اقتوبە وبلىسىندا سۋ تاسقىنى زارداپتارىن جويۋ جونىندەگى كوميسسيا 761 تۇرعىن ءۇي, 10 الەۋمەتتىك نىسان, 187 اۋلا, 99 ساياجاي ۇيلەرى زاقىمدانعانىن جاريالادى. مەملەكەتتىك ورگاندار, كاسىپكەرلەر, قوعامدىق ۇيىمدار مەن ەل تاعدىرىنا بەيجاي قارامايتىن ازاماتتاردىڭ ارقاسىندا وڭىردە 500-دەن اسا ءۇي سالىنىپ, دايىن باسپانالار ساتىپ الىندى. ماتەريالدىق زالال شىعىندارى تولەنىپ, ولگەن مال باسى ءۇشىن وتەماقىلار دا تابىستالدى.
ەرىكتى جاستار تاسىعان وزەندەرگە وتە جاقىن ورنالاسقان تۇرعىنداردىڭ ءۇي م ۇلىكتەرىن, تۇرمىستىق تەحنيكالارىن جيناستىرۋعا قولعابىس ەتىپ, بالالار مەن قارتتاردى شىعارۋعا كومەكتەستى. ەۆاكۋاتسيالىق پۋنكتتەرگە ازىق-ت ۇلىك پەن كيىم-كەشەك, باسقا دا قاجەتتى زاتتاردى جەتكىزۋمەن اينالىستى. وبلىستىق قازاقستان حالقى اسسامبلەياسى جانىنان قۇرىلعان «اسسامبلەيا جاستارى» توبىنىڭ 70 مۇشەسى قالانىڭ №26, №36, №40 مەكتەپتەرىندە اشىلعان ەۆاكۋاتسيالىق پۋنكتتەردەگى تۇرعىندارعا كومەكتەستى. مۇنىمەن ءبىر كەزدە اقتوبەدەگى دوستىق ۇيىندە اشىلعان گۋمانيتارلىق كومەك قابىلدايتىن ورتالىققا ەتنومادەني بىرلەستىكتەر مۇشەلەرى كيىم-كەشەك, ازىق-ت ۇلىك, تۇرمىستىق زاتتار جيناپ, ەۆاكۋاتسيالىق نۇكتەلەرگە تاسىمالدادى. اسسامبلەيانىڭ انالار, اقساقالدار, مەدياتسيا كەڭەستەرى, كاسىپكەرلىك قاۋىمداستىق مۇشەلەرى جانە ەتنومادەني بىرلەستىك وكىلدەرى تابيعي اپات ورنىندا قالعان تۇرعىندار مەن تاۋلىك بويى كەزەكشىلىكتە جۇرگەن توتەنشە جاعداي قىزمەتكەرلەرى, قۇتقارۋشىلار مەن كوممۋنالدىق قىزمەت ماماندارىنا بىرنەشە كۇن كەزەك-كەزەك تۇسكى اس اپاردى. ماسەلەن, ارميان قاۋىمداستىعى مەن چەشەندەردىڭ «ۆايناح» ەتنومادەني بىرلەستىگى مۇشەلەرى دايىنداعان تۇسكى استى ۆولونتەرلەر جەتكىزىپ بەرىپ وتىردى. قحا جانە وبلىستىق ىسكەر ايەلدەر قاۋىمداستىعىنىڭ مۇشەسى, «گلوبال-سپەتسودەجدا» جشس ديرەكتورى نادەجدا شاباەۆا قۇتقارۋشىلارعا سۋ وتكىزبەيتىن 1 057 دانا ارنايى كيىم جەتكىزىپ, 100 ادامدى ىستىق اسپەن قامتاماسىز ەتىپ, ەۆاكۋاتسيالىق ورتالىقتاعى تۇرعىندارعا توسەكتىك ورىن, كيىم-كەشەك, ازىق-ت ۇلىك جەتكىزدى.
سۋ تاسقىنى زارداپتارىن جويۋعا وبلىستىق اسسامبلەيا قۇرامىنداعى بارلىق ەتنومادەني ورتالىق اتسالىسسا دا, ولار جۇرت الدىندا وزدەرىن جارنامالاۋدى ۇناتپاي, ورتاق ءىس, ەلدىك ءىس دەپ باعالادى. 2 مىڭعا جۋىق وتباسىنىڭ ءاپ-ساتتە دۇنيە-مۇلكى, مالىنان ايىرىلىپ قالۋى وڭاي بولمادى. مۇنداي كەزدە جىلى ءسوز, قول كومەگى جابىرقاۋلى جانعا دەمەۋ بولادى. تاسقىن باستالعان العاشقى كۇننەن باستاپ, سۋدىڭ بەتى قايتقانعا دەيىن بەلسەنىپ جۇرگەن اقتوبەلىكتەر قاتارىندا كاسىپكەر-مەتسەنات سەرگەي ۆيشنياك, «اقتوبە وبلىسى كارىستەر قاۋىمداستىعى» قوعامدىق بىرلەستىگىنىڭ جەتەكشىسى يۋري شەك بولدى. ولار ۇيلەرىن سۋ باسقان تۇرعىندارعا تۇرمىستىق تەحنيكالار مەن شارۋاشىلىق بۇيىمدارىن تابىستادى. وسىنداي كومەكتەن ارميان ەتنومادەني بىرلەستىگى جەتەكشىسى ارۋتيۋن ميكاەليان, «ۆايناح» چەشەن ەتنومادەني بىرلەستىگىنىڭ جەتەكشىسى ناسرۋدين سالاموۆ تا قالىس قالمادى. ازەربايجان ەتنومادەني ورتالىعىنىڭ باسشىسى راحيد ازيزوۆ تۋعان جەرى قوبدا ەلدى مەكەنىندە بوگەتتەردى نىعايتۋ مەن قۇم تاسۋ جۇمىستارىنا «Shacman» اۋىر جۇك كولىگىن جىبەردى. مەملەكەتتىك كۇزەت قىزمەتىنىڭ قىزمەتكەرى ە.سالۋەۆ, قالا تۇرعىندارى س.ۆيدياشەۆ پەن يۋ.لوۆلىنەنكو قارجىلاي كومەكتەستى.
نازار اۋداراتىن جايت, اقتوبە وبلىسى – قاي كەزدە دە ەتنوسارالىق كيكىلجىڭدەردەن ادا, ءتۇرلى ۇلتتار مەن دياسپورالار تاتۋ ءومىر ءسۇرىپ كەلە جاتقان ولكە. مۇنىڭ سەبەبى – تەرەڭدە. وندىرىستىك كاسىپورىندارى, زاۋىتتار مەن بىلىكتى ينجەنەر ماماندارى كوپ وڭىردە سان ۇلتتىڭ وكىلدەرى بىرگە تامىر جايدى. ولاردىڭ اتا-باباسىنىڭ مۇندا كوشىپ كەلۋ تاريحى ستولىپيندىك رەفورمالاردان باستالىپ, ستاليندىك قۋعىن-سۇرگىن كەزىندەگى جازىقسىز جەر اۋدارۋ مەن ەكىنشى دۇنيەجۇزىلىك سوعىس باستالعاندا قازاق جەرىنە كوشىرىلگەن ءوندىرىس ورىندارىنا جۇمىسقا كەلگەن ينجەنەر, جۇمىسشى, دارىگەر, اۋىل شارۋاشىلىعى ماماندارىنىڭ جولدارىمەن جالعاسقان. 1991 جىلداردان باستاپ ولاردىڭ كوپشىلىگى تاريحي وتاندارىنا كوشىپ كەتتى, كەيبىرى جەرسىنە الماي قايتىپ ورالدى.
بىرنەشە جىل بۇرىن اقتوبەدەگى قحا جانىنان اقساقالدار, انالار كەڭەسى قۇرىلدى. بۇگىندە ولار تاجىريبەلى ەتنومەدياتسيا ماماندارىنا اينالدى. كەڭەس مۇشەلەرىنە ومىرلىك قيىن جاعدايدا قالعان ايەلدەر, اتا-اناسىمەن كەلىسپەي جۇرگەن جاسوسپىرىمدەر كوپ كەلەدى. باستاپقىدا ەتنوسارالىق بىرلىك پەن كەلىسىمدى ناسيحاتتاۋ ءۇشىن اشىلعان كەڭەستەردىڭ قازىرگى كەزدە باعدارى وزگەرىپ بارادى. ويتكەنى اقتوبەدە ولاردىڭ الدىنا كوبىنە ەتنوسارالىق كيكىلجىڭمەن ەمەس, الەۋمەتتىك ماسەلەلەرىن شەشۋگە اقىل-كەڭەس سۇراپ كەلەدى ەكەن. كەڭەس مۇشەلەرى قاتارىنداعى كوپبالالى انالار مەن ۇلگىلى شاڭىراقتى باسقارىپ وتىرعان اكەلەر اتا-انا مەن بالا اراسىنداعى قارىم-قاتىناس, جاس وتباسىلاردىڭ جاراسىمدىلىعىن ساقتاۋعا بايلانىستى جاقسى كەڭەستەر بەرەدى.
اقتوبە وبلىسى
