يۋنەسكو دەڭگەيىندە مويىندالعان ايگىلى ءانشى-كومپوزيتور اننا گەرماندى بۇرىنعى جامبىل قالاسىنان ءبولىپ قاراۋعا بولمايدى. الەم باس يگەن ءان پەرىشتەسىنىڭ ءوزى بايىرعى جامبىل شاھارىن «مەنىڭ قالام, مەن وسىندا مەكتەپ تابالدىرىعىن اتتاعانمىن» دەپ اتاعانى ەسىمىزدە. تاعدىردىڭ جازۋىمەن بالا كۇنىنىڭ بىرنەشە جىلىن جامبىل قالاسىندا وتكىزگەن ءانشىنىڭ كونە شاھارعا دەگەن قۇرمەتى بولەك بولعان.
وبلىستىق تاريحي-ولكەتانۋ مۋزەيىندە ايگىلى ءانشىنىڭ بىرنەشە بۇيىمى ساقتالعان. سولاردىڭ ءبىرى – تارازدىق زەيتۋنا سكريپاچەنكوعا اننا گەرمان سىيعا تارتقان مونشاق. مونشاقتى زەيتۋنانىڭ قىزى گاليما ون جىلدان استام ۋاقىت بۇرىن مۋزەيگە تاپسىرىپتى.
«بۇل مونشاقتى اننا گەرمان 1979 جىلعى ونەر ساپارىندا مەيرامحاناداعى جاس جۇمىسشىعا سىيلاپتى. ءتىپتى ول كىسىنى ايگىلى ءانشى پولياك تىلىندە «زوسيا» دەپ اتاعان كورىنەدى. زەيتۋنا بۇل بۇيىمدى ۇزاق جىل بويى ءوز وتباسىندا ساقتاپتى. 2013 جىلى ونىڭ قىزى گاليما قۇندى بۇيىمدى مۋزەي قورىنا تابىستادى. وسىلايشا, ءبىزدىڭ مۋزەيدەگى قۇندىلىقتار قاتارى ايگىلى ءانشىنىڭ مونشاعىمەن تولىقتى», دەيدى وبلىستىق تاريحي-ولكەتانۋ مۋزەيىنىڭ قىزمەتكەرى لاۋرا بايتۇرسىنوۆا.
جالپى, وبلىستىق تاريحي-ولكەتانۋ مۋزەيىنىڭ قورىندا اتاقتى ءانشىنىڭ بۇيىمدارىنان جاساقتالعان ارنايى ۆيترينا بار. مۋزەيگە كەلۋشىلەر تاريحي جادىگەرلەردەن بولەك, تاعدىردىڭ جازۋىمەن بىرنەشە جىل جامبىل قالاسىندا تۇرعان ايگىلى ءانشىنىڭ بۇيىمدارىن دا اسا قىزىعۋشىلىقپەن تاماشالايدى.
تاراز
