ءبىلىم سىناعىنا قاتىساتىنداردىڭ 76 پايىزى قازاق ءتىلىن, 23,9 پايىزى ورىس ءتىلىن تاڭداسا, 162 ادام اعىلشىن ءتىلىن قولاي كورگەن.
تەستىلەۋدىڭ العاشقى كۇنى, 1 ناۋرىزدا رەسپۋبليكا بويىنشا 775 ادام سىناقتان ءوتتى.
تالاپكەرلەردىڭ 17,5 پايىزى مەديتسينا, پەداگوگيكا جانە اۋىل شارۋاشىلىعى ماماندىقتارىنا ءتۇسۋدى كوزدەسە, 17,1 پايىزى ماتەماتيكا-فيزيكا, 10,5 پايىزى ماتەماتيكا-ينفورماتيكا پاندەرىن تاڭداعان. ياعني, بولاشاقتا ينجەنەرلەر مەن IT ماماندارى بولعىسى كەلگەن.
ۇبت-داعى پاندەردىڭ سانى وزگەرگەن جوق, ۇشەۋى مىندەتتى جانە ەكەۋى تاڭداۋ بويىنشا. ۇبت تاپسىرمالار سانى – 120. ونىڭ ىشىندە قازاقستان تاريحىنان 20 تاپسىرما, وقۋ ساۋاتتىلىعىنان 10 تاپسىرما, ماتەماتيكالىق ساۋاتتىلىقتان 10 تاپسىرما جانە ەكى بەيىندىك ءپان بويىنشا 40 تاپسىرمادان. جوعارى بالل – 140.
تەستىلەۋ ۋاقىتى – 4 ساعات. ەرەكشە قاجەتتىلىگى بار بالالارعا قوسىمشا 40 مينۋت ۋاقىت بەرىلەدى.
ەسكە سالايىق, ناۋرىزداعى ۇبت-عا شارتتى تۇردە اقىلى نەگىزدە كۇندىزگى وقۋ نىسانى بويىنشا جوعارى وقۋ ورىندارىنا قابىلدانعان, بىلتىرعى مەكتەپ جانە كوللەدج تۇلەكتەرى, قازاقستان ازاماتى بولىپ سانالمايتىن ۇلتى قازاق ازاماتتار, سونداي-اق مەكتەپ بىتىرەتىن تۇلەكتەر جوعارى وقۋ ورىندارىنا اقىلى نەگىزدە ءتۇسۋ ءۇشىن قاتىسادى. ۇبت 6 ساۋىرگە دەيىن جالعاسادى.
