جاقىندا باسپانالى بولعاندار قونىستويلارىن تويلاپ, ۇيلەرىنە كىرىپ الدى. قوجالىقتىڭ قويىن باعىپ, ءشوبىن شاۋىپ, ارپا-بيدايىن ءوسىرىپ, ەڭبەك ەتىپ جۇرگەن مەحانيزاتور, قويشى-مالشىلارىنا ارناپ باسپانا تۇرعىزۋ شارۋاشىلىق باسشىسىنىڭ كوپ جىل ويىندا جۇرسە دە, ونىڭ ءساتى بىلتىرعى مامىردا ءتۇستى. جارتى جىل ىشىندە كەڭ دە جايلى ۇيلەر بوي كوتەرىپ, قوجالىقتىڭ كوپبالالى جۇمىسكەرلەرىنە تابىستالدى. ون وتباسىنىڭ ىشىنەن باسپانا كىلتىن ەڭ ءبىرىنشى بولىپ كوپبالالى اكە, ۇزدىك كومباينشى باعدات تولەمىسوۆ الدى.
ەڭبەككەرلەرىنىڭ الاڭسىز جۇمىس ىستەۋىنە جاعداي تۋعىزۋ ارقىلى س.ورازىمبەتوۆ بىرنەشە ماسەلەنىڭ ءتۇيىنىن شەشۋدى ماقسات ەتىپ وتىر. وڭعاردىڭ جەرى قۇت بولىپ, كاسىبى تابىس اكەلگەن سوڭ, بۇرىنعى كەڭشاردىڭ تاۋارلى ءسۇت فەرماسىنىڭ ءىزى بولعان اۋىلعا جان ءبىتىرۋدى ويلادى. ۇيلەر سالىنىپ جاتقاندا, توزىپ كەتكەن ەلەكتر جەلىلەرىن, باعانالارىن ءوز ەسەبىنەن قايتا جۇرگىزگەن. مۇنىمەن توقتاپ قالماي, الداعى ۋاقىتتا دا ەڭبەككەرلەرىنە ارناپ ءۇي سالۋدى جالعاستىرماقشى. ەگەر ەلىمىزدە تابىستى جۇمىس ىستەپ تۇرعان ءار شارۋاشىلىق «دانياردىڭ» باسشىسى سياقتى مالشىسى مەن مەحانيزاتورىن لايىقتى ەڭبەكاقى, باسپانامەن قامتاماسىز ەتسە, باقۋاتتى اۋىلدار سانى كوبەيە تۇسەر ەدى.
س.ورازىمبەتوۆ – تىنىمسىز ەڭبەك پەن جۇيەلى ۇيىمداستىرىلعان جۇمىستىڭ ارقاسىندا زور ناتيجەگە جەتكەن ازامات. «قاراماعىمدا 40 شاقتى ادام جۇمىس ىستەيدى. ولاردىڭ دەنى – كومباين, تراكتور جۇرگىزۋشىلەرى, مالشىلار مەن قويشىلار. جۇمىسىمىزدى جەتى جىل بۇرىن باستادىق. العاشقىدا ءدوڭ وكرۋگىنىڭ جۇمىسسىز ازاماتتارىن الدىق. كەيىن كورشى اۋدانداردان دا كەلە باستادى. جۇمىس بولعان سوڭ ءارتۇرلى جاعداي كەزدەسەدى. قىسى-جازى ءبىر جەردە ەڭبەك ەتۋدەن قاشىپ, كەتىپ قالعاندار دا بولدى. دەگەنمەن جۇمىسىنا جاۋاپتى ادام تۇراقتاپ قالادى. ونىڭ جاعدايىن جاساساق, باسقا جاقتا قالعان بالا-شاعاسىنا الاڭدامايدى. ءۇيدى سول ماقساتتا سالدىق. بىزگە كوبىنەسە ءار جەردەگى قوجالىقتاردا جۇمىس ىستەپ, دۇرىس ەڭبەكاقى الا الماعاندار كەلەدى. شارۋانىڭ رەتىن, مالدىڭ جاعدايىن بىلەتىندەردى سولاردىڭ اراسىنان تابامىز. ءبىر جاعىنان, 80 عانا تۇرعىنى قالعان اۋىلدى جانداندىرىپ, مەكتەبىندەگى بالا سانىن كوبەيتۋ ءۇشىن وسىنداي قادامعا باردىق. باستاما جاقسى ناتيجە بەرىپ جاتىر. مۇمكىندىگىنشە, شارۋاشىلىقتى كەڭەيتكىم كەلەدى. كوكتەمدە كارتوپ, ءسابىز, قىرىققابات ەگۋدى جوسپارلاپ وتىرمىز. كۇزدە كوكونىس ەگەتىن جەردى جىرتىپ قويدىق», دەيدى س.ورازىمبەتوۆ.
«دانيار» قوجالىعىنىڭ قويشىسى ءىدىرىس جارىلعاسىنوۆ وسى اۋىلدان ءۇي العانىنا قۋانىشتى. «بىزگە جۇمىس ىزدەپ كەلىپ جاتقانداردىڭ اراسىندا جاستاردىڭ بولۋى قۋانتادى. مال باعۋعا, ءشوپ شابۋعا, تراكتور ايداۋعا قۇلشىنىس تانىتقان جاستار كوبەيىپ كەلەدى. مەن وتكەن جىلدىڭ ماۋسىم ايىندا بوگەتساي ەلدى مەكەنىنەن ايەلىممەن, كىشكەنتاي بالاممەن كوشىپ كەلدىم. قازىر شارۋاشىلىقتىڭ قويىن باعامىن. العان ءۇيىمىز وتە جاقسى, گاز جۇرگىزىلگەن, سۋ كەلىپ تۇر. جيھازبەن, تۇرمىستىق تەحنيكامەن جابدىقتالعان», دەيدى ءى.جارىلعاسىنوۆ.
اۋىلدا «دانيار» شارۋا قوجالىعىنىڭ 20 مىڭ گەكتار جايىلىمدىق جەرى بار. بۇدان وزگە 8 مىڭ گەكتار جەرگە بيداي, 1 مىڭ گەكتارعا ارپا مەن باسقا مال ازىعى داقىلدارىن ەگەدى. الداعى ۋاقىتتا بيداي ەگىستىگىنىڭ كولەمىن 15 مىڭ گەكتارعا ۇلعايتپاقشى. ۇيلەسىمدى جۇمىس ناتيجەسىندە وڭعار اۋىلى جىلدان-جىلعا جاڭارىپ كەلەدى. حرومتاۋ اۋدانى اكىمدىگىنىڭ كومەگىمەن اۋىلدىڭ كىرەبەرىس جولىنا اسفالت توسەلدى. قوجالىققا جاڭا كەلگەن وتباسىلاردىڭ ارقاسىندا توعىزجىلدىق مەكتەپتەگى بالا سانى دا ءوستى. بۇل كۇندە استىق ساتىپ, قوي ءوسىرىپ, قوماقتى تابىس تابۋ وڭاي ەمەس. ەڭ باستىسى, جينالعان ءونىمدى وتكىزە ءبىلۋ كەرەك. س.ورازىمبەتوۆ الدىڭعى جىلى اسىل تۇقىمدى قويلارىن شەتەلگە تىرىدەي سالماقپەن جىبەردى. بىلتىر كۇزدە بيدايدى حرومتاۋداعى ەلەۆاتورعا تاپسىردى. ىسكەر ازامات قازىرگى كەزدە اۋىل شارۋاشىلىعىنىڭ ءبىر سالاسىمەن عانا شۇعىلدانۋدان گورى, ءار باعىتتا جۇرگىزۋ ءتيىمدى دەپ سانايدى.
اقتوبە وبلىسى,
حرومتاۋ اۋدانى
