استانا قالالىق ءماسليحاتى جاقسىبەكوۆتىڭ كانديداتۋراسىن قولدادى

استانا. 4 مامىر. بۇگىن ەلوردادا استانا قالاسى ءماسليحاتى V شاقىرىلىمىنىڭ كەزەكتەن تىس 51-سەسسياسى ءوتتى. كۇن تارتىبىندە ەلوردا اكىمىن تاعايىنداۋ ماسەلەسى قارالدى. بۇل تۋرالى استانا قالاسى اكىمدىگىنىڭ رەسمي سايتى astana.gov.kz حابارلادى. سەسسيا بارىسىندا ءماسليحات دەپۋتاتتارى مەملەكەت باسشىسىنىڭ استانا قالاسى اكىمى قىزمەتىنە ادىلبەك جاقسىبەكوۆتى تاعايىنداۋ تۋرالى ۇسىنىسىن ءبىراۋىزدان قولدادى. «ەڭ الدىمەن, كورسەتىلگەن سەنىم ءۇشىن العىس ايتقىم كەلەدى. سونداي-اق, مەملەكەت باسشىسىنىڭ سايلاۋداعى جەڭىسىمەن بارشاڭىزدى قۇتتىقتايمىن. الدا ۇلكەن جۇمىستار كۇتىپ تۇر. وزدەرىڭىز بىلەتىندەي, پرەزيدەنت بەس ينستيتۋتسيونالدى رەفورمانى جاريالادى. ولاردى جۇزەگە اسىرۋ ءۇشىن بارلىعىمىز بىردەي جۇمىلۋىمىز كەرەك. ەلوردانىڭ كورىكتى كەلبەتىن ودان ءارى قالىپتاستىرىپ, ەلباسىنىڭ باعدارلامالارىن ىسكە اسىرۋعا ءتيىسپىز, – دەدى اكىم. ەلامان قوڭىر. دەرەك, سۋرەت: astana.gov.kz.