الماتى.19 ماۋسىم. بۇگىنگى تاڭدا قالا تۇرعىندارىنا بارلىعى 30 مىڭنان استام دارىگەر قىزمەت كورسەتەدى. ولاردىڭ اراسىندا 334-ءى عىلىم دوكتورى, 127 پروفەسسور, 5 اكادەميك بار. حالىققا قىزمەت كورسەتەتىن مەديتسينانىڭ ورتا جانە كىشى بۋىن قىزمەتكەرلەرىنىڭ الار ورنى دا ەرەكشە. بۇل تۋرالى egemen.kz حابارلادى.
اق حالاتتتى ابزال جانداردىڭ كاسىبي مەرەكەسى الدىندا وتكەن سالتاناتتى جينالىستا قالا اكىمى احمەتجان ەسىموۆ سالاداعى جەكەمەنشىك مەديتسينالىق ورتالىقتار مەن ۇيىمداردىڭ دا قوسىپ وتىرعان ۇلەسىن ەرەكشە ايتىپ ءوتتى. ولاردىڭ سانى قازىرگى تاڭدا 700-گە جۋىقتاعان.
ادام جانىنا ءاردايىم اراشاعا تۇسۋگە ءازىر ماماندىق يەلەرىنە ءتول مەرەكەسى كۇنى لايىقتى قۇرمەت كورسەتىلدى. توپ جارعان سالا ماماندارىنا ماقتاۋ گراموتالارى مەن «دەنساۋلىق ساقتاۋ ىسىنە قوسقان ۇلەسى ءۇشىن» جانە «دەنساۋلىق ساقتاۋ ءىسىنىڭ ۇزدىگى» اتتى ءتوس بەلگىلەر, باعالى سىيلىقتار تابىس ەتىلدى.
الماتىدا حالىق دەنساۋلىعىن نىعايتۋعا بولىنگەن قاراجاتتىڭ كولەمى سوڭعى ءۇش جىلدا 63 ميلليارد تەڭگەگە جەتكەن. وسى مەرزىم ىشىندە قالادا ءىرى ءۇش مەديتسينالىق مەكەمە بوي كوتەردى. سالتاناتقا قاتىسقان دەنساۋلىق ساقتاۋ جانە الەۋمەتتىك دامۋ ۆيتسە-ءمينيسترى الەكساندر تسوي تاياۋ ارادا الماتىنىڭ تۇركسىب اۋدانىندا 200 ادامعا قىزمەت كورسەتەتىن ەمحانا اشىلاتىنىن ءمالىم ەتتى. تاعى دا ءىرى ەكى ەمحانانىڭ قۇرىلىسى اياقتالىپ كەلەدى ەكەن.
سالتاناتتى جيىن الماتىنىڭ ونەر «ءجۇلدىزدارىنىڭ» كونتسەرتىنە ۇلاستى.
تالعات ءسۇيىنباي.
دەرەك, سۋرەت: egemen.kz.
