.
